ಮದ್ಯದ ಬಾಟಲಿ ಮೇಲೆ ಗಾಂಧಿ ಚಿತ್ರ: ಕ್ಷಮೆ ಯಾಚಿಸಿದ ಇಸ್ರೇಲಿ ಕಂಪನಿ

ಹೊಸದಿಲ್ಲಿ: ಮದ್ಯದ ಬಾಟಲಿ ಮೇಲೆ ಮಹಾತ್ಮ ಗಾಂಧಿಯ ಚಿತ್ರ ಪ್ರಕಟಿಸಿ ವಿವಾದ ಸೃಷ್ಟಿಸಿದ್ದ ಇಸ್ರೇಲಿ ಕಂಪನಿ ಈಗ ಕ್ಷಮೆ ಯಾಚಿಸಿದೆ. ಭಾರತೀಯರು ಮತ್ತು ಭಾರತ ಸರಕಾರದ ಭಾವನೆಗಳಿಗೆ ನೋವು ತಂದಿದ್ದಕ್ಕೆ ವಿಷಾದಿಸುವುದಾಗಿ ಕಂಪನಿ ಹೇಳಿದೆ.

ಇಸ್ರೇಲ್‌ನ 71ನೇ ಸ್ವತಂತ್ರ ದಿನದ ಸಂಸ್ಮರಣೆಯ ಅಂಗವಾಗಿ ಆ ದೇಶದ ಮೂವರು ಪ್ರಧಾನಿಗಳ ಜೊತೆಗೆ ಗಾಂಧೀಜಿಯ ಚಿತ್ರವನ್ನು ಮದ್ಯದ ಬಾಟಲಿ ಮೇಲೆ ಮಾಕಾ ಬ್ರಿವೇರಿ ಎನ್ನುವ ಇಸ್ರೇಲಿ ಕಂಪನಿ ಪ್ರಕಟಿಸಿತ್ತು.

ಮಂಗಳವಾರ ರಾಜ್ಯಸಭೆಯಲ್ಲಿ ಈ ವಿಷಯ ಪ್ರಸ್ತಾಪಿಸಿದ್ದ ಆಮ್‌ಆದ್ಮಿ ಪಕ್ಷ ದ ಸದಸ್ಯ ಸಂಜಯ್‌ಸಿಂಗ್‌ ಸೇರಿದಂತೆ ಇತರೆ ಸದಸ್ಯರು, ಕೇಂದ್ರ ಸರಕಾರ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದರು. ಈ ವೇಳೆ ಪೀಠದಲ್ಲಿದ್ದ ಸಭಾಧ್ಯಕ್ಷ ವೆಂಕಯ್ಯನಾಯ್ಡು, ಈ ವಿಷಯದ ಬಗ್ಗೆ ಸೂಕ್ತ ಕ್ರಮ ಜರುಗಿಸುವಂತೆ ವಿದೇಶಾಂಗ ಖಾತೆ ಸಚಿವ ಎಸ್‌.ಜೈಶಂಕರ್‌ ಅವರಿಗೆ ಸೂಚನೆ ನೀಡಿದ್ದರು.

ಏತನ್ಮಧ್ಯೆ, ಕಂಪನಿಯ ಬ್ರ್ಯಾಂಡ್‌ ಮ್ಯಾನೇಜರ್‌ ಗಿಲಾದ್‌ ಡ್ರೋರ್‌ ಕ್ಷಮೆ ಯಾಚಿಸಿದ್ದು, ''ಗಾಂಧೀಜಿ ಬಗ್ಗೆ ನಮಗೆ ಹೆಚ್ಚಿನ ಗೌರವವಿದೆ. ಈ ಕೂಡಲೇ ಗಾಂಧಿ ಚಿತ್ರವುಳ್ಳ ಬ್ರಾಂಡ್‌ನ ಮದ್ಯದ ಸರಬರಾಜು ಮತ್ತು ಉತ್ಪಾದನೆಯನ್ನು ರದ್ದುಗೊಳಿಸಿದ್ದೇವೆ. ಮಾರುಕಟ್ಟೆಯಿಂದಲೂ ವಾಪಸ್‌ ಪಡೆಯುತ್ತಿದ್ದೇವೆ,'' ಎಂದಿದ್ದಾರೆ.

ವಿವಾದಿತ ಬಾಟೆಲ್‌ನ ಬಾಕ್ಸ್‌ ಮೇಲೆ ಗಾಂಧೀಜಿ ಸೇರಿದಂತೆ ಐವರು ಐತಿಹಾಸಿಕ ವ್ಯಕ್ತಿಗÜಳ ಕಾರ್ಟೂನ್‌ಗಳನ್ನು ಬಳಕೆ ಮಾಡಲಾಗಿದೆ. ಬಾಟಲ್‌ ಮೇಲೆಯೂ ಚಿತ್ರವನ್ನು ಪ್ರಕಟಿಸಲಾಗಿದೆ. ಗಾಂಧೀಜಿಗೆ ಆ ಕಾರ್ಟೂನ್‌ನಲ್ಲಿ ಟೀ ಶರ್ಟ್‌ ಹಾಕಲಾಗಿತ್ತು.