ಗ್ರಾಚ್ಯುಟಿ ಅರ್ಹತೆಯ ಸೇವಾ ಅವಧಿ 3 ವರ್ಷಕ್ಕೆ ಕಡಿತ ಸಂಭವ

ಹೊಸದಿಲ್ಲಿ: ಸಂಘಟಿತ ವಲಯದ ಉದ್ಯೋಗಿಗಳಿಗೆ ನೀಡಲಾಗುವ ಗ್ರಾಚ್ಯುಟಿಯ ಅರ್ಹತಾ ಸೇವಾ ಅವಧಿಯನ್ನು ಈಗಿನ 5 ವರ್ಷದಿಂದ 3 ವರ್ಷಕ್ಕೆ ಇಳಿಸಲು ಕೇಂದ್ರ ಸರಕಾರ ಮುಂದಾಗಿದೆ. ಈ ಸಂಬಂಧ ಪ್ರಸ್ತಾವನೆಯನ್ನು ಸರಕಾರ ಅಂಗೀಕರಿಸುವ ಸಾಧ್ಯತೆಗಳಿವೆ ಎಂದು ಮೂಲಗಳು ಹೇಳಿವೆ. ಇದು ಜಾರಿಗೆ ಬಂದರೆ, ಸಂಘಟಿತ ವಲಯದ ಲಕ್ಷಾಂತರ ಉದ್ಯೋಗಿಗಳಿಗೆ ಅನುಕೂಲವಾಗಲಿದೆ. ಪ್ರಸ್ತುತ ಒಂದು ಸಂಸ್ಥೆಯಲ್ಲಿ ಕನಿಷ್ಠ 5 ವರ್ಷ ಸೇವಾವಧಿ ಪೂರ್ಣಗೊಳಿಸಿದವರಿಗಷ್ಟೇ ಈ ಸೌಲಭ್ಯ ದೊರೆಯುತ್ತದೆ.

ಗ್ರಾಚ್ಯುಟಿ ಸಂಬಂಧ ಉದ್ಯೋಗಿಯ ಸೇವಾ ಅವಧಿಯನ್ನು ಇಳಿಸುವ ನಿಟ್ಟಿನಲ್ಲಿ 'ಪೇಮೆಂಟ್‌ ಆಫ್‌ ಗ್ರಾಚ್ಯುಟಿ ಕಾಯ್ದೆ 1972'ಕ್ಕೆ ತಿದ್ದುಪಡಿ ತರುವ ಪ್ರಸ್ತಾವನೆಯನ್ನು ರೂಪಿಸಲಾಗಿದೆ. ಗ್ರಾಚ್ಯುಟಿ ನಿಯಮಗಳ ಬದಲಾವಣೆಯಿಂದ ಆಗಬಹುದಾದ ಪರಿಣಾಮಗಳ ಕುರಿತು ಕಾರ್ಮಿಕ ಸಚಿವಾಲಯವು ನಾನಾ ಉದ್ಯಮಿಗಳು ಮತ್ತು ತಜ್ಞರ ಅಭಿಪ್ರಾಯವನ್ನು ಸಂಗ್ರಹಿಸಲಿದೆ. ಆ ಬಳಿಕ ಇದನ್ನು ಕೇಂದ್ರೀಯ ಟ್ರಸ್ಟಿಗಳ ಮಂಡಳಿ ಮುಂದೆ ಇಡಲಾಗುತ್ತದೆ ಎಂದು ಮೂಲಗಳು ತಿಳಿಸಿವೆ.

ಏಳನೇ ವೇತನ ಆಯೋಗದ ಜಾರಿ ಬಳಿಕ ಉದ್ಯೋಗಿಗಳ 20 ಲಕ್ಷ ರೂ.ವರೆಗಿನ ಗ್ರಾಚ್ಯುಟಿಯನ್ನು ಕೇಂದ್ರ ಸರಕಾರವು ತೆರಿಗೆ ಮುಕ್ತಗೊಳಿಸಿದೆ.