ಜಿಎಸ್‌ಟಿ ನೋಂದಣಿ, ರಿಟರ್ನ್ಸ್‌ ಸಲ್ಲಿಕೆ ಸರಳ

ಹೊಸದಿಲ್ಲಿ : ಜಿಎಸ್‌ಟಿ ಮಂಡಳಿ ಶುಕ್ರವಾರ ನಡೆಸಿದ 35ನೇ ಸಭೆಯಲ್ಲಿ ಎಲೆಕ್ಟ್ರಿಕ್‌ ವಾಹನಗಳಗೆ ತೆರಿಗೆ ಇಳಿಸುವ ಪ್ರಸ್ತಾಪವಾಗಿದ್ದು, ಮಂಡಳಿಯ ಫಿಟ್‌ಮೆಂಟ್‌ ಸಮಿತಿಯ ಪರಿಶೀಲನೆಗೆ ಒಪ್ಪಿಸಲಾಗಿದೆ. ಜಿಎಸ್‌ಟಿ ನೋಂದಣಿ ಹಾಗೂ ರಿಟರ್ನ್ಸ್‌ ಸಲ್ಲಿಕೆಯನ್ನು ಸರಳಗೊಳಿಸಲಾಗಿದೆ.

ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ, ಜಿಎಸ್‌ಟಿ ರಿಟರ್ನ್‌ ಸಲ್ಲಿಸಲು ಕಾಲಾವಕಾಶವನ್ನು ಆಗಸ್ಟ್‌ 30ರ ತನಕ ವಿಸ್ತರಿಸಲಾಗಿದೆ. ಅಂದರೆ ಎರಡು ತಿಂಗಳು ವಿಸ್ತರಣೆಯಾಗಿದೆ.

ಎಲೆಕ್ಟ್ರಿಕ್‌ ವಾಹನಗಳಿಗೆ ಶೇ.12 ರಿಂದ ಶೇ.5ಕ್ಕೆ ಹಾಗೂ ಎಲೆಕ್ಟ್ರಿಕ್‌ ಚಾರ್ಜರ್‌ಗಳಿಗೆ ಶೇ.18ರಿಂದ ಶೇ.12ಕ್ಕೆ ಜಿಎಸ್‌ಟಿ ಇಳಿಸುವ ಪ್ರಸ್ತಾಪವನ್ನು ಫಿಟ್‌ಮೆಂಟ್‌ ಸಮಿತಿಯು ಪರಿಶೀಲಿಸಿ ಅಂತಿಮಗೊಳಿಸಲಿದೆ ಎಂದು ಕಂದಾಯ ಕಾರ್ಯದರ್ಶಿ ಅಜಯ್‌ ಭೂಷಣ್‌ ಪಾಂಡೆ ತಿಳಿಸಿದ್ದಾರೆ.

ಜಿಎಸ್‌ಟಿ ರಿಟರ್ನ್ಸ್‌ ಸಲ್ಲಿಕೆಗೆ ಒಂದು ಅರ್ಜಿಯ ನೂತನ ವ್ಯವಸ್ಥೆಯನ್ನು ಪ್ರಕಟಿಸಲಾಗಿದೆ. ನೋಂದಣಿ ಪ್ರಕ್ರಿಯೆಯನ್ನು ಸರಳಗೊಳಿಸಲಾಗಿದ್ದು, ಆಧಾರ್‌ ಬಳಸಲು ಅವಕಾಶ ಕಲ್ಪಿಸಲಾಗಿದೆ. ಈ ಹಿಂದೆ ಜಿಎಸ್‌ಟಿ ನೋಂದಣಿಗೆ ನಾನಾ ದಾಖಲಾತಿಗಳನ್ನು ನೀಡಬೇಕಾಗುತ್ತಿತ್ತು. ಈಗ ಆಧಾರ್‌ ಬಳಸಲು ಅನುಮತಿ ನೀಡಿರುವುದರಿಂದ ಸುಲಭವಾಗಲಿದೆ. ವ್ಯಕ್ತಿಯೊಬ್ಬ ಆನ್‌ಲೈನ್‌ನಲ್ಲಿ ತನ್ನ ಅಧಾರ್‌ ಸಂಖ್ಯೆ ಬಳಸಿಕೊಂಡು ಒಟಿಪಿ ದೃಢೀಕರಣ ಮಾಡಿ ಜಿಎಸ್‌ಟಿನ್‌ ವೆಬ್‌ ಪೋರ್ಟಲ್‌ನಲ್ಲಿ ನೋಂದಣಿ ಮಾಡಿಕೊಳ್ಳಬಹುದು. ಜಿಎಸ್‌ಟಿಎನ್‌ ರಿಜಿಸ್ಪ್ರೇಶನ್‌ ಸಂಖ್ಯೆ ಪಡೆಯಬಹುದು ಎಂದು ಪಾಂಡೆ ವಿವರಿಸಿದರು.

ಲಾಭಕೋರತನ ತಡೆ ವಿರೋಧಿ ಪ್ರಾಧಿಕಾರದ (ಎನ್‌ಎಎ) ಅವಧಿಯನ್ನು ಮತ್ತೆರಡು ವರ್ಷಗಳಿಗೆ (2021 ನವೆಂಬರ್‌ 30ರ ತನಕ) ವಿಸ್ತರಿಸಲಾಗಿದೆ. ಈ ಸಮಿತಿಯು ತೆರಿಗೆ ಇಳಿಕೆಯ ಪ್ರಯೋಜನವನ್ನು ಗ್ರಾಹಕರಿಗೆ ವರ್ಗಾಯಿಸುವುದಕ್ಕೆ ಸಂಬಂಧಿಸಿದ ಅಹವಾಲುಗಳನ್ನು ಪರಿಹರಿಸುತ್ತದೆ. ಜಿಎಸ್‌ಟಿ ನೋಂದಣಿಯ ನಿಯಮಾವಳಿಗಳನ್ನು ಸರಳಗೊಳಿಸಲಾಗಿದೆ.

ಜಿಎಸ್‌ಟಿ ಇಳಿಕೆಯ ಲಾಭವನ್ನು ಗ್ರಾಹಕರಿಗೆ ವರ್ಗಾಯಿಸದ ಉದ್ದಿಮೆ, ಸಂಸ್ಥೆಗಳಿಗೆ ಶೇ.10ರಷ್ಟು ದಂಡ ವಿಧಿಸುವ ಪ್ರಸ್ತಾಪವನ್ನು ಅನುಮೋದಿಸಲಾಗಿದೆ.

ಮೋದಿ 2.0 ಸರಕಾರ ಅಸ್ತಿತ್ವಕ್ಕೆ ಬಂದ ನಂತರ ಮೊದಲ ಜಿಎಸ್‌ಟಿ ಕೌನ್ಸಿಲ್‌ ಸಭೆ ಇದಾಗಿದೆ. ಸಿಮೆಂಟ್‌, ಕಾರುಗಳ ಮೇಲೆ ಜಿಎಸ್‌ಟಿ ದರ ಕಡಿಮೆಯಾದೀತೆಂದು ನಿರೀಕ್ಷಿಸಿದ್ದರೂ, ಈ ಬಗ್ಗೆ ಪ್ರಸ್ತಾಪವಾಗಲಿಲ್ಲ.