ಹೀರಾ ಗ್ರೂಪ್‌ ಎಂಡಿ ನೌಹೆರಾ ಶೇಖ್‌ ಬಂಧನ

ಮುಂಬಯಿ: ಹೂಡಿಕೆದಾರರಿಗೆ 300 ಕೋಟಿ ರೂ. ವಂಚನೆ ಎಸಗಿದ ಆರೋಪದನ್ವಯ ಹೀರಾ ಗ್ರೂಪ್‌ನ ವ್ಯವಸ್ಥಾಪಕ ನಿರ್ದೇಶಕಿ ನೌಹೆರಾ ಶೇಖ್‌ ಅವರನ್ನು ಮುಂಬಯಿನ ಆರ್ಥಿಕ ಅಪರಾಧಗಳ ವಲಯದ ಪೊಲೀಸರು ಶುಕ್ರವಾರ ಬಂಧಿಸಿದ್ದಾರೆ.

ಹೀರಾ ಗ್ರೂಪ್‌ನ ಕಂಪನಿಗಳು ನಾನಾ ಹೂಡಿಕೆ ಯೋಜನೆಗಳನ್ನು ಹೊಂದಿದ್ದವು. ಹಣಕಾಸು ವ್ಯವಹಾರದಲ್ಲಿ ಇಸ್ಲಾಮಿಕ್‌ ತತ್ತ್ವಗಳನ್ನು ಅನುಸರಿಸುವುದಾಗಿ ಕಂಪನಿ ಹೇಳಿಕೊಂಡಿತ್ತು.

ಅನೇಕ ಹೂಡಿಕೆದಾರರು ದೂರುಗಳನ್ನು ನೀಡಿದ ಬಳಿಕ ಮೊದಲ ಸಲ ಶೇಖ್‌ ಅವರನ್ನು ಅ.17ರಂದು ಹೈದರಾಬಾದ್‌ ಪೊಲೀಸರು ಬಂಧಿಸಿದ್ದರು. ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದ ಅವರನ್ನು ಈಗ ಮತ್ತೆ ಮುಂಬಯಿ ಪೊಲೀಸರು ಬಂಧಿಸಿದ್ದಾರೆ. ನ.3ರ ತನಕ ಅವರನ್ನು ಪೊಲೀಸ್‌ ವಶಕ್ಕೆ ನ್ಯಾಯಾಲಯವು ಒಪ್ಪಿಸಿದೆ. 'ಆಲ್‌ ಇಂಡಿಯಾ ಮಹಿಳಾ ಎಂಪವರಿಂಗ್‌ ಪಾರ್ಟಿ' ಹೆಸರಲ್ಲಿ ಅವರು ರಾಜಕೀಯದಲ್ಲೂ ಸದ್ದು ಮಾಡಿದ್ದರು.

ಅ.23ರಂದು ಶೇಖ್‌ ಮತ್ತು ಹೀರಾ ಗೋಲ್ಡ್‌ ಎಕ್ಸಿಂ ಲಿಮಿಟೆಡ್‌, