ಇಪಿಎಫ್‌ ಬಡ್ಡಿ ದರ ಶೇ. 8.65ಕ್ಕೆ ಏರಿಕೆ

ಹೊಸದಿಲ್ಲಿ: 2018-19ನೇ ಸಾಲಿಗೆ ಪಿಎಫ್‌ ಬಡ್ಡಿ ದರವನ್ನು ಶೇ.0.10ರಷ್ಟು ಏರಿಸಿದ್ದು, ಬಡ್ಡಿ ದರವು ಈಗ ಶೇ.8.65ಕ್ಕೆ ಮುಟ್ಟಿದೆ. ಸಂಘಟಿತ ವಲಯದ 6 ಕೋಟಿಗೂ ಅಧಿಕ ಉದ್ಯೋಗಿಗಳಿಗೆ ಇದರ ಲಾಭ ದೊರೆಯಲಿದೆ. ಕಳೆದ 2017-18ರಲ್ಲಿ ಶೇ.8.55 ಬಡ್ಡಿ ದರ ನಿಗದಿಯಾಗಿತ್ತು.

ಕಳೆದ ಮೂರು ವರ್ಷಗಳಲ್ಲಿ ಇದು ಮೊದಲ ಏರಿಕೆಯಾಗಿದೆ. ಹೊಸ ಬಡ್ಡಿ ದರವನ್ನು ಒದಗಿಸಲು ಇಪಿಎಫ್‌ಒ 151 ಕೋಟಿ ರೂ. ಹೆಚ್ಚುವರಿ ಮೊತ್ತವನ್ನು ತೆಗೆದಿರಿಸಬೇಕಿದೆ.

ಬಡ್ಡಿ ದರ ಹೆಚ್ಚಿಸಬೇಕು ಎನ್ನುವ ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ(ಇಪಿಎಫ್‌ಒ) ಪ್ರಸ್ತಾವನೆಗೆ ಹಣಕಾಸು ಸಚಿವಾಲಯವು ಅನುಮೋದನೆ ನೀಡಿದೆ. ಬಡ್ಡಿ ದರ ಏರಿಸುವ ತೀರ್ಮಾನವನ್ನು ಇಪಿಎಫ್‌ಒನ ಕೇಂದ್ರೀಯ ಟ್ರಸ್ಟಿಗಳ ಮಂಡಳಿ ಫೆಬ್ರವರಿಯಲ್ಲಿ ಕೈಗೊಂಡಿತ್ತು.

2015-16ರಲ್ಲಿ ಶೇ.8.8ರ ಬಡ್ಡಿಯನ್ನು ನೀಡಲಾಗುತ್ತಿತ್ತು. ಅದನ್ನು 2016-17ರಲ್ಲಿ ಶೇ.8.65ಕ್ಕೆ ಇಳಿಸಲಾಗಿತ್ತು. ಬಳಿಕ 2017-18ರಲ್ಲಿ ಶೇ.8.55ಕ್ಕೆ ಇಳಿಸಲಾಗಿತ್ತು.