ಹೊಸದಿಲ್ಲಿ: ಸರಕಾರ 2018-19ರ ಬಜೆಟ್ನಲ್ಲಿ ಆದಾಯ ತೆರಿಗೆಯ ಶ್ರೇಣಿಗಳನ್ನು ಪರಿಷ್ಕರಣೆ ಮಾಡುವ ಸಾಧ್ಯತೆ ಇದೆ. ಈ ಮೂಲಕ ಜನತೆಗೆ ತೆರಿಗೆ ಹೊರೆಯನ್ನು ತಗ್ಗಿಸುವ ನಿರೀಕ್ಷೆ ಇದೆ ಎಂದು ತೆರಿಗೆ ಕನ್ಸಲ್ಟೆಂಟ್ ಇವೈ ಸಂಸ್ಥೆ ನಡೆಸಿದ ಸಮೀಕ್ಷೆಯ ವರದಿ ತಿಳಿಸಿದೆ.
ಸಂಸ್ಥೆ ನಡೆಸಿದ ಬಜೆಟ್ ಪೂರ್ವ ಸಮೀಕ್ಷೆ ಪ್ರಕಾರ, ಸಂದರ್ಶಿಸಿದವರಲ್ಲಿ ಶೇ.60ರಷ್ಟು ಮಂದಿ, ಆದಾಯ ತೆರಿಗೆ ವಿನಾಯಿತಿಯ ಮಿತಿಯನ್ನು ಸರಕಾರ ವಿಸ್ತರಿಸುವ ಸಂಭವ ಇದೆ. ಇದರಿಂದ ತೆರಿಗೆದಾರರ ಕೈಯಲ್ಲಿ ದುಡ್ಡು ಉಳಿಯಲಿದೆ. ಶೇ.59ರಷ್ಟು ಮಂದಿ, ಅಪ್ರಸ್ತುತವೆನ್ನಿಸಿರುವ ಹಲವು ತೆರಿಗೆ ಕಡಿತಗಳನ್ನು ರದ್ದುಪಡಿಸಿ, ಸ್ಟ್ಯಾಂಡರ್ಡ್ ಆಗಿರುವಂಥ ತೆರಿಗೆ ಕಡಿತಗಳನ್ನು ನೀಡಬೇಕು ಎಂದು ಹೇಳಿದ್ದಾರೆ. ಹಣಕಾಸು ಸಚಿವ ಅರುಣ್ ಜೇಟ್ಲಿಯವರು ಕಾರ್ಪೊರೇಟ್ ತೆರಿಗೆಯನ್ನು ಶೇ.25ಕ್ಕೆ ತಗ್ಗಿಸಬಹುದು ಎಂದೂ ಶೇ.48 ಮಂದಿ ಭಾವಿಸಿದ್ದಾರೆ.