ಇನ್ನೆರಡು ವರ್ಷಗಳಲ್ಲಿ ರಾಷ್ಟ್ರೀಯ ಹೆದ್ದಾರಿಗಳು ಟೋಲ್‌ ಪ್ಲಾಜಾ ಮುಕ್ತ - ಗಡ್ಕರಿ ಭರವಸೆ

ಹೊಸದಿಲ್ಲಿ: ಟೋಲ್‌ ಪ್ಲಾಜಾಗಳಲ್ಲಿ ಟೋಲ್‌ ಕಟ್ಟುವ ದೇಶದಲ್ಲಿ ಇನ್ನೆರಡು ವರ್ಷಗಳಲ್ಲಿ ಜಿಪಿಎಸ್‌ ಆಧಾರಿತ ಟೋಲ್‌ ಸಂಗ್ರಹ ವ್ಯವಸ್ಥೆ ಜಾರಿಯಾಗಲಿದ್ದು, ಎಲ್ಲ ಟೋಲ್‌ ಪ್ಲಾಜಾಗಳನ್ನು ತೆರವುಗೊಳಿಸಲು ಯೋಜನೆ ಅಂತಿಮವಾಗಿದೆ ಎಂದು ಸಾರಿಗೆ ಸಚಿವ ನಿತಿನ್‌ ಗಡ್ಕರಿ ತಿಳಿಸಿದ್ದಾರೆ.

ಇದರಿಂದಾಗಿ ವಾಹನಗಳಿಗೆ ಅಡೆ ತಡೆ ಇಲ್ಲದೆ ದೇಶದುದ್ದಕ್ಕೂ ಸಂಚರಿಸಬಹುದು. ಟೋಲ್‌ ಮೊತ್ತವು ವಾಹನ ಮಾಲೀಕರ ಬ್ಯಾಂಕ್‌ ಖಾತೆಯಿಂದ ನೇರವಾಗಿ ಕಡಿತವಾಗಲಿದೆ ಎಂದು ಸಚಿವರು ತಿಳಿಸಿದರು.

2021 ಮಾರ್ಚ್‌ ವೇಳೆಗೆ ಟೋಲ್‌ ಸಂಗ್ರಹವು 34,000 ಕೋಟಿ ರೂ.ಗೆ ಏರಿಕೆಯಾಗುವ ನಿರೀಕ್ಷೆ ಇದೆ. ಜಿಪಿಎಸ್‌ ಬಳಸುವುದರಿಂದ ಮುಂದಿನ 5 ವರ್ಷಗಳಲ್ಲಿ 1.34 ಲಕ್ಷ ಕೋಟಿ ರೂ. ಟೋಲ್‌ ಸಂಗ್ರಹಿಸಬಹುದು. ತಂತ್ರಜ್ಞಾನ ಬಳಕೆಯಿಂದ ಟೋಲ್‌ ಸಂಗ್ರಹದಲ್ಲಿ ಸೋರಿಕೆ ಇರಲಾರದು ಎಂದು ನಿತಿನ್‌ ಗಡ್ಕರಿ ವಿವರಿಸಿದರು.

ಈಗಾಗಲೇ ಫಾಸ್ಟ್‌ಟ್ಯಾಗ್‌ ರೂಪದಲ್ಲಿ ತಡೆರೆಹಿತ ಟೋಲ್‌ ಸಂಗ್ರಹ ವ್ಯವಸ್ಥೆ ಜಾರಿಯಲ್ಲಿದೆ. ಇದು ಜಾರಿಯಾಗಿ ಕೇವಲ ಒಂದು ವರ್ಷ ಕಳೆದಿದ್ದು, ಇದೀಗ ಮುಂದಿನ ಎರಡು ವರ್ಷದಲ್ಲಿ ಟೋಲ್‌ ಪ್ಲಾಜಾ ಮುಕ್ತ ಜಿಪಿಎಸ್‌ ಆಧಾರಿತ ಟೋಲ್‌ ಸಂಗ್ರಹ ವ್ಯವಸ್ಥೆ ಜಾರಿಯಾಗಲಿದೆ ಎಂದು ನಿತಿನ್‌ ಗಡ್ಕರಿ ಹೇಳಿದ್ದಾರೆ.