ಏರ್‌ ಇಂಡಿಯಾದ ಶೇ.100 ಷೇರು ವಿಕ್ರಯಕ್ಕೆ ಸರಕಾರ ಚಿಂತನೆ

ಹೊಸದಿಲ್ಲಿ : ಕೇಂದ್ರ ಸರಕಾರ ನಷ್ಟದಲ್ಲಿರುವ ಏರ್‌ ಇಂಡಿಯಾವನ್ನು ಮಾರಾಟ ಮಾಡುವ ಸಲುವಾಗಿ, ಶೇ.100ರಷ್ಟು ಷೇರುಗಳನ್ನೂ ವಿಕ್ರಯಿಸಲು ಚಿಂತನೆ ನಡೆಸಿದೆ. ಸರಕಾರ ಶೀಘ್ರದಲ್ಲಿಯೇ ಹೊಸ ಮಾರ್ಗದರ್ಶಿ ಸಿದ್ಧಪಡಿಸಲಿದ್ದು, ಕಳೆದ ತಿಂಗಳು ನಡೆಸಿದ ಯತ್ನ ವಿಫಲವಾಗಿರುವುದು ಇದಕ್ಕೆ ಕಾರಣ ಎನ್ನಲಾಗಿದೆ.

ಕೇಂದ್ರ ಸರಕಾರ ಏರ್‌ ಇಂಡಿಯಾದ ಖಾಸಗೀಕರಣ ಪ್ರಕ್ರಿಯೆಯ ಬಗ್ಗೆ ಮರು ಪರಿಶೀಲಿಸಲಿದ್ದು, ಏರ್‌ ಇಂಡಿಯಾದಲ್ಲಿ ತನ್ನ ಷೇರುಗಳನ್ನು ಇಡಬೇಕೇ, ಬೇಡವೇ ಎಂಬುದರ ಬಗ್ಗೆ ಮರು ಪರಿಶೀಲಿಸಲಿದೆ ಎಂದು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

ಕೇಂದ್ರ ಸರಕಾರ ಏರ್‌ ಇಂಡಿಯಾದಲ್ಲಿ ಶೇ.24ರಷ್ಟು ಷೇರುಗಳನ್ನು ಇಟ್ಟುಕೊಂಡು, ಉಳಿದ ಷೇರುಗಳನ್ನು ಮಾರಾಟ ಮಾಡಲು ಯತ್ನಿಸಿತ್ತು. ಆದರೆ ಖರೀದಿದಾರರು ಮುಂದೆ ಬಂದಿರಲಿಲ್ಲ. ಹೀಗಾಗಿ ಕೇಂದ್ರ ಸರಕಾರ ಶೇ.100ರಷ್ಟು ಷೇರುಗಳನ್ನೂ ವಿಕ್ರಯಿಸಲು ಚಿಂತನೆ ಮಾಡಿದೆ.

2017ರ ಮಾರ್ಚ್‌ ವೇಳೆಗೆ ಏರ್‌ ಇಂಡಿಯಾ 48,000 ಕೋಟಿ ರೂ. ಸಾಲವನ್ನು ಹೊಂದಿದೆ. ಮೇ 31ರಂದು ಬಂಡವಾಳ ಹಿಂತೆಗೆತ ಪ್ರಕ್ರಿಯೆ ನಡೆದರೂ, ಯಾರೊಬ್ಬ ಹೂಡಿಕೆದಾರರೂ ಮುಂದೆ ಬಂದಿರಲಿಲ್ಲ. ಹೀಗಾಗಿ ಇಡೀ ಪ್ರಕ್ರಿಯೆಗೆ ಭಾರಿ ಹಿನ್ನಡೆ ಉಂಟಾಗಿತ್ತು. ಇಂಡಿಗೊ ಏರ್‌ಲೈನ್‌ ಆರಂಭದಲ್ಲಿ ಏರ್‌ ಇಂಡಿಯಾ ಸ್ವಾಧೀನಪಡಿಸಿಕೊಳ್ಳಲು ಆಸಕ್ತಿ ವಹಿಸಿದರೂ, ನಂತರ ನಿರಾಸಕ್ತಿ ತೋರಿತ್ತು.