ಉದ್ಯೋಗ ಹುಡುಕಲು ಈಗ ಗೂಗಲ್‌ ಸಾಕು!

ನಟೇಶ ಬೆಂಗಳೂರು :'ಕೆಲಸ ಹುಡುಕುವುದೆಂದರೆ ಸುಮ್ಮನೇ ಅಲ್ಲ' ಅನ್ನುವ ಮಾತಿದೆ. ಕನ್ಸಲ್ಟೆನ್ಸಿಗಳಿಗೆ ಅಲೆದಾಡುವುದು, ಯಾರಾರ‍ಯರಿಗೋ ಹಣ ಕೊಟ್ಟು ಮೋಸ ಹೋಗುವುದು ಅವೆಲ್ಲ ಈಗಿಲ್ಲ. ಕೂತ ಕಡೆಯೇ ಗೂಗಲ್‌ ಮೂಲಕ ಸೂಕ್ತ ಉದ್ಯೋಗಗಳನ್ನು ಹುಡುಕಿಕೊಳ್ಳಬಹುದು. ಅಷ್ಟು ಮಾತ್ರವಲ್ಲ ನೀವು ನೆಲೆಸಿರುವ ಸ್ಥಳದಲ್ಲಿ ಇರಬಹುದಾದ ಉದ್ಯೋಗಗಳ ಬಗೆಗೂ ತಿಳಿಯಬಹುದಾಗಿದೆ.

ಉದ್ಯೋಗಾನ್ವೇಷಣೆ ಮಾಡುವ ಮಂದಿಗೆ ನೆರವು ನೀಡಲು ಹೊಸ ಸೌಲಭ್ಯಗಳನ್ನು ಗೂಗಲ್‌ ಒದಗಿಸಿದೆ. ಈ ಸೌಲಭ್ಯಗಳಿಗೆ ಇತ್ತೀಚೆಗೆ ಚಾಲನೆ ಸಿಕ್ಕಿದ್ದು, ಗೂಗಲ್‌ ನಿಮ್ಮ ಉದ್ಯೋಗ ಮಾರ್ಗದರ್ಶಿ.

ಸಾಮಾನ್ಯವಾಗಿ ಈಗಾಗಲೇ ಅನೇಕರು ಉದ್ಯೋಗ ಹುಡುಕಲು ಗೂಗಲ್‌ ಸರ್ಚ್‌ ಅನ್ನು ಬಳಸುತ್ತಿರಬಹುದು. ಅದನ್ನು ಈಗ ಇನ್ನಷ್ಟು ಪರಿಣಾಮಕಾರಿ ಮಾಡಲಾಗಿದೆ. ಸಾಕಷ್ಟು ಫಿಲ್ಟರ್‌ಗಳನ್ನು ನೀಡಲಾಗಿದ್ದು ಹುಡುಕಾಟ ಈಗ ಸರಳ. ಭಾರತದ ಉದ್ಯೋಗಾರ್ಥಿಗಳಿಗೆ ನೆರವಾಗಲು ಉದ್ಯೋಗ ಮಾಹಿತಿ ಪಟ್ಟಿಯನ್ನು ಗೂಗಲ್‌, ತನ್ನ ಸರ್ಚ್‌ ಎಂಜಿನ್‌ ಮೂಲಕ ಒದಗಿಸಿದೆ. ಇದಕ್ಕಾಗಿಯೇ ಐಬಿಎಂ ಟ್ಯಾಲಂಟ್‌ ಮ್ಯಾನೇಜ್‌ ಮೆಂಟ್‌ ಸಲ್ಯೂಷನ್ಸ್‌, ಹೆಡ್‌ ಹೊಂಕೊಸ್‌, ಟೈಮ್ಸ್‌ ಜಾಬ್ಸ್‌, ವಿಸ್ಡಮ್‌ ಜಾಬ್ಸ್‌, ಫ್ರೆಷರ್ಸ್‌ ವರ್ಲ್ಡ್‌, ಲಿಂಕ್ಡಿನ್‌, ಕ್ವಿಕ್ವರ್‌ ಜಾಬ್ಸ್‌, ಶೈನ್‌.ಕಾಂ. ಟಿ-ಜಾಬ್ಸ್‌ ಮತ್ತಿತರ ಸಂಸ್ಥೆಗಳೊಂದಿಗೆ ಗೂಗಲ್‌ ಒಪ್ಪಂದ ಮಾಡಿಕೊಂಡಿದೆ. ಉದ್ಯೋಗಾರ್ಥಿಗಳನ್ನು ಸಂಬಂಧಿಸಿದ ಪಾಲುದಾರ ವೆಬ್‌ಸೈಟ್‌ಗಳೊಂದಿಗೆ ಗೂಗಲ್‌ ಜೋಡಣೆ ಮಾಡುತ್ತದೆ.

