ಪೆಟ್ರೋಲ್ ಬೆಲೆ 60ಕ್ಕಿಂತ ಕೆಳಗಿರಲು ವ್ಯಾಟ್ ರದ್ದು ಮಾಡಿದ ಗೋವಾ

ಪಣಜಿ: ಪೆಟ್ರೋಲ್ ಲೀಟರಿಗೆ 60 ರೂಪಾಯಿ ಒಳಗೆ ಜನರಿಗೆ ಲಭ್ಯವಾಗುವಂತಾಗಲು ಗೋವಾದ ಬಿಜೆಪಿ ಸರಕಾರವು ಮಂಗಳವಾರ, ತೈಲದ ಮೇಲಿನ ಮೌಲ್ಯವರ್ಧಿತ ತೆರಿಗೆಯನ್ನು (ವ್ಯಾಟ್) ಶೇ.2ರಷ್ಟು ಕಡಿತಗೊಳಿಸಿದೆ.

ಶೇ.22 ಇದ್ದ ವ್ಯಾಟ್ ಅನ್ನು ಶೇ.20ಕ್ಕೆ ಇಳಿಸಲಾಗಿದೆ ಎಂದು ವಾಣಿಜ್ಯ ತೆರಿಗೆ ಇಲಾಖೆ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಮೇ 16ರ ರಾತ್ರಿ ಪೆಟ್ರೋಲ್ ಬೆಲೆ ಏರಿಸಿದ ಬಳಿಕ ಗೋವಾದಲ್ಲಿ ಅದರ ಬೆಲೆ ಲೀಟರಿಗೆ 60 ರೂ. ದಾಟಿತ್ತು. ವ್ಯಾಟ್ ಇಳಿಸಿದ ಬಳಿಕ ಅಲ್ಲಿ ಪೆಟ್ರೋಲ್ ಬೆಲೆ ಲೀಟರಿಗೆ 59.70 ರೂ. ಆಗುತ್ತದೆ.

ರಾಜ್ಯ ಬಟೆಟ್‌ನಲ್ಲಿ ಮುಖ್ಯಮಂತ್ರಿ ಲಕ್ಷ್ಮೀಕಾಂತ್ ಪಾರ್ಸೇಕರ್ ಅವರು ವ್ಯಾಟ್ ಹೆಚ್ಚಳ ಮಾಡಿದ್ದರಾದರೂ, ಲೀಟರಿಗೆ 60 ರೂ. ದಾಟದಂತೆ, ತೆರಿಗೆ ಇಳಿಸಲಾಗುತ್ತದೆ ಎಂದು ಭರವಸೆ ನೀಡಿದ್ದರು.

2012ರಲ್ಲಿ ಅಧಿಕಾರಕ್ಕೇರಿದ್ದ ಬಿಜೆಪಿ ಸರಕಾರವು ಪೆಟ್ರೋಲ್ ಮೇಲಿನ ವ್ಯಾಟ್ ಹೊರೆಯನ್ನು ಸಂಪೂರ್ಣವಾಗಿ ರದ್ದುಗೊಳಿಸಿತ್ತು. ಇದರ ಪರಿಣಾಮ ಅಂದು ಪೆಟ್ರೋಲ್ ಬೆಲೆಯು ಲೀಟರಿಗೆ 11 ರೂಪಾಯಿಯಷ್ಟು ಕಡಿಮೆಯಾಗಿತ್ತು.

ಗೋವಾದಲ್ಲಿ ಪೆಟ್ರೋಲ್ ಅತ್ಯಂತ ಅಗ್ಗವಾಗಿದ್ದು, ವ್ಯಾಟ್ ರದ್ದತಿಯಿಂದ ರಾಜ್ಯ ಸರಕಾರಕ್ಕೆ 150 ಕೋಟಿ ರೂ. ಹೊರೆ ಬಿದ್ದಿತ್ತು.

ಆದರೆ, ಸ್ವಲ್ಪ ವ್ಯಾಟ್ ವಿಧಿಸುವ ಮೂಲಕ ಸರಕಾರವು ತನ್ನ ನಿರ್ಧಾರವನ್ನು ಬದಲಿಸಿತ್ತು. ನಂತರ ಇದೀಗ, ವ್ಯಾಟ್ ಇಳಿಸಲಾಗಿದೆ.