ಹೊಸದಿಲ್ಲಿ: ನವೆಂಬರ್‌ನಲ್ಲೂ ಸರಕು ಮತ್ತು ಸೇವಾ ತೆರಿಗೆ(ಜಿಎಸ್ಟಿ) ಸಂಗ್ರಹ ಇಳಿಕೆಯ ಹಾದಿಯಲ್ಲಿ ಮುಂದುವರಿದಿದ್ದು, 80,808 ಕೋಟಿ ರೂ. ಗೆ ಕುಸಿದಿದೆ. ಕಳೆದ ತಿಂಗಳು 83,000 ಕೋಟಿ ರೂ. ಸಂಗ್ರಹವಾಗಿತ್ತು. ಜಿಎಸ್ಟಿ ಇಳಿಕೆಯು ಮೋದಿ ಸರಕಾರದ ಆರ್ಥಿಕತೆ ಮೇಲೆ ಒತ್ತಡ ತರಲಿದೆ.
ಡಿ.25ರ ತನಕ ಲಭ್ಯವಿರುವ ಅಂಕಿಅಂಶಗಳ ಪ್ರಕಾರ, ನವೆಂಬರ್‌ ತಿಂಗಳಿಗೆ ಸಂಬಂಧಿಸಿದಂತೆ 53.06 ಲಕ್ಷ ರಿಟರ್ನ್ಸ್‌ ಸಲ್ಲಿಕೆಯಾಗಿದ್ದು 80,808 ಕೋಟಿ ರೂ. ಜಿಎಸ್ಟಿ ಸಂಗ್ರಹವಾಗಿದೆ. ಇದರಲ್ಲಿ ಪರಿಹಾರ ಸೆಸ್‌ 7,798 ಕೋಟಿ ರೂ. ಸೇರಿದೆ ಎಂದು ಹಣಕಾಸು ಸಚಿವಾಲಯದ ಪ್ರಕಟಣೆಯಲ್ಲಿ ಹೇಳಲಾಗಿದೆ.
ಕೇಂದ್ರ ಜಿಎಸ್ಟಿ 13,089 ಕೋಟಿ ರೂ., ರಾಜ್ಯ ಜಿಎಸ್ಟಿ 41,270 ಕೋಟಿ ರೂ., ಸಂಯೋಜಿತ ಜಿಎಸ್ಟಿ 41,270 ಕೋಟಿ ರೂ. ಸಂಗ್ರಹವಾಗಿದೆ. ಜುಲೈ 1ರಿಂದ ಜಿಎಸ್ಟಿ ಜಾರಿಗೆ ಬಂದಿದ್ದು, 5ನೇ ತಿಂಗಳಾದ ನವೆಂಬರ್‌ನಲ್ಲಿ ತೆರಿಗೆ ಸಂಗ್ರಹ ಕಡಿಮೆಯಾಗಿದೆ(80,808 ಕೋಟಿ ರೂ.).
ಜುಲೈನಲ್ಲಿ 95,000 ಕೋಟಿ ರೂ., ಆಗಸ್ಟ್‌ನಲ್ಲಿ 91,000 ಕೋಟಿ ರೂ., ಸೆಪ್ಟೆಂಬರ್‌ನಲ್ಲಿ 92,150 ಕೋಟಿ ರೂ., ಅಕ್ಟೋಬರ್‌ನಲ್ಲಿ 83,000 ಕೋಟಿ ರೂ. ಜಿಎಸ್ಟಿ ಸಂಗ್ರಹವಾಗಿತ್ತು.