ರೂ. 1 ಲಕ್ಷ ಕೋಟಿ ದಾಟಿದ ಜಿಎಸ್‌ಟಿ ಸಂಗ್ರಹ

ಹೊಸದಿಲ್ಲಿ : ಕಳೆದ ಎರಡು ತಿಂಗಳಿಂದ ತುಸು ಇಳಿಕೆಯ ಹಾದಿಯಲ್ಲಿದ್ದ ಸರಕು ಮತ್ತು ಸೇವಾ ತೆರಿಗೆ(ಜಿಎಸ್‌ಟಿ) ಸಂಗ್ರಹ ಜನವರಿಯಲ್ಲಿ ಸುಧಾರಿಸಿಕೊಂಡಿದ್ದು, 1 ಲಕ್ಷ ಕೋಟಿ ರೂ. ದಾಟಿದೆ ಎಂದು ಹಣಕಾಸು ಸಚಿವಾಲಯ ಗುರುವಾರ ಹೇಳಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ 89,825 ಕೋಟಿ ರೂ. ಸಂಗ್ರಹವಾಗಿತ್ತು.

ಕಳೆದ ಡಿಸೆಂಬರ್‌ನಲ್ಲಿ 94,725 ಕೋಟಿ ರೂ. ಜಿಎಸ್‌ಟಿ ಸಂಗ್ರಹವಾಗಿದ್ದರೆ, ಜನವರಿಯಲ್ಲಿ ಜಿಎಸ್‌ಟಿ ಆದಾಯ ಗಣನೀಯವಾಗಿ ಏರಿಕೆಯಾಗಿದೆ ಎಂದು ಸಚಿವಾಲಯ ಟ್ವೀಟ್‌ ಮಾಡಿದೆ. ಇದೂ ಸೇರಿದಂತೆ ಪ್ರಸಕ್ತ ಹಣಕಾಸು ವರ್ಷದಲ್ಲಿ ಮೂರನೇ ಸಲ ಜಿಎಸ್‌ಟಿ ಸಂಗ್ರಹ 1 ಲಕ್ಷ ಕೋಟಿ ರೂ. ದಾಟಿದಂತೆ ಆಗಿದೆ. ಕಳೆದ ವರ್ಷದ ಏಪ್ರಿಲ್‌ ಮತ್ತು ಅಕ್ಟೋಬರ್‌ನಲ್ಲಿ ಲಕ್ಷ ಕೋಟಿ ರೂ. ದಾಟಿದ್ದ ಜಿಎಸ್‌ಟಿ ಸಂಗ್ರಹವು ಹೊಸ ದಾಖಲೆಯನ್ನು ಬರೆದಿತ್ತು.

ಜಿಎಸ್‌ಟಿ ಸಂಗ್ರಹವು ಏಪ್ರಿಲ್‌ನಲ್ಲಿ 1.03 ಲಕ್ಷ ಕೋಟಿ ರೂ, ಮೇನಲ್ಲಿ 94,016 ಕೋಟಿ ರೂ, ಜೂನ್‌ನಲ್ಲಿ 95,610 ಕೋಟಿ ರೂ., ಜುಲೈನಲ್ಲಿ 96,483 ಕೋಟಿ ರೂ., ಆಗಸ್ಟ್‌ನಲ್ಲಿ 93,960 ಕೋಟಿ ರೂ, ಸೆಪ್ಟೆಂಬರ್‌ನಲ್ಲಿ 94,442 ಕೋಟಿ ರೂ., ಅಕ್ಟೋಬರ್‌ನಲ್ಲಿ 1,00,710 ಕೋಟಿ ರೂ. ಮತ್ತು ನವೆಂಬರ್‌ನಲ್ಲಿ 97,637 ಕೋಟಿ ರೂ.ಗಳಾಗಿತ್ತು.

ಬೇಕಿದೆ ಇನ್ನೂ ಹೆಚ್ಚಿನ ತೆರಿಗೆ

ಪ್ರಸಕ್ತ ಸಾಲಿನ ಏಪ್ರಿಲ್‌-ಜನವರಿ ಅವಧಿಯಲ್ಲಿ(10 ತಿಂಗಳಲ್ಲಿ) ಸರಕಾರವು 9.71 ಲಕ್ಷ ಕೋಟಿ ರೂ. ಜಿಎಸ್‌ಟಿ ಸಂಗ್ರಹಿಸಿದೆ. 2018-19ರ ಬಜೆಟ್‌ ಅಂದಾಜಿನ ಪ್ರಕಾರ ವಾರ್ಷಿಕ ಸಂಗ್ರಹದ ಗುರಿ 13.48 ಲಕ್ಷ ಕೋಟಿ ರೂ.ಗಳಾಗಿದೆ. ಅಂದರೆ ಮಾಸಿಕ 1.12 ಲಕ್ಷ ಕೋಟಿ ರೂ. ಸಂಗ್ರಹವಾಗಬೇಕು. 2017ರ ಜುಲೈ ಹಾಗೂ 2018ರ ಮಾರ್ಚ್‌ ಅವಧಿಯಲ್ಲಿ ಮಾಸಿಕ ಸರಾಸರಿ 89,885 ಕೋಟಿ ರೂ. ಸಂಗ್ರಹವಾಗಿದೆ.

==========

ತೆರಿಗೆ ಏರಿಕೆಗೆ ಏನು ಕಾರಣ?

ಬಡವರು ಮತ್ತು ಮಧ್ಯಮವರ್ಗದ ಜನರಿಗೆ ಅನುಕೂಲ ಮಾಡುವ ನಿಟ್ಟಿನಲ್ಲಿ ಜಿಎಸ್‌ಟಿ ದರಗಳನ್ನು ಗಣನೀಯವಾಗಿ ಇಳಿಸಲಾಗಿದೆ. ಜಿಎಸ್‌ಟಿ ಶ್ರೇಣಿಗಳನ್ನು ಪರಿಸ್ಕರಿಸಲಾಗಿದೆ. ಆದಾಗ್ಯೂ, ತ್ವರಿತ ವೇಗದ ಆರ್ಥಿಕತೆಯ ಪರಿಣಾಮ ಜನವರಿಯಲ್ಲಿ ಜಿಎಸ್‌ಟಿ ಸಂಗ್ರಹ 1 ಲಕ್ಷ ಕೋಟಿ ರೂ. ದಾಟಿದೆ ಎಂದು ಕೇಂದ್ರ ಹಣಕಾಸು ಸಚಿವ ಪಿಯೂಶ್‌ ಗೋಯಲ್‌ ಟ್ವೀಟ್‌ ಮಾಡಿದ್ದಾರೆ.