GST ಪರಿಣಾಮ: ತಗ್ಗಿದ ತೆರಿಗೆ ದರ, ಮಾಸಿಕ 8,400 ರೂ ವೆಚ್ಚದ ಮೇಲೆ 320 ರೂ ಉಳಿತಾಯ

ಹೊಸದಿಲ್ಲಿ: ಜಿಎಸ್‌ಟಿ ಜಾರಿಯಾದ ಬಳಿಕ ಸಾಮಾನ್ಯ ಬಳಕೆಯ ವಸ್ತುಗಳ ಖರೀದಿಯಲ್ಲಿ ಪ್ರತಿ ಕುಟುಂಬಕ್ಕೆ ಸರಾಸರಿ 320 ರೂ.ಗಳ ಉಳಿತಾಯವಾಗುತ್ತಿದೆ ಎಂದು ಹಣಕಾಸು ಸಚಿವಾಲಯದ ಮೂಲಗಳು ಹೇಳಿವೆ.

ಗ್ರಾಹಕ ವೆಚ್ಚಗಳ ಅಂಕಿ-ಅಂಶಗಳ ವಿಶ್ಲೇಷಣೆಯಿಂದ ಈ ಮಾಹಿತಿ ಗೊತ್ತಾಗಿದೆ. 2017ರ ಜುಲೈ 1ರಂದು ಕೇಂದ್ರ ಮತ್ತು ರಾಜ್ಯಗಳ 17 ವಿಧದ ತೆರಿಗೆಗಳನ್ನು ಒಗ್ಗೂಡಿಸಿ ಜಿಎಸ್‌ಟಿ ಜಾರಿಯಾಗಿತ್ತು.

ಜಿಎಸ್‌ಟಿಯಿಂದಾಗಿ ದೇಶಾದ್ಯಂತ ಏಕರೂಪದ ಮಾರುಕಟ್ಟೆ ನಿರ್ಮಾಣವಾಗಿದ್ದು, ಸರಕು ಮತ್ತು ಸೇವೆಗಳ ಮೇಲೆ ಏಕರೂಪದ ತೆರಿಗೆ ವಿಧಿಸಲಾಗುತ್ತಿದೆ. ತೆರಿಗೆಯ ಮೇಲೆ ತೆರಿಗೆ ಬೀಳುತ್ತಿದ್ದ ಹಿಂದಿನ ಪದ್ಧತಿಯನ್ನು ಕೊನೆಗೊಳಿಸಲಾಗಿದೆ. ಅಲ್ಲದೆ, ಜಿಎಸ್‌ಟಿ ದರಗಳನ್ನೂ ತಗ್ಗಿಸಿರುವುದರಿಂದ ಗ್ರಾಹಕರಿಗೆ ಮಾಸಿಕ ಉಳಿತಾಯ ಸಾಧ್ಯವಾಗಿದೆ ಎಂದು ಮೂಲಗಳು ತಿಳಿಸಿವೆ.

ಜಿಎಸ್‌ಟಿಗೆ ಮೊದಲು ಮತ್ತು ನಂತರದ ಗೃಹ ನಿರ್ವಹಣೆ ವೆಚ್ಚವನ್ನು ತುಲನೆ ಮಾಡಿದರೆ 83 ವಸ್ತುಗಳ ತೆರಿಗೆ ದರ ಈಗ ಕಡಿಮೆಯಾಗಿದೆ. ಆಹಾರ ಮತ್ತು ಪಾನೀಯಗಳು, ಹೇರ್ ಆಯಿಲ್‌, ಟೂಥ್‌ ಪೇಸ್ಟ್‌, ಸೋಪು, ವಾಷಿಂಗ್ ಪೌಡರ್‌ ಮತ್ತು ಪಾದರಕ್ಷೆಗಳು ಸೇರಿದಂತೆ ಹಲವು ವಸ್ತುಗಳ ತೆರಿಗೆ ದರ ತಗ್ಗಿದೆ. ಈ ವಸ್ತುಗಳ ಮೇಲೆ ಮಾಸಿಕ 8,400 ರೂ.ಗಳ ವೆಚ್ಚ ಮಾಡುವುದಾದರೆ ಜಿಎಸ್‌ಟಿ ಅಡಿಯಲ್ಲಿ 510 ರೂ ತೆರಿಗೆ ಬೀಳುತ್ತದೆ. ಮೊದಲು 830 ರೂ ತೆರಿಗೆ ವಿಧಿಸಲಾಗುತ್ತಿತ್ತು. ಆ ಮೂಲಕ ಮಾಸಿಕ 320 ರೂ.ಗಳ ಉಳಿತಾಯ ಸಾಧಿಸಿದಂತಾಗಿದೆ ಎಂದು ಡೇಟಾ ವಿಶ್ಲೇಷಣೆ ತಿಳಿಸಿದೆ.

ಹಿಂದೆ ಒಂದು ವಸ್ತು ಫ್ಯಾಕ್ಟರಿಯಿಂದ ಹೊರಬಂದ ತಕ್ಷಣ ಕೇಂದ್ರ ಸರಕಾರದ ಅಬಕಾರಿ ಸುಂಕ ಹಾಗೂ ರಾಜ್ಯ ಸರಕಾರಗಳ ವ್ಯಾಟ್ ಅನ್ವಯವಾಗುತ್ತಿತ್ತು. ಅಂದರೆ ಗ್ರಾಹಕ ವಸ್ತುವಿನ ಪ್ರಾಥಮಿಕ ಬೆಲೆಗೆ ಮಾತ್ರ ತೆರಿಗೆ ಕಟ್ಟುತ್ತಿದ್ದುದಲ್ಲ, ಕೇಂದ್ರ ವಿಧಿಸುವ ಅಬಕಾರಿ ಸುಂಕದ ಮೇಲೂ ತೆರಿಗೆ ಪಾವತಿಸಬೇಕಾಗುತ್ತಿತ್ತು.

ಜಿಎಸ್‌ಟಿ ಜಾರಿಯೊಂದಿಗೆ ಈ ಹೊರೆ ತಗ್ಗಿದೆ. ಜಿಎಸ್‌ಟಿಯನ್ನು ಅಂತಿಮ ಗ್ರಾಹಕನೊಬ್ಬ ಸರಕು ಅಥವಾ ಸೇವೆಯನ್ನು ಖರೀದಿಸಿದಾಗಷ್ಟೇ ವಿಧಿಸಲಾಗುತ್ತದೆ.