ಮೈನಸ್‌ 5.3 ಅಲ್ಲ -11.8; ಭಾರಿ ಜಿಡಿಪಿ ಕುಸಿತದ ಮುನ್ಸೂಚನೆ ನೀಡಿದ ಇಂಡಿಯಾ ರೇಟಿಂಗ್ಸ್‌

ಹೊಸದಿಲ್ಲಿ: 2021ನೇ ಆರ್ಥಿಕ ವರ್ಷದಲ್ಲಿ ಅಂದುಕೊಂಡಿದ್ದಕ್ಕಿಂತ ದೊಡ್ಡ ಪ್ರಮಾಣದಲ್ಲಿ ಜಿಡಿಪಿ ಕುಸಿಯಲಿದೆ ಎಂದು ದೇಶೀಯ ರೇಟಿಂಗ್‌ ಏಜೆನ್ಸಿ ಇಂಡಿಯಾ ರೇಟಿಂಗ್ಸ್‌ ಹೇಳಿದೆ. ಗುರುವಾರ ತನ್ನ ವರದಿ ಬಿಡುಗಡೆ ಮಾಡಿರುವ ಸಂಸ್ಥೆ, ದೇಶದ ಜಿಡಿಪಿ ಈ ಹಿಂದೆ ಅಂದುಕೊಂಡಿದ್ದ ಮೈನಸ್‌ 5.3 ಗಿಂತ ದುಪ್ಪಟ್ಟು ಅಂದರೆ ಮೈನಸ್‌ 11.8ರಷ್ಟು ಕುಸಿಯಲಿದೆ ಎಂದು ಹೇಳಿದೆ.

ಒಂದೊಮ್ಮೆ ಇದು ಸಂಭವಿಸಿದ್ದೇ ಆದಲ್ಲಿ ಭಾರತದ ಹಣಕಾಸು ಇತಿಹಾಸದ ಕುಖ್ಯಾತ ಘಟನೆಯಾಗಿ ದಾಖಲಾಗಲಿದೆ. ಆದರೆ 2022ರಲ್ಲಿ ಜಿಡಿಪಿ ಶೇ. 9.9ರಷ್ಟು ಬೆಳವಣಿಗೆ ಕಾಣಲಿದೆ ಎಂದು ಸಂಸ್ಥೆ ಹೇಳಿದೆ.

ಜಿಡಿಪಿ ಕುಸಿತ ಕಳವಳಕಾರಿ ಎಂದ ರಘುರಾಮ್‌ ರಾಜನ್‌

1951ರಿಂದ ಲಭ್ಯವಿರುವ ಜಿಡಿಪಿ ಅಂಕಿ ಅಂಶಗಳ ಪ್ರಕಾರ ಮೈನಸ್‌ 11.8 ಜಿಡಿಪಿ ಭಾರತದ ಇತಿಹಾಸದ ಅತೀ ದೊಡ್ಡ ಕುಸಿತವಾಗಲಿದೆ. ಜೊತೆಗೆ ಇದು ದೇಶದ ಆರನೇ ಆರ್ಥಿಕ ಹಿಂಜರಿತವಾಗಲಿದೆ. ಈ ಹಿಂದೆ 1958, 66, 67, 73 ಮತ್ತು 1980ನೇ ಆರ್ಥಿಕ ವರ್ಷದಲ್ಲಿ ದೇಶದಲ್ಲಿ ಆರ್ಥಿಕ ಹಿಂಜರಿತ ದಾಖಲಾಗಿತ್ತು. ಆ ನಂತರ ದೇಶ ಆರ್ಥಿಕ ಹಿಂಜರಿತವನ್ನು ಕಂಡಿಲ್ಲ. 2008ರಲ್ಲಿ ಇಡೀ ಜಗತ್ತೇ ಆರ್ಥಿಕ ಹಿಂಜರಿತದಲ್ಲಿ ಕೊಚ್ಚಿ ಹೋದರೂ, ದೇಶ ಮಾತ್ರ ಆರ್ಥಿಕವಾಗಿ ಸದೃಢವಾಗಿ ನಿಂತಿತ್ತು.

ಈ ಹಿಂದೆ ಕೊನೆಯ ಬಾರಿಗೆ 1980ರಲ್ಲಿ ದೇಶದ ಆರ್ಥಿಕತೆ ಶೇ. 5.2ರಷ್ಟು ಕುಸಿತ ಕಂಡಿತ್ತು ಎಂದು ವರದಿ ಹೇಳಿದೆ. ಈಗಾಗಲೇ 2021ನೇ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ದೇಶದ ಜಿಡಿಪಿ ಶೇ. 23.9ರಷ್ಟು ಕುಸಿತ ಕಂಡಿದೆ. 1998ರಲ್ಲಿ ತ್ರೈಮಾಸಿಕ ಜಿಡಿಪಿ ವರದಿ ಬಿಡುಗಡೆ ಮಾಡಲು ಆರಂಭಿಸಿದ ಬಳಿಕದ ಮಹಾ ಕುಸಿತವಾಗಿ ಇದು ದಾಖಲಾಗಿದೆ.

ಆರ್ಥಿಕ ಕುಸಿತದಿಂದ 2021ರಲ್ಲಿ 18.44 ಲಕ್ಷ ಕೋಟಿ ರೂ. ಆರ್ಥಿಕ ನಷ್ಟವಾಗಲಿದೆ ಎಂದು ವರದಿ ಹೇಳಿದೆ. ಏಜೆನ್ಸಿಯ ಪ್ರಕಾರ ಚಿಲ್ಲರೆ ಮತ್ತು ಸಗಟು ಹಣದುಬ್ಬರ ಕ್ರಮವಾಗಿ ಶೇ. 5.1 ಮತ್ತು ಮೈನಸ್‌ ಶೇ. 1.7ಕ್ಕೆ ಇಳಿಕೆಯಾಗುವ ಸಾಧ್ಯತೆ ಇದೆ.