'ಸರ್ಚ್‌ ಎಂಜಿನ್‌ ಬಂದ್‌ ಮಾಡುತ್ತೇವೆ' - ಗೂಗಲ್‌ ಬೆದರಿಕೆಗೆ ಸೊಪ್ಪು ಹಾಕದ ಆಸ್ಟ್ರೇಲಿಯಾ

ಸಿಡ್ನಿ: ಅಮೆರಿಕಾದ ಟೆಕ್‌ ದೈತ್ಯ ಗೂಗಲ್‌, ತನ್ನ ಸರ್ಚ್‌ ಎಂಜಿನ್‌ ಅನ್ನು ಆಸ್ಪ್ರೇಲಿಯಾದಲ್ಲಿ ನಿರ್ಬಂಧಿಸುವುದಾಗಿ ಬೆದರಿಕೆ ಹಾಕಿದೆ. ಆದರೆ, "ಇಂಥ ಬೆದರಿಕೆಗಳಿಗೆ ನಾವು ಪ್ರತಿಕ್ರಿಯಿಸುವುದಿಲ್ಲ," ಎಂದು ಆಸ್ಪ್ರೇಲಿಯಾ ಪ್ರಧಾನಿ ಹೇಳಿದ್ದಾರೆ.

ಮಾಧ್ಯಮಗಳ ಸುದ್ದಿಗೆ ಗೂಗಲ್‌ನಂಥ ಟೆಕ್‌ ಸಂಸ್ಥೆಗಳು ಹಣ ಪಾವತಿಸಬೇಕು ಎನ್ನುವ ಆಸ್ಪ್ರೇಲಿಯಾ ಸರಕಾರದ ಉದ್ದೇಶಿತ ನೀತಿ, ಕಳೆದ ಒಂದು ತಿಂಗಳಿಂದ ದೊಡ್ಡ ಸದ್ದು ಮಾಡಿದೆ. ಈ ಮಧ್ಯೆ, ಗೂಗಲ್‌ನ ಪ್ರತಿಕ್ರಿಯೆ ಹೊರಬಿದ್ದಿದೆ.

"ಆಸ್ಪ್ರೇಲಿಯಾದ ಹೊಸ ಕಾನೂನು ಜಾರಿಗೆ ಬಂದರೆ ವ್ಯವಹಾರ ನಡೆಸಲು ಕಷ್ಟವಾಗುತ್ತದೆ. ಆರ್ಥಿಕವಾಗಿಯೂ ನಷ್ಟವಾಗುತ್ತದೆ. ಹೀಗಾಗಿ, ಸರ್ಚ್‌ ಎಂಜಿನ್‌ ಸೇವೆಯನ್ನು ನಿಷೇಧಿಸುವುದು ಅನಿವಾರ್ಯವಾಗುತ್ತದೆ," ಎಂದು ಗೂಗಲ್‌ ಹೇಳಿದೆ.

ಇದಕ್ಕೆ ಆಸ್ಪ್ರೇಲಿಯಾ ಪ್ರಧಾನಿ ಸ್ಕಾಟ್‌ ಮಾರಿಸನ್‌ ಪ್ರತಿಕ್ರಿಯಿಸಿದ್ದು, "ನಿಮ್ಮ ಕಾರ್ಯಾಚರಣೆಗೆ ನಮ್ಮ ದೇಶವು ನಿಯಮವನ್ನು ರೂಪಿಸುತ್ತದೆ. ನಮ್ಮ ದೇಶಕ್ಕೆ ಬರುವ ಎಲ್ಲರಿಗೂ ಸ್ವಾಗತ. ಆದರೆ, ಬೆದರಿಕೆಗಳಿಗೆ ನಾವು ಉತ್ತರಿಸುವುದಿಲ್ಲ," ಎಂದು ಹೇಳಿದ್ದಾರೆ. "ಆಸ್ಪ್ರೇಲಿಯಾ ಜನರು ಮತ್ತು ಕಾನೂನುಪಾಲಕರಿಗೆ ಬ್ಲಾಕ್‌ಮೇಲ್‌ ಮಾಡಲು ಗೂಗಲ್‌ ಯತ್ನಿಸುತ್ತಿದೆ," ಎಂದು ಸೆನೆಟರ್‌ ಆ್ಯಂಡ್ರ್ಯೂ ಬ್ರ್ಯಾಗ್‌ ದೂರಿದ್ದಾರೆ.

ಜಾಹೀರಾತು ಆದಾಯಗಳಿಂದಲೇ ಗೂಗಲ್‌ ಸರ್ಚ್‌ ಎಂಜಿನ್‌ ಕಾರ್ಯ ನಿರ್ವಹಿಸುತ್ತಿದೆ. ದೊಡ್ಡ ಲಾಭವನ್ನೂ ಪಡೆಯುತ್ತಿದೆ.

ಗೂಗಲ್‌ ನಿರ್ಬಂಧದಿಂದ ಏನಾಗುತ್ತದೆ?

ಗೂಗಲ್‌ ತನ್ನ ಸರ್ಚ್‌ ಎಂಜಿನ್‌ ಅನ್ನು ಬಂದ್‌ ಮಾಡಿದರೆ, ಆಸ್ಪ್ರೇಲಿಯಾದ 1.9 ಕೋಟಿ ನೆಟ್‌ ಬಳಕೆದಾರರಿಗೆ ತೊಡಕಾಗುತ್ತದೆ. ಅಂತರ್ಜಾಲದಲ್ಲಿ ಅಗತ್ಯ ವಿಷಯಗಳನ್ನು ಹುಡುಕಲು ಕಷ್ಟವಾಗುತ್ತದೆ. ಯೂಟ್ಯೂಬ್‌ ಬಗೆಗೆ ಗೂಗಲ್‌ ಏನೂ ಹೇಳಿಲ್ಲ. ಆದರೆ, ಆ ಸೇವೆಗೂ ತಡೆ ಬೀಳಬಹುದು. ಜತೆಗೆ ಗೂಗಲ್‌ ಆಧಾರಿತ ಇತರೆ ಸೇವೆಗಳಿಂದ ಆಸ್ಪ್ರೇಲಿಯಾದ ಜನ ವಂಚಿತರಾಗಬೇಕಾಗುತ್ತದೆ.

ಏನದು ಹೊಸ ನೀತಿ?

ಗೂಗಲ್‌ ಸರ್ಚ್‌ ಎಂಜಿನ್‌ನಲ್ಲಿ ನಾನಾ ಮಾಧ್ಯಮ ಸಂಸ್ಥೆಗಳ ಸುದ್ದಿ, ವರದಿ ಅಥವಾ ಲೇಖನಗಳನ್ನು ಹುಡುಕಬಹುದು. ಇದಕ್ಕೆ ಪ್ರತಿಯಾಗಿ ಮಾಧ್ಯಮ ಸಂಸ್ಥೆಗಳಿಗೆ ಗೂಗಲ್‌ ಮತ್ತು ಇತರೆ ಟೆಕ್‌ ಕಂಪನಿಗಳು ಹಣ ಪಾವತಿಸಬೇಕು ಎನ್ನುವುದು ಆಸ್ಪ್ರೇಲಿಯಾ ಸರಕಾರದ ವಾದ. ಈ ಸಂಬಂಧ ಹೊಸ ಕಾನೂನಿಗೆ ಗೂಗಲ್‌ ತೀವ್ರ ವಿರೋಧ ವ್ಯಕ್ತಪಡಿಸಿದೆ. ಆಸ್ಪ್ರೇಲಿಯಾ ಪ್ರಸ್ತಾಪಿಸಿರುವ ನೀತಿಗೆ ಅಮೆರಿಕ ಸರಕಾರವೂ ಅಸಮಾಧಾನ ವ್ಯಕ್ತಪಡಿಸಿದೆ.

ಡಿಜಿಟಲ್‌ ಎಕಾನಮಿಗೆ ಹೊಂದಿಕೊಳ್ಳಲು ಹೆಣಗುತ್ತಿರುವ ಸ್ಥಳೀಯ ಮಾಧ್ಯಮ ಕಂಪನಿಗಳಿಗೆ ಅನುಕೂಲವಾಗುವಂತೆ ಆಸ್ಪ್ರೇಲಿಯಾ ಸರಕಾರವು ಹೊಸ ನೀತಿಯನ್ನು ರೂಪಿಸಿದೆ.

ಫ್ರಾನ್ಸ್‌ನಲ್ಲೂಕಿಚ್ಚು

ಫ್ರಾನ್ಸ್‌ನ ಮಾಧ್ಯಮಗಳಿಗೆ ಹಣ ಪಾವತಿಸುವ ಸಂಬಂಧ ಗೂಗಲ್‌ ಇತ್ತೀಚೆಗಷ್ಟೇ ಒಪ್ಪಂದ ಮಾಡಿಕೊಂಡಿದೆ. ಮಾಧ್ಯಮಗಳ ಕಂಟೆಂಟ್‌ಗೆ ಹಣ ಪಾವತಿ ಮತ್ತು ಹಕ್ಕುಸ್ವಾಮ್ಯದ ವಿಷಯವು ಇತ್ತೀಚೆಗೆ ಗೂಗಲ್‌ಗೆ ತಲೆನೋವಾಗಿದೆ.