12 ಬ್ಯಾಂಕ್‌ಗಳಿಗೆ ಸರಕಾರದಿಂದ 48,000 ಕೋಟಿ ರೂ. ಮರು ಬಂಡವಾಳ

ಹೊಸದಿಲ್ಲಿ: ಪ್ರಸಕ್ತ ಹಣಕಾಸು ವರ್ಷದಲ್ಲಿ ಸರಕಾರಿ ಸ್ವಾಮ್ಯದ 12 ಬ್ಯಾಂಕ್‌ಗಳಿಗೆ 48,239 ಕೋಟಿ ರೂ. ಮರು ಬಂಡವಾಳ ಪೂರೈಸುವುದಾಗಿ ಕೇಂದ್ರ ಹಣಕಾಸು ಸಚಿವಾಲಯ ಬುಧವಾರ ಪ್ರಕಟಿಸಿದೆ.

ವಸೂಲಾಗದ ಸಾಲಗಳ ಹೊರೆಯಿಂದ ಬ್ಯಾಂಕ್‌ಗಳು ತತ್ತರಿಸಿದ್ದು ಸರಕಾರದ ಮರು ಬಂಡವಾಳ ಪೂರೈಕೆಯಿಂದ ಅನುಕೂಲವಾಗಲಿದೆ. ಆರ್ಥಿಕ ಬೆಳವಣಿಗೆಯ ಯೋಜನೆ ಜಾರಿಗೊಳಿಸಲು ಮತ್ತು ಬಂಡವಾಳ ಕೊರತೆ ಸರಿದೂಗಿಸಿಕೊಳ್ಳಲು ಬ್ಯಾಂಕ್‌ಗಳು ಈ ಹಣವನ್ನು ಬಳಸಿಕೊಳ್ಳಲಿವೆ.

''ಕಾರ್ಪೊರೇಷನ್‌ ಬ್ಯಾಂಕ್‌ಗೆ 9,089 ಕೋಟಿ ರೂ., ಅಲಹಾಬಾದ್‌ ಬ್ಯಾಂಕ್‌ಗೆ 6,896 ಕೋಟಿ ರೂ. ಹಣವನ್ನು ವಿತರಿಸಲಾಗುವುದು. ಕಾರ್ಯಕ್ಷಮತೆ ಹೆಚ್ಚಿಸುವ ಕ್ಷಿಪ್ರ ಪ್ರಕ್ರಿಯೆಯನ್ನು ಆರ್‌ಬಿಐ ನಿಗಾದಲ್ಲಿ ಜಾರಿಗೊಳಿಸಲಾಗಿದ್ದು, ಈ ಎರಡು ಬ್ಯಾಂಕ್‌ಗಳ ಕಾರ್ಯ ನಿರ್ವಹಣೆ ಪ್ರಸ್ತುತ ಸುಧಾರಿಸಿದೆ. ಸರಕಾರದ ಒಟ್ಟು ಬಂಡವಾಳ ಪೂರೈಕೆಯಲ್ಲಿ ಈ ಎರಡು ಬ್ಯಾಂಕ್‌ಗಳೇ ಶೇ.33ರಷ್ಟನ್ನು(15,982 ಕೋಟಿ ರೂ.) ಪಡೆದಿವೆ,'' ಎಂದು ಹಣಕಾಸು ಸೇವೆಗಳ ಕಾರ್ಯದರ್ಶಿ ರಾಜೀವ್‌ ಕುಮಾರ್‌ ಹೇಳಿದ್ದಾರೆ.

ಸೆಂಟ್ರಲ್‌ ಬ್ಯಾಂಕ್‌ ಆಫ್‌ ಇಂಡಿಯಾ, ಯುನೈಟೆಡ್‌ ಬ್ಯಾಂಕ್‌, ಯುಕೊ ಬ್ಯಾಂಕ್‌ ಮತ್ತು ಇಂಡಿಯನ್‌ ಓವರ್‌ಸಿಸ್‌ ಬ್ಯಾಂಕ್‌ ಸೇರಿದಂತೆ ನಾಲ್ಕು ಬ್ಯಾಂಕ್‌ಗಳಿಗೆ 12,535 ಕೋಟಿ ರೂ. ಬಂಡವಾಳವನ್ನು ಸರಕಾರ ಪೂರೈಸಲಿದೆ.

ಕಳೆದ ಡಿಸೆಂಬರ್‌ನಲ್ಲಿ ಸರಕಾರವು ಸರಕಾರಿ ಸ್ವಾಮ್ಯದ 7 ಬ್ಯಾಂಕ್‌ಗಳಿಗೆ ಮರುಬಂಡವಾಳದ ಬಾಂಡ್‌ಗಳ ಮೂಲಕ 28,615 ಕೋಟಿ ರೂ. ವಿತರಿಸಿತ್ತು.

ಯಾವ ಬ್ಯಾಂಕ್‌ಗೆ ಎಷ್ಟೆಷ್ಟು?
ಕಾರ್ಪೊರೇಷನ್‌ ಬ್ಯಾಂಕ್‌ 9,089 ಕೋಟಿ ರೂ.
ಅಲಹಾಬಾದ್‌ ಬ್ಯಾಂಕ್‌ 6,896 ಕೋಟಿ ರೂ.
ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ 5,908 ಕೋಟಿ ರೂ.
ಬ್ಯಾಂಕ್‌ ಆಫ್‌ ಇಂಡಿಯಾ 4,368 ಕೋಟಿ ರೂ.
ಯೂನಿಯನ್‌ ಬ್ಯಾಂಕ್‌ ಆಫ್‌ ಇಂಡಿಯಾ 4,112 ಕೋಟಿ ರೂ.
ಆಂಧ್ರ ಬ್ಯಾಂಕ್‌ 3,256 ಕೋಟಿ ರೂ.
ಸಿಂಡಿಕೇಟ್‌ ಬ್ಯಾಂಕ್‌ 1,603 ಕೋಟಿ ರೂ.
ಬ್ಯಾಂಕ್‌ ಆಫ್‌ ಮಹಾರಾಷ್ಟ್ರ 205 ಕೋಟಿ ರೂ.