ರೋಶ್ನಿ ನಡಾರ್‌ ಭಾರತದ ಅತ್ಯಂತ ಸಿರಿವಂತ ಮಹಿಳೆ, ಕಿರಣ್‌ ಮಜೂಮ್ದಾರ್‌ ಷಾಗೆ ಎರಡನೇ ಸ್ಥಾನ

ಎಚ್‌ಸಿಎಲ್‌ ಟೆಕ್ನಾಲಜಿಯ ಅಧ್ಯಕ್ಷೆ ರೋಶ್ನಿ ನಡಾರ್‌ ಮಲ್ಹೋತ್ರಾ ಭಾರತದ ಸಿರಿವಂತ ಮಹಿಳೆಯಾಗಿ ಮೂಡಿ ಬಂದಿದ್ದಾರೆ. 'ಕೋಟಕ್‌ ವೆಲ್ತ್‌ ಹುರುನ್'‌ ಅತ್ಯಂತ ಶ್ರಿಮಂತ ಮಹಿಳೆಯರ ಪಟ್ಟಿ ಬಿಡುಗಡೆ ಮಾಡಿದ್ದು, ರೋಶ್ನಿ ನಡಾರ್‌ ಮೊದಲ ಸ್ಥಾನ ಅಲಂಕರಿಸಿದ್ದಾರೆ.

ರೋಶ್ನಿ ನಡಾರ್‌ ಆಸ್ತಿ 54,850 ಕೋಟಿ ರೂಪಾಯಿ ಇದೆ ಎಂದು ಅಂದಾಜಿಸಲಾಗಿದೆ. ಸದ್ಯ ಅವರು ಎಚ್‌ಸಿಎಲ್‌ ಕಾರ್ಪೊರೇಷನ್‌ನ ಸಿಇಒ ಹಾಗೂ ಕಾರ್ಯಕಾರಿ ನಿರ್ದೇಶಕರಾಗಿದ್ದಾರೆ. ಎಚ್‌ಸಿಎಲ್‌ ಟೆಕ್ನಾಲಜಿ ಮತ್ತು ಎಚ್‌ಸಿಎಲ್‌ ಇನ್ಫೋಸಿಸ್ಟಮ್ಸ್‌ ಇದೇ ಕಂಪನಿಯ ಅಡಿಯಲ್ಲಿ ಬರುತ್ತವೆ.

ಬಯೋಕಾನ್‌ ಸಂಸ್ಥಾಪಕಿ ಹಾಗೂ ಎಂಡಿ ಕಿರಣ್‌ ಮಜೂಮ್ದಾರ್‌ ಷಾ 36,600 ಕೋಟಿ ರೂ. ಆಸ್ತಿಯೊಂದಿಗೆ ಎರಡನೇ ಸ್ಥಾನದಲ್ಲಿದ್ದಾರೆ. ಔಷಧ ಕಂಪನಿ ಯುಎಸ್‌ವಿ ಪ್ರೈ. ಲಿ.ನ ಲೀನಾ ಗಾಂಧಿ ತಿವಾರಿ 21,340 ಕೋಟಿ ರೂ. ಆಸ್ತಿಯೊಂದಿಗೆ ಮೂರನೇ ಸ್ಥಾನದಲ್ಲಿದ್ದಾರೆ.

ದಿವೀಸ್‌ ಲ್ಯಾಬೊರೇಟರೀಸ್‌ನ ನಿಲೀಮಾ ಮೊಟಪರ್ತಿ 18,620 ಕೋಟಿ ರೂ. ಆಸ್ತಿಯೊಂದಿಗೆ ನಾಲ್ಕನೇ ಸ್ಥಾನದಲ್ಲಿ ಹಾಗೂ ಝೋಹೀ ಕಾರ್ಪೊರೇಷನ್‌ನ (ಸಾಫ್ಟ್‌ವೇರ್‌ ಕಂಪನಿ) ರಾಧಾ ವೆಂಬು 11,590 ಕೋಟಿ ರೂ. ಆಸ್ತಿಯೊಂದಿಗೆ ಐದನೇ ಸ್ಥಾನ ಪಡೆದುಕೊಂಡಿದ್ದಾರೆ.

ಹೂಡಿಕೆ ದಿಗ್ಗಜ ವಾರೆನ್‌ ಬಫೆಟ್‌ರನ್ನು ಹಿಂದಿಕ್ಕಿದ ಮುಕೇಶ್‌ ಅಂಬಾನಿ
100 ಕೋಟಿ ರೂ.ಗಿಂತ ಹೆಚ್ಚಿನ ಆಸ್ತಿ ಹೊಂದಿರುವ ಮಹಿಳೆಯರ ಪಟ್ಟಿಯನ್ನು ಕೋಟಕ್‌ ವೆಲ್ತ್‌ ಹುರುನ್‌ ತಯಾರಿಸಿದೆ. ಪಟ್ಟಿಯಲ್ಲಿ ಒಟ್ಟು 8 ಜನ ಪದ್ಮ ಪ್ರಶಸ್ತಿ ವಿಜೇತರಿದ್ದಾರೆ. ಇವರಲ್ಲಿ 31 ಮಹಿಳೆಯರು ಸ್ವಂತ ಸಾಮರ್ಥ್ಯದ ಮೇಲೆ ಶತ ಕೋಟ್ಯಧಿಪತಿಗಳಾದವರಾಗಿದ್ದಾರೆ. ಇವರಲ್ಲಿ 25 ಮಹಿಳೆಯರು ಉದ್ಯಮಿಗಳಾದರೆ, 6 ಮಹಿಳೆಯರು ವೃತ್ತಿಪರ ವ್ಯವಸ್ಥಾಪಕರಾಗಿದ್ದಾರೆ.

ನೈಕಾ ಫ್ಯಾಷನ್‌ನ ಫಲ್ಗುಣಿ ನಾಯರ್‌ ಹಾಗೂ ಬೈಜುಸ್‌ನ ದಿವ್ಯಾ ಗೋಕುಲ್‌ನಾಥ್‌ ಇತ್ತೀಚೆಗೆ ಪಟ್ಟಿಗೆ ಸೇರ್ಪಡೆಯಾದವರಾಗಿದ್ದಾರೆ. ಇವರಿಬ್ಬರೂ ತಮ್ಮ ತಮ್ಮ ಸ್ಟಾರ್ಟಪ್‌ಗಳನ್ನು ಯುನಿಕಾರ್ನ್‌ಗಳಾಗಿ ಬೆಳೆಸಿದವರಾಗಿದ್ದಾರೆ.

ಮುಂಬಯಿನಲ್ಲಿ ಗರಿಷ್ಠ 32 ಶತಕೋಟ್ಯಧಿಪತಿ ಮಹಿಳೆಯರಿದ್ದರೆ, ಹೊಸದಿಲ್ಲಿಯಲ್ಲಿ 20 ಹಾಗೂ ಹೈದರಾಬಾದ್‌ನಲ್ಲಿ 10 ಶತಕೋಟ್ಯಧಿಪತಿ ಮಹಿಳೆಯರಿದ್ದಾರೆ. ಮೆಟ್ರೋ ನಗರಗಳಲ್ಲೇ ಹೆಚ್ಚಿನ ಶತಕೋಟ್ಯಧಿಪತಿ ಮಹಿಳೆಯರಿದ್ದಾರೆ.