ಧನ್‌ತೇರಸ್‌ನಲ್ಲಿ ಹೊಳೆದ ಚಿನ್ನ, ಶೇ.15ರಷ್ಟು ಮಾರಾಟ ಏರಿಕೆ

ಹೊಸದಿಲ್ಲಿ : ದರ ಏರಿಕೆ ನಡುವೆಯೇ ಪವಿತ್ರ ದಿನವಾದ 'ಧನ್‌ತೇರಸ್‌' ಸಂದರ್ಭದಲ್ಲಿ ಚಿನ್ನದ ವಹಿವಾಟು ಏರಿಕೆಯಾಗಿದೆ. ಮಾರಾಟ ವಹಿವಾಟು ಶೇ.15ರಷ್ಟು ಏರಿಕೆಯಾಗಿದೆ ಎಂದು ಅಂದಾಜು ಮಾಡಲಾಗಿದೆ. ಚಿನ್ನದ ದರ ದಿಲ್ಲಿಯಲ್ಲಿ 10 ಗ್ರಾಮ್‌ಗೆ 10 ರೂ. ಏರಿಕೆಯಾಗಿದ್ದು 30,710 ಮುಟ್ಟಿದೆ.

ಧನ್‌ತೇರಸ್‌ ದಿನ ಚಿನ್ನ, ಬೆಳ್ಳಿ ಮತ್ತು ಇತರೆ ವಸ್ತುಗಳನ್ನು ಖರೀದಿಸುವುದು ಪವಿತ್ರ ಎನ್ನುವ ನಂಬಿಕೆ ಇದೆ. ದಿನದ ಆರಂಭದಲ್ಲಿ ಚಿನ್ನದ ಖರೀದಿ ಸೊರಗುತ್ತಿತ್ತು. ಆದರೆ, ನಂತರದ ಅವಧಿಯಲ್ಲಿ ಖರೀದಿ ಭರಾಟೆ ಹೆಚ್ಚಿತು. ಮದುವೆ ಆಭರಣಗಳ ಖರೀದಿದಾರರಿಗೆ ಕೆಲವು ಶಾಪ್‌ಗಳು ಮುಂಗಡ ಟೋಕನ್‌ಗಳನ್ನು ವಿತರಿಸಿದ್ದರು. ಆಭರಣಗಳಿಗೆ ಹೋಲಿಸಿದರೆ ಚಿನ್ನದ ನಾಣ್ಯಗಳಿಗೆ ಹೆಚ್ಚಿನ ಬೇಡಿಕೆ ಕಂಡು ಬಂತು. ಪಿ.ಸಿ.ಜ್ಯುವೆಲರ್ಸ್‌ ಮತ್ತು ಕಲ್ಯಾಣ್‌ ಜ್ಯುವೆಲ್ಲರ್ಸ್‌ ಸೇರಿದಂತೆ ಆಭರಣ ಮಳಿಗೆಗಳು ದೀಪಾವಳಿ ಸಂದರ್ಭದಲ್ಲಿ ಉತ್ತಮ ವಹಿವಾಟಿನ ನಿರೀಕ್ಷೆಯನ್ನು ವ್ಯಕ್ತಪಡಿಸಿವೆ.

ಏರಲಿದೆ ಚಿನ್ನದ ದರ

''ರೂಪಾಯಿ ಮೌಲ್ಯದ ಕುಸಿತ ಮತ್ತು ಜಾಗತಿಕ ಪ್ರಭಾವಗಳಿಂದಾಗಿ ಚಿನ್ನದ ದರ ಮುಂದಿನ ವಾರಗಳಲ್ಲಿ 10 ಗ್ರಾಮ್‌ ಚಿನ್ನದ ದರವು 35,000-40,000 ರೂ. ತನಕ ಮುಟ್ಟುವ ಸಾಧ್ಯತೆಗಳಿವೆ. ವರ್ಷದ ಹಿಂದಿದ್ದ ಗರಿಷ್ಠ ದರ ತಲುಪಬಹುದು.
-ನಿತನ್‌ ಖಾಂಡೇಲ್‌ವಾಲ್‌, ಆಲ್‌ ಇಂಡಿಯಾ ಜೆಮ್‌ ಆ್ಯಂಡ್‌ ಜ್ಯುವೆಲ್ಲರಿ ಡೊಮೆಸ್ಟಿಕ್‌ ಕೌನ್ಸಿಲ್‌ (ಜಿಜೆಸಿ)