ಹೊಸದಿಲ್ಲಿ: ಭೀಮ್ ಆ್ಯಪ್ ಮುಖಾಂತರ ಹಣವನ್ನು ಸ್ವೀಕರಿಸಲು ಮತ್ತು ಟಿಕೆಟ್ ಕಾಯ್ದಿಡುವ ಅವಕಾಶವನ್ನು ಭಾರತೀಯ ರೈಲ್ವೆ ಈಗ ನೀಡಿದೆ.
ನ್ಯಾಷನಲ್ ಪೇಮೆಂಟ್ ಕಾರ್ಪೊರೇಷನ್ ಆಫ್ ಇಂಡಿಯಾ ಅಭಿವೃದ್ಧಿ ಪಡಿಸಿದ ಸರಕಾರದ ಭೀಮ್ ಆ್ಯಪ್ಗೆ ಹೆಚ್ಚಿನ ಸೇವೆಗಳನ್ನು ಸೇರಿಸಲಾಗುತ್ತಿದೆ. ಇದೀಗ, ರೈಲ್ವೆ ಟಿಕೆಟ್ ಅನ್ನು ಭೀಮ್ ಆ್ಯಪ್ ಮೂಲಕ ಕಾಯ್ದಿಡುವ ಮತ್ತು ಹಣ ಪಾವತಿಸುವ ಸೌಲಭ್ಯವನ್ನು ಡಿ.1ರಿಂದಲೇ ಜಾರಿಗೆ ತರಲಾಗಿದೆ.
''ಮೂರು ತಿಂಗಳ ಕಾಲ ಈ ಸೌಲಭ್ಯಕ್ಕೆ ಯಾವುದೇ ಶುಲ್ಕ ಇರುವುದಿಲ್ಲ. ಭೀಮ್ ಆ್ಯಪ್ನಲ್ಲಿ ಬ್ಯಾಂಕ್ ಖಾತೆ ಅಥವಾ ಕ್ರೆಡಿಟ್/ಡೆಬಿಟ್ ಕಾರ್ಡ್ ಸಂಖ್ಯೆಗಳ ಹಂಚಿಕೊಳ್ಳುವ ಅಗತ್ಯವಿಲ್ಲ. ಹೀಗಾಗಿ ಇದೊಂದು ಸುರಕ್ಷಿತ ಪಾವತಿ ವಿಧಾನ,'' ಎಂದು ರೈಲ್ವೆ ಸಚಿವಾಲಯ ಹೇಳಿದೆ.