ವಾಹನ ಮಾರಾಟ ಕುಸಿತದ ನಡುವೆಯೂ ಜಿಎಸ್‌ಟಿ ಸಂಗ್ರಹ ಹೆಚ್ಚಳ

ಹೊಸದಿಲ್ಲಿ: ವಾಹನ ಮಾರಾಟದ ವಹಿವಾಟು ಇಳಿಕೆಯಾಗಿದ್ದರೂ ಜುಲೈನಲ್ಲಿ ಸರಕು ಮತ್ತು ಸೇವಾ ತೆರಿಗೆ(ಜಿಎಸ್‌ಟಿ) ಸಂಗ್ರಹವು ಅಲ್ಪ ಮಟ್ಟದಲ್ಲಿ ಏರಿಕೆಯಾಗಿದ್ದು 1.02 ಲಕ್ಷ ಕೋಟಿ ರೂ. ಮುಟ್ಟಿದೆ. ವರ್ಷದ ಹಿಂದೆ 96,823 ಕೋಟಿ ರೂ. ಇತ್ತು. ಇದಕ್ಕೆ ಹೋಲಿಸಿದರೆ ಕಳೆದ ಜುಲೈನಲ್ಲಿ ಶೇ.5.8ರಷ್ಟು ಹೆಚ್ಚಿನ ಜಿಎಸ್‌ಟಿ ಸಂಗ್ರಹವಾದಂತೆ ಆಗಿದೆ. 2019ರ ಜೂನ್‌ನಲ್ಲಿ 1 ಲಕ್ಷ ಕೋಟಿ ರೂ. ಸಂಗ್ರಹವಾಗಿತ್ತು.

''ಒಟ್ಟಾರೆ ಸದ್ಯದ ಪರಿಸ್ಥಿತಿಯಲ್ಲಿ 1 ಲಕ್ಷ ಕೋಟಿ ರೂ. ತೆರಿಗೆ ಸಂಗ್ರಹವಾಗುವುದು ಉತ್ತಮವಾದ ಬೆಳವಣಿಗೆ. ಇದನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯುವುದೇ ಅಸಲಿ ಸವಾಲು. ಡೇಟಾ ಅನಾಲಿಸಿಸ್‌, ನ್ಯೂ ರಿಟರ್ನ್ಸ್‌, ಇ-ಇನ್‌ವಾಯ್ಸಿಂಗ್‌ ಸಹ ಈ ನಿಟ್ಟಿನಲ್ಲಿ ನೆರವಾಗುತ್ತಿವೆ,'' ಎಂದು ಪಿಡಬ್ಲ್ಯುಸಿ ಟ್ಯಾಕ್ಸ್‌ ಪಾರ್ಟನರ್‌ ಪ್ರತೀಕ್‌ ಜೈನ್‌ ಹೇಳಿದ್ದಾರೆ.

ಹಣಕಾಸು ಸಚಿವಾಲಯದ ಡೇಟಾ ಪ್ರಕಾರ, ಇಂಟೀಗ್ರೇಟೆಡ್‌ ಜಿಎಸ್‌ಟಿ 50,612 ಕೋಟಿ ರೂ.(24,246 ಕೋಟಿ ರೂ. ಆಮದು ವಹಿವಾಟಿನ ತೆರಿಗೆಯೂ ಸೇರಿ) ಸಂಗ್ರಹವಾಗಿದೆ. 17,912 ಕೋಟಿ ರೂ.ಕೇಂದ್ರ ಜಿಎಸ್‌ಟಿ, 25,000 ಕೋಟಿ ರಾಜ್ಯ ಜಿಎಸ್‌ಟಿ ಸಂಗ್ರಹವಾಗಿದೆ. ಸೆಸ್‌ ಸಂಗ್ರಹವು 8,551 ಕೋಟಿ ರೂ.ನಷ್ಟಿದೆ.

ಜಿಎಸ್‌ಟಿಆರ್‌ 3ಬಿ ರಿಟರ್ನ್ಸ್‌ಗಳು ಜುಲೈನಲ್ಲಿ 75.79 ಲಕ್ಷ ಫೈಲ್‌ ಆಗಿವೆ. 17,789 ಕೋಟಿ ರೂ. ಜಿಎಸ್‌ಟಿ ಪರಿಹಾರವನ್ನು ಏಪ್ರಿಲ್‌-ಮೇನಲ್ಲಿ ಬಿಡುಗಡೆ ಮಾಡಲಾಗಿದೆ. ಎರಡು ವರ್ಷಗಳ ಹಿಂದೆ ಜಾರಿಗೆ ಬಂದ ಜಿಎಸ್‌ಟಿ ವ್ಯವಸ್ಥೆಯನ್ನು ಸರಳೀಕರಿಸುವ ಪ್ರಯತ್ನಗಳು ಮುಂದುವರೆದಿವೆ.

* ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಜೂನ್‌ನಲ್ಲಿ ಜಿಎಸ್‌ಟಿ ಸಂಗ್ರಹ ಶೇ.5.8 ಏರಿಕೆ.
* ವಾಹನ ಮಾರಾಟ ವಹಿವಾಟಿನ ಕುಸಿತದ ಮಧ್ಯೆಯೂ 1 ಲಕ್ಷ ಕೋಟಿ ರೂ. ಮುಟ್ಟಿದ ತೆರಿಗೆ ಸಂಗ್ರಹ
* ಏಪ್ರಿಲ್‌-ಜುಲೈನಲ್ಲಿ ಜಿಎಸ್‌ಟಿ ಸಂಗ್ರಹವು ಒಟ್ಟು 4,16,176 ಕೋಟಿ ರೂ.ಗೆ ಮುಟ್ಟಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ 3,89,568 ಕೋಟಿ ರೂ. ಇತ್ತು.