ಇನ್ನು ರಿಲಯನ್ಸ್ ಜಿಯೊ ಫೈಬರ್‌ ಕ್ರಾಂತಿ

ಹೊಸದಿಲ್ಲಿ : ಮೂರು ವರ್ಷಗಳ ಹಿಂದೆ ಜಿಯೊ ಬಿಡುಗಡೆಗೊಳಿಸುವ ಮೂಲಕ ಉಚಿತ ಕರೆ, ಅಗ್ಗದ ಡೇಟಾ ಘೋಷಿಸಿ ಮೊಬೈಲ್‌ ವಲಯದಲ್ಲಿ ಸಂಚಲನ ಸೃಷ್ಟಿಸಿದ್ದ ರಿಲಯನ್ಸ್‌ ಇಂಡಸ್ಟ್ರೀಸ್‌ ಮುಖ್ಯಸ್ಥ ಮುಕೇಶ್‌ ಅಂಬಾನಿ ಅವರು ಗುರುವಾರ ಮತ್ತೆ ಬಂಪರ್‌ ಕೊಡುಗೆಗಳೊಂದಿಗೆ ಮರಳಿದ್ದಾರೆ. ಈ ಬಾರಿ ಜಿಯೋ ಫೈಬರ್‌ ಎಂಬ ಫಿಕ್ಸೆಡ್‌ ಲೈನ್‌ ಬ್ರಾಡ್‌ಬ್ಯಾಂಡ್‌ ಸೇವೆಯನ್ನು ಘೋಷಿಸಿದ್ದಾರೆ. ಗ್ರಾಹಕರಿಗೆ ಹೈ ಡೆಫಿನಿಶನ್‌ ಟಿ.ವಿ, ಸೆಟ್‌ ಟಾಪ್‌ ಬಾಕ್ಸ್‌ನೊಂದಿಗೆ ಹಲವಾರು ಸೇವೆಗಳ ಪ್ಯಾಕೇಜ್‌ಗಳನ್ನು ಪ್ರಕಟಿಸಿದ್ದಾರೆ.

ಇದರೊಂದಿಗೆ ಗ್ರಾಹಕರು ಮನೆಯಲ್ಲಿ ತಮ್ಮ ಟಿ.ವಿಯ ಮೂಲಕ ಇಂಟರ್‌ನೆಟ್‌ನ ಹಲವಾರು ಪ್ರಯೋಜನಗಳನ್ನು ಪಡೆಯಬಹುದು. ಸಿನಿಮಾ, ಮನರಂಜನೆ ಪಡೆಯಬಹುದು. ವೀಡಿಯೊ ಕಾನ್ಫರೆನ್ಸ್‌ ಮಾಡಬಹುದು. ಮಾಸಿಕ 699 ರೂ.ಗಳಿಂದ ಜಿಯೊ ಫೈಬರ್‌ ಸೇವೆ ಆರಂಭವಾಗುತ್ತದೆ. ಮಾಸಿಕ ದರ 8,499 ರೂ. ತನಕದ ಶ್ರೇಣಿಯನ್ನು ಹೊಂದಿದೆ ಎಂದು ಕಂಪನಿ ತಿಳಿಸಿದೆ.

ಜಿಯೊ ಫೈಬರ್‌ 699 ರೂ.ಗಳ ಬೇಸಿಕ್‌ ಪ್ಯಾಕೇಜ್‌ (ಬ್ರೌನ್ಸ್‌) ಒಳಗೊಂಡಿದೆ. ನಂತರ ಸಿಲ್ವರ್‌ (840 ರೂ.), ಗೋಲ್ಡ್‌ (1,299 ರೂ.), ಡೈಮಂಡ್‌ (2,499 ರೂ.), ಪ್ಲಾಟಿನಮ್‌ (3,999 ರೂ.) ಮತ್ತು ಟೈಟಾನಿಯಂ (8,499 ರೂ.) ಎಂಬ ದರ ಶ್ರೇಣಿಯನ್ನು ಹೊಂದಿದೆ. ಗೋಲ್ಡ್‌ ಮತ್ತು ನಂತರದ ಪ್ಲಾನ್‌ಗಳಲ್ಲಿ ಗ್ರಾಹಕರಿಗೆ ಟಿ.ವಿ ಕೂಡ ಸಿಗುತ್ತದೆ.

ಪ್ರಸ್ತುತ ಭಾರತದಲ್ಲಿ ಫಿಕ್ಸೆಡ್‌-ಲೈನ್‌ ಬ್ರಾಡ್‌ಬ್ಯಾಂಡ್‌ನ ಸರಾಸರಿ ಸ್ಪೀಡ್‌ 25ಎಂಬಿಪಿಎಸ್‌ ಆಗಿದೆ. ಅಮೆರಿಕದಲ್ಲಿ ಕೂಡ ಸರಾಸರಿ ವೇಗ 90 ಎಂಬಿಪಿಎಸ್‌. ಆದರೆ ಜಿಯೊ ಫೈಬರ್‌ನಲ್ಲಿ ಆರಂಭಿಕ ವೇಗವೇ 100 ಎಂಬಿಪಿಎಸ್‌ ಆಗಿದೆ. ಇದು 1 ಜಿಬಿಪಿಎಸ್‌ ತನಕ ಲಭಿಸಲಿದೆ. ಇದರ ಪರಿಣಾಮ ಭಾರತ ಟಾಪ್‌ 5 ಬ್ರಾಡ್‌ಬ್ಯಾಂಡ್‌ ರಾಷ್ಟ್ರಗಳ ಪಟ್ಟಿಗೆ ಸೇರ್ಪಡೆಯಾಗಲಿದೆ ಎಂದು ಕಂಪನಿ ಹೇಳಿದೆ.

ಗ್ರಾಹಕರಿಗೆ ಟಿ.ವಿ:

ಜಿಯೊ ಫಾರ್‌ಎವರ್‌ ವಾರ್ಷಿಕ ಚಂದಾದಾರಿಕೆಯ ಪ್ಲಾನ್‌ನಲ್ಲಿ ಗ್ರಾಹಕರಿಗೆ ಟಿ.ವಿ ಸೆಟ್‌, ಅನ್‌ಲಿಮಿಟೆಡ್‌ ವಾಯ್ಸ್‌, ಡೇಟಾ, 4ಕೆ ಸೆಟ್‌ ಟಾಪ್‌ ಬಾಕ್ಸ್‌, ಜಿಯೊ ಹೋಮ್‌ ಗೇಟ್‌ವೇ ಇತ್ಯಾದಿ ಸಿಗಲಿವೆ. ಇದು ಗೋಲ್ಡ್‌ ಮತ್ತು ನಂತರದ ಪ್ಲಾನ್‌ ಖರೀದಿಸುವವರಿಗೆ ಸಿಗಲಿದೆ. ಗೋಲ್ಡ್‌ ಪ್ಲಾನ್‌ ಮಾಸಿಕ 1,299 ರೂ. ದರವನ್ನು ಹೊಂದಿದೆ.