ಡೆಸ್ಕ್‌ ಟಾಪ್‌ನಲ್ಲಿ ಮಾತ್ರವಲ್ಲದೇ ಉದ್ಯೋಗದ ಗೂಗಲ್‌ ಸರ್ಚ್‌ ಅನ್ನು ಆ್ಯಂಡ್ರಾಯ್ಡ್‌ ಹಾಗೂ ಐಒಎಸ್‌ನ ಮೊಬೈಲ್‌, ಟ್ಯಾಬ್ಲೆಟ್‌ನಂಥ ಸಾಧನಗಳಲ್ಲೂ ಮಾಡಬಹುದು. ಸದ್ಯಕ್ಕೆ ಉದ್ಯೋಗ ಸಂಬಂಧಿ ಎಲ್ಲ ಮಾಹಿತಿಗಳೂ ಇಂಗ್ಲೀಷ್‌ನಲ್ಲಿ ಮಾತ್ರ ಲಭ್ಯ. ಕಳೆದ ವರ್ಷ ಇಂಥದ್ದೇ ಸೇವೆಯನ್ನು ಗೂಗಲ್‌ ಅಮೆರಿಕದಲ್ಲಿ ಮೊಟ್ಟ ಮೊದಲ ಬಾರಿಗೆ ಆರಂಭಿಸಿತ್ತು.

ಉದ್ಯೋಗ ಹುಡುಕುವುದು ಹೇಗೆ?

ಮೊದಲಿಗೆ ಗೂಗಲ್‌ ಸರ್ಚ್‌ ಎಂಜಿನ್‌ ಪುಟವನ್ನು ತೆರೆಯಿರಿ. ಉದ್ಯೋಗಗಳ ಬಗೆಗಿನ ಮಾಹಿತಿಯ ರಾಶಿಯೇ ತೆರೆ ಮೇಲೆ ಬರುತ್ತದೆ. ಬೆಂಗಳೂರು ಸಮೀಪದ ಉದ್ಯೋಗಗಳ ಪಟ್ಟಿ ಕಾಣಿಸಿಕೊಳ್ಳುತ್ತದೆ. ಕಂಪ್ಯೂಟರ್‌ ಮತ್ತು ಐಟಿ, ಹಿಂದಿನ ಮೂರು ದಿನಗಳ ಪಟ್ಟಿ, ಪೂರ್ಣಾವಧಿ, ಮ್ಯಾನೆಜ್‌ಮೆಂಟ್‌, ಅಕೌಂಟಿಂಗ್‌ ಮತ್ತು ಫೈನಾನ್ಸ್‌, ಸೇಲ್ಸ್‌, ಹೆಲ್ತ್‌ಕೇರ್‌, ಸೈನ್ಸ್‌ ಆ್ಯಂಡ್‌ ಟೆಕ್ನಾಲಜಿ, ಅಡ್ವಟೈಸಿಂಗ್‌ ಆ್ಯಂಡ್‌ ಮಾರ್ಕೆಟಿಂಗ್‌ - ಹೀಗೆ ನಾನಾ ವಿಭಾಗಗಳ ವಿವರ ಅಲ್ಲಿರುತ್ತದೆ. ನಮ್ಮ ಅಗತ್ಯದ ವಲಯವನ್ನು ಕ್ಲಿಕ್‌ ಮಾಡಿದರೆ, ಕೆಲಸದ ಸ್ವರೂಪ, ಸ್ಥಳ, ವೇತನ, ಕಂಪನಿ, ಅನುಭವ ಮತ್ತಿತರ ವಿವರಗಳ ಪುಟ ತೆರೆದುಕೊಳ್ಳುತ್ತದೆ.


ಗೂಗಲ್‌ ಪುಟಗಳಲ್ಲಿನ ಮಾಹಿತಿಯನ್ನು ಅಗತ್ಯವಿರುವ ಗೆಳೆಯರ ಜತೆ ಹಂಚಿಕೊಳ್ಳಲೂ ಅವಕಾಶವಿದೆ. ಉದ್ಯೋಗ ಮಾಹಿತಿ ಕುರಿತ ಅಲರ್ಟ್‌ ಅನ್ನೂ ಪಡೆಯಬಹುದು. ಬುಕ್‌ ಮಾರ್ಕ್‌ ಅವಕಾಶವೂ ಇದೆ.