ಗೂಗಲ್‌ ಆಫೀಸ್‌ನಲ್ಲಿ ರಾಜಕೀಯ ಚರ್ಚೆಗೆ ಕತ್ತರಿ!

ಹೊಸದಿಲ್ಲಿ: ಗೂಗಲ್‌ ಉದ್ಯೋಗಿಗಳು ಕಚೇರಿಯಲ್ಲಿ ರಾಜಕೀಯ ಅಥವಾ ಯಾವುದಾದರೂ ಸುದ್ದಿಗಳ ಕುರಿತಾಗಿ ಚರ್ಚೆ ಅಥವಾ ವಾಗ್ವಾದಗಳನ್ನು ನಡೆಸುವಂತಿಲ್ಲ. ಈ ನಿರ್ಬಂಧವನ್ನು ಜಾರಿಗೊಳಿಸಿರುವುದಾಗಿ ಕಂಪನಿಯ ಅಧಿಕೃತ ಬ್ಲಾಗ್‌ ಪೋಸ್ಟ್‌ನಲ್ಲಿ ಹೇಳಲಾಗಿದೆ.

ಕಚೇರಿಯಲ್ಲಿ ಉದ್ಯೋಗಿಗಳ ನಡಾವಳಿಗಳಿಗೆ ಸಂಬಂಧಿಸಿದ ಹೊಸ ಮಾರ್ಗಸೂಚಿಗಳ ಪ್ರಕಾರ, ರಾಜಕೀಯ ಚರ್ಚೆಗೆ ಅವಕಾಶವಿಲ್ಲ. ''ಕೆಲಸ ಮಾಡಿಸುವ ಸಲುವಾಗಿಯೇ ಪ್ರತಿಯೊಬ್ಬ ಉದ್ಯೋಗಿಯನ್ನು ನೇಮಕ ಮಾಡಿಕೊಳ್ಳಲಾಗಿದೆಯೇ ಹೊರತು, ಕೆಲಸದ ಅವಧಿಯಲ್ಲಿ ಚರ್ಚೆಗಳನ್ನು ನಡೆಸುವುದಕ್ಕಲ್ಲ. ಕೆಲಸದ ಅವಧಿಯಲ್ಲಿ ಕೆಲಸದ ಹೊರತಾದ ಚರ್ಚೆಗಳಿಗೆ ಅವಕಾಶವಿಲ್ಲ,'' ಎಂದು ಸ್ಪಷ್ಟವಾಗಿ ಗೂಗಲ್‌ ಆಡಳಿತ ಮಂಡಳಿ ಹೇಳಿದೆ.

''ಗೂಗಲ್‌ನಲ್ಲಿ ಹೆಚ್ಚಿನ ಜವಾಬ್ದಾರಿಯಿಂದ ಕೆಲಸ ಮಾಡಬೇಕು. ಕೋಟ್ಯಂತರ ಜನ ನಮ್ಮನ್ನು ವಿಶ್ವಸನೀಯ ಮಾಹಿತಿಗಾಗಿ ನೆಚ್ಚಿಕೊಂಡಿದ್ದಾರೆ. ನಮ್ಮ ಉತ್ಪನ್ನಗಳು ಮತ್ತು ಸೇವೆಯಲ್ಲಿ ನಾವು ಗುಣಮಟ್ಟವನ್ನು ಕಾಯ್ದುಕೊಳ್ಳಬೇಕು,'' ಎಂದು ಉದ್ಯೋಗಿಗಳಿಗೆ ಗೂಗಲ್‌ ಹೇಳಿದೆ.