ಫೆಬ್ರವರಿಯಲ್ಲಿ ಜಿಎಸ್‌ಟಿ 85,174 ಕೋಟಿ ರೂ. ಸಂಗ್ರಹ

ಹೊಸದಿಲ್ಲಿ : ಕಳೆದ ಫೆಬ್ರವರಿಯಲ್ಲಿ ಜಿಎಸ್‌ಟಿ ಸಂಗ್ರಹ 85,174 ಕೋಟಿ ರೂ.ಗಳಾಗಿದ್ದು, ಇಳಿಕೆಯಾಗಿದೆ. ಹೀಗಿದ್ದರೂ ಮಾರ್ಚ್‌ ತಿಂಗಳಿನಲ್ಲಿ ಇದುವರೆಗೆ ತೆರಿಗೆ ಸಂಗ್ರಹದಲ್ಲಿ ಸುಧಾರಣೆ ಕಂಡು ಬಂದಿದೆ.

ಫೆಬ್ರವರಿಯಲ್ಲಿ 69 ಪರ್ಸೆಂಟ್‌ ಮಂದಿ ಮಾತ್ರ ಜಿಎಸ್‌ಟಿ ರಿಟರ್ನ್ಸ್‌ ಸಲ್ಲಿಸಿದ್ದಾರೆ. 59 ಲಕ್ಷ ಜಿಎಸ್‌ಟಿಆರ್‌ 3ಬಿ ರಿಟನ್ಸ್‌ ಸಲ್ಲಿಕೆಯಾಗಿದ್ದು, ಒಟ್ಟು ತೆರಿಗೆದಾರರ ಪೈಕಿ 69 ಪರ್ಸೆಂಟ್‌ನಷ್ಟಾಗಿದೆ. ಮಾರ್ಚ್‌ 25ರ ತನಕ 1.05 ಕೋಟಿ ತೆರಿಗೆದಾರರು ಜಿಎಸ್‌ಟಿ ಅಡಿಯಲ್ಲಿ ನೋಂದಣಿಯಾಗಿದ್ದು, ಇದರಲ್ಲಿ 18.17 ಲಕ್ಷ ಮಂದಿ ಕಂಪೊಸಿಶನ್‌ ಡೀಲರ್‌ಗಳಾಗಿದ್ದಾರೆ. ಈ ಕಂಪೊಸಿಶನ್‌ ಡೀಲರ್‌ಗಳು ಪ್ರತಿ ಮೂರು ತಿಂಗಳಿಗೊಮ್ಮೆ ರಿಟರ್ನ್ಸ್‌ ಸಲ್ಲಿಸಬೇಕಾಗುತ್ತದೆ. ಉಳಿದ 86.37 ಲಕ್ಷ ಮಂದಿ ಪ್ರತಿ ತಿಂಗಳು ರಿಟರ್ನ್ಸ್‌ ಸಲ್ಲಿಸಬೇಕಾಗುತ್ತದೆ.

ಈ ವರ್ಷ ಜನವರಿಯಲ್ಲಿ 86,318 ಕೋಟಿ ರೂ. ತೆರಿಗೆ ಸಂಗ್ರಹವಾಗಿದ್ದರೆ, ಕಳೆದ ವರ್ಷ ಡಿಸೆಂಬರ್‌ನಲ್ಲಿ 88,929 ಕೋಟಿ ರೂ. ಹಾಗೂ ನವೆಂಬರ್‌ನಲ್ಲಿ 85,174 ಕೋಟಿ ರೂ. ಸಂಗ್ರಹವಾಗಿತ್ತು. ಫೆಬ್ರವರಿಯಲ್ಲಿ ಸಂಗ್ರಹವಾಗಿರುವ 85,174 ಕೋಟಿ ರೂ. ಜಿಎಸ್‌ಟಿಯಲ್ಲಿ 14,945 ಕೋಟಿ ರೂ. ಕೇಂದ್ರ ಜಿಎಸ್‌ಟಿ ಮತ್ತು 20,456 ಕೋಟಿ ರೂ. ರಾಜ್ಯ ಜಿಎಸ್‌ಟಿಯಾಗಿದೆ. ಇದಲ್ಲದೆ 42,456 ಕೋಟಿ ರೂ. ಸಂಯುಕ್ತ ಜಿಎಸ್‌ಟಿ ಮತ್ತು 7,317 ಕೋಟಿ ರೂ. ಪರಿಹಾರ ಸಂಬಂಧಿತ ಸೆಸ್‌ ಆಗಿರಲಿದೆ.