ಎಲ್‌ಐಸಿಯ ಶೇ.25ರಷ್ಟು ಷೇರು ಮಾರಾಟಕ್ಕೆ ಸಿದ್ಧತೆ ಆರಂಭಿಸಿದ ಕೇಂದ್ರ ಸರಕಾರ

ಹೊಸದಿಲ್ಲಿ: ಕೇಂದ್ರ ಸರಕಾರ ಲೈಫ್‌ ಇನ್ಶೂರೆನ್ಸ್‌ ಕಾರ್ಪೊರೇಷನ್‌ (ಎಲ್‌ಐಸಿ)ಯ ಶೇ.25ರಷ್ಟು ಷೇರು ಮಾರಾಟಕ್ಕೆ ಚಿಂತನೆ ನಡೆಸಿದ್ದು, ಇದಕ್ಕೆ ಸಂಪುಟದ ಒಪ್ಪಿಗೆ ಪಡೆಯಲು ಆಲೋಚಿಸಿದೆ.

ಇದಕ್ಕಾಗಿ ಎಲ್‌ಐಸಿ ಕಾಯಿದೆಗೆ ತಿದ್ದುಪಡಿ ತರಲು ಕೇಂದ್ರ ಸರಕಾರ ಮುಂದಾಗಿದೆ. ಮಾರುಕಟ್ಟೆ ಪರಿಸ್ಥಿತಿ ನೋಡಿಕೊಂಡು ಷೇರು ಮಾರುಕಟ್ಟೆ ಪ್ರವೇಶಿಸುವ ಬಗ್ಗೆ ಮತ್ತು ಷೇರು ಮಾರಾಟದ ಪ್ರಮಾಣದ ಬಗ್ಗೆ ಕೇಂದ್ರ ಸರಕಾರ ನಿರ್ಧಾರ ತೆಗೆದುಕೊಳ್ಳಲಿದೆ. ಮತ್ತು ಹಂತ ಹಂತವಾಗಿ ಷೇರುಗಳ ಮಾರಾಟ ನಡೆಯಲಿದೆ.

ಕೊರೊನಾ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ 2021ರ ಮಾರ್ಚ್‌ಗೆ ಅಂತ್ಯವಾಗಲಿರುವ ಹಣಕಾಸು ವರ್ಷದಲ್ಲಿ ಸರಕಾರ ಅಂದುಕೊಂಡಿದ್ದ ಶೇ. 3.5 ಹಣಕಾಸು ಕೊರತೆಯ ಗುರಿಯು ಮೀರುವ ಸಾಧ್ಯತೆ ಇದೆ. ಈಗಾಗಲೇ ಸರಕಾರ ತನ್ನ ಆಸ್ತಿಗಳ ಮಾರಾಟದ ಮೂಲಕ 2.1 ಲಕ್ಷ ಕೋಟಿ ರೂಪಾಯಿ ಹೊಂದಿಸುವ ಗುರಿ ಹೊಂದಿದ್ದು ಇಲ್ಲಿಯವರೆಗೆ ಕೇವಲ 5,700 ಕೋಟಿ ರೂಪಾಯಿ ಸಂಗ್ರಹಿಸಿದೆ.

ಸರಕಾರದಿಂದ ಎಲ್‌ಐಸಿಯ ಶೇ. 25 ರಷ್ಟು ಷೇರು ಮಾರಾಟ ಸಾಧ್ಯತೆ, ಖರೀದಿದಾರರಿಗೆ ಭರ್ಜರಿ ಡಿಸ್ಕೌಂಟ್‌!
ಎಲ್‌ಐಸಿಯ ಷೇರು ಮಾರಾಟಕ್ಕೆ ಸರಕಾರ ಡೆಲಾಯ್ಟ್ ಟೌಚೆ ತೋಹ್ಮಾಟ್ಸು ಇಂಡಿಯಾ ಲಿಮಿಟೆಡ್ ಮತ್ತು ಎಸ್‌ಬಿಐ ಕ್ಯಾಪಿಟಲ್‌ ಮಾರ್ಕೆಟ್ಸ್‌ ಲಿ.ನ್ನು ಆಯ್ಕೆ ಮಾಡಿಕೊಂಡಿದೆ ಎಂದು ಬ್ಲೂಂಬರ್ಗ್‌ ಕಳೆದ ತಿಂಗಳು ವರದಿ ಮಾಡಿತ್ತು.

ಇದೀಗ ಸರಕಾರದ ಪ್ರಸ್ತಾವನೆ ಪ್ರಕಾರ 20,000 ಕೋಟಿ ರೂಪಾಯಿ ಮೊತ್ತದ ಷೇರು ಮಾರಾಟಕ್ಕಾಗಿ ತಿದ್ದುಪಡಿ ಮಸೂದೆಯನ್ನು ಸಂಸತ್‌ನಲ್ಲಿ ಮಂಡಿಸಲು ಉದ್ದೇಶಿಸಲಾಗಿದೆ. ಈ 20,000 ಕೋಟಿ ರೂಪಾಯಿಗಳನ್ನು 2,000 ಕೋಟಿ ಷೇರುಗಳಾಗಿ ವಿಭಾಗಿಸಲಾಗುತ್ತದೆ.

ಆಸ್ತಿ ಮಾರಾಟಕ್ಕಾಗಿ ಸ್ಥಾಪಿಸಲಾದ ಮಂತ್ರಿಮಂಡಲವು ಎಲ್‌ಐಸಿಯ ಸಾರ್ವಜನಿಕ ಷೇರು ಮಾರಾಟದ ಗಾತ್ರವನ್ನು ನಿರ್ಧರಿಸಲಿದೆ ಮತ್ತು ವಿಮಾ ಕಂಪನಿಯ ಬಂಡವಾಳ ರಚನೆಯಲ್ಲಿನ ಬದಲಾವಣೆಗಳನ್ನು ಕ್ಯಾಬಿನೆಟ್ ಪರಿಗಣಿಸಲಿದೆ. ವಿಮಾ ಕಂಪನಿಯನ್ನು ಸಾರ್ವಜನಿಕವಾಗಿ ತೆಗೆದುಕೊಂಡು ಹೋಗುವುದರಿಂದ ಕಂಪನಿಗೆ ಶಿಸ್ತು ಬರಲಿದೆ ಮತ್ತು ಕಂಪನಿಯ ಮೌಲ್ಯವನ್ನು ಪತ್ತೆ ಹಚ್ಚಲು ಸಹಾಯವಾಗುತ್ತದೆ ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಫೆಬ್ರವರಿಯಲ್ಲಿ ಹೇಳಿದ್ದರು.