ಏರ್‌ ಇಂಡಿಯಾ ಬಂಡವಾಳ ಹಿಂತೆಗೆತಕ್ಕೆ ನಿರ್ಧಾರ

ಹೊಸದಿಲ್ಲಿ : ಏರ್‌ ಇಂಡಿಯಾದ ಬಹು ನಿರೀಕ್ಷಿತ ಬಂಡವಾಳ ಹಿಂತೆಗೆತ ಪ್ರಕ್ರಿಯೆಗೆ ಚಾಲನೆ ನೀಡಲು ಕೇಂದ್ರ ಸರಕಾರ ಇದೀಗ ನಿರ್ಧರಿಸಿದೆ.

ಸರಕಾರದ ಬೆಂಬಲದ ನೆರವಿನಿಂದ ಏರ್‌ ಇಂಡಿಯಾದ ಹಾರಾಟ ಮತ್ತು ಹಣಕಾಸು ಪರಿಸ್ಥಿತಿಯಲ್ಲಿ ಸುಧಾರಣೆಯಾಗಿದ್ದು, ಬಂಡವಾಳ ಹಿಂತೆಗೆತಕ್ಕೆ ಕಾಲ ಪಕ್ವವಾಗಿದೆ ಎಂದು ಹಣಕಾಸು ಸಚಿವಾಲಯ ಗುರುವಾರ ತಿಳಿಸಿದೆ.

ಏರ್‌ ಇಂಡಿಯಾಗೆ ಕಾಯಕಲ್ಪ ನೀಡುವುದಕ್ಕೆ ಸಂಬಂಧಿಸಿದಂತೆ ರಚಿಸಿದ್ದ ಸಚಿವರುಗಳ ಉನ್ನತ ಮಟ್ಟದ ಸಮಿತಿ (ಎಐಎಸ್‌ಎಎಂ) 2018ರ ಮಾರ್ಚ್‌ನಲ್ಲಿ ನಡೆಸಿದ್ದ ಸಭೆಯಲ್ಲಿ, ಏರ್‌ ಇಂಡಿಯಾದ ಬಂಡವಾಳ ಹಿಂತೆಗೆತಕ್ಕೆ ಕಾಲ ಪಕ್ವವಾಗಿಲ್ಲ ಎಂದು ಸೂಚಿಸಿತ್ತು. ಆಗ ಕಚ್ಚಾ ತೈಲ ದರದ ಏರಿಳಿತ, ವಿದೇಶಿ ವಿನಿಮಯದ ಪ್ರತಿಕೂಲ ಪರಿಸ್ಥಿತಿ ತಲೆದೋರಿತ್ತು. ಆದರೆ ಅದು ಕಳೆದ ವರ್ಷದ ಪರಿಸ್ಥಿತಿಯಾಗಿತ್ತು. ಈಗ ಸನ್ನಿವೇಶ ಸುಧಾರಿಸಿದೆ ಎಂದು ಸಚಿವಾಲಯ ತಿಳಿಸಿದೆ.

ಎಐಎಸ್‌ಎಎಂನಲ್ಲಿ ಈ ಹಿಂದೆ ಸಚಿವರಾಗಿದ್ದ ಅರುಣ್‌ ಜೇಟ್ಲಿ, ಸುರೇಶ್‌ ಪ್ರಭು ಇದ್ದರು. ಹೊಸ ಸರಕಾರದ ಅಡಿಯಲ್ಲಿ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಮತ್ತು ನಾಗರಿಕ ವಿಮಾನಯಾನ ಸಚಿವ ಹರ್‌ದೀಪ್‌ ಸಿಂಗ್‌ ಪುರಿ ಇರಲಿದ್ದಾರೆ. ಸಾರಿಗೆ ಸಚಿವ ನಿತಿನ್‌ ಗಡ್ಕರಿ ಸೇರ್ಪಡೆಯಾಗುವ ಸಾಧ್ಯತೆ ಇದೆ.

ಆರ್ಥಿಕ ವ್ಯವಹಾರಗಳ ಕೇಂದ್ರ ಸಚಿವ ಸಂಪುಟ ಉಪಸಮಿತಿಯು 2017ರ ಜೂನ್‌ 28ರಂದು ಏರ್‌ ಇಂಡಿಯಾ ಹಾಗೂ ಅದರ 5 ಅಧೀನ ಕಂಪನಿಗಳಿಂದ ಬಂಡವಾಳ ಹಿಂತೆಗೆತಕ್ಕೆ ತಾತ್ವಿಕ ಅನುಮೋದನೆ ನೀಡಿತ್ತು.