ದೇಶದ 5ಜಿ ವೆಂಡರ್ಸ್‌ ಆಯ್ಕೆಯಲ್ಲಿ ಚೀನಾ ಕಂಪನಿಗಳಿಗೆ ಹಿನ್ನಡೆ!

ಹೊಸದಿಲ್ಲಿ: ಅಮೆರಿಕದ ದೂರಸಂಪರ್ಕ ಇಲಾಖೆಯು ಚೀನಾ ಮೂಲದ ಟೆಲಿಕಾಂ ವೆಂಡರ್‌ಗಳಾದ ಹುವಾಯ್‌ ಮತ್ತು ಝಡ್‌ಟಿಇಯನ್ನು 'ರಾಷ್ಟ್ರೀಯ ಭದ್ರತಾ ರಿಸ್ಕ್‌' ಎಂಬ ಕಾರಣದಿಂದ ದೂರವಿಟ್ಟಿರುವ ಬೆನ್ನಲ್ಲೇ, ಡೇಟಾ ಕಳ್ಳತನ ಮತ್ತು ಭದ್ರತೆಯ ವಿಚಾರಗಳು 5ಜಿ ವೆಂಡರ್ಸ್‌ ಆಯ್ಕೆ ಪ್ರಕ್ರಿಯೆಯಲ್ಲಿ ನಿರ್ಣಾಯಕವಾಗಲಿದೆ ಎಂದು ಭಾರತದಲ್ಲೂ ಹಿರಿಯ ಸರಕಾರಿ ಅಧಿಕಾರಿಗಳು ತಿಳಿಸಿದ್ದಾರೆ.

ಭಾರತದಲ್ಲಿ ಮುಂದಿನ ಹಂತದ ಡಿಜಟಲ್‌ ಕ್ರಾಂತಿಯಲ್ಲಿ 5ಜಿ ಮಹತ್ವದ ಸ್ಥಾನ ಪಡೆಯಲಿದೆ. ಆದರೆ, ಡೇಟಾ ಸುರಕ್ಷತೆ, ರಾಷ್ಟ್ರೀಯ ಭದ್ರತೆ ವಿಚಾರಗಳು ನಿರ್ಧಾರ ತೆಗೆದುಕೊಳ್ಳುವ ನಿಟ್ಟಿನಲ್ಲಿ ಪ್ರಮುಖ ಅಂಶಗಳಾಗಲಿವೆ.

ಚೀನಾ ಮೂಲದ ಹುವಾಯ್‌ ಮತ್ತು ಝಡ್‌ ಟಿಇ ಟೆಲಿಕಾಂ ಕಂಪನಿಗಳು ಚೀನಾದ ಪೀಪಲ್ಸ್‌ ಲಿಬರೇಷನ್‌ ಆರ್ಮಿಯ ಪ್ರಭಾವಕ್ಕೀಡಾಗಿ ಕಾರ್ಯ ನಿರ್ವಹಿಸುತ್ತಿವೆ ಎಂಬ ಗುಮಾನಿ ಅಮೆರಿಕದಲ್ಲಿದೆ. ಒಂದು ವೇಳೆ ಭಾರತದಲ್ಲೂ 5ಜಿ ವೆಂಡರ್ಸ್‌ ಆಯ್ಕೆಯಲ್ಲಿ ಚೀನಾ ಕಂಪನಿಗೆ ನಿರ್ಬಂಧ ವಿಧಿಸಿದರೆ, ಚೀನಾದ 59 ಆ್ಯಪ್‌ಗಳಿಗೆ ನಿಷೇಧಿಸಿದ್ದಕ್ಕಿಂತಲೂ ಬಹು ದೊಡ್ಡ ಪರಿಣಾಮ ಬೀರಲಿದೆ.

ಚೀನಾ ಕಂಪನಿಗಳ ಮೊಬೈಲ್‌ ಉತ್ಪಾದನೆಗೆ ಭಾರೀ ಹೊಡೆತ ನೀಡಿದ ಭಾರತ!

ಟ್ರಂಪ್‌ ಸರಕಾರವು ಅಮೆರಿಕದ ಟೆಲಿಕಾಂ ಕಂಪನಿಗಳಿಗೆ ಚೀನಾದಿಂದ ಟೆಲಿಕಾಂ ಸಲಕರಣೆಗಳನ್ನು ಖರೀದಿ ಮಾಡದಿರುವಂತೆ ಸೂಚಿಸಿದೆ. ಅಮೆರಿಕಕ್ಕಿಂತಲೂ ಮೊದಲು ಆಸ್ಪ್ರೇಲಿಯಾ ಚೀನಾದ 5ಜಿ ಸಾಧನಗಳಿಗೆ ನಿಷೇಧಿಸಿತ್ತು. ಬ್ರಿಟನ್‌, ಜರ್ಮನಿ ಕೂಡ ಇದೇ ಹಾದಿಯಲ್ಲಿದೆ.

ಭಾರತದಲ್ಲೂಮೂಲಗಳ ಪ್ರಕಾರ, ವೆಚ್ಚಕ್ಕಿಂತ ರಾಷ್ಟ್ರೀಯ ಭದ್ರತೆ ಮತ್ತು ಡೇಟಾ ಸುರಕ್ಷತೆಯೇ 5ಜಿ ವೆಂಡರ್ಸ್‌ ಆಯ್ಕೆಯಲ್ಲಿನಿರ್ಣಾಯಕವೆನಿಸಲಿವೆ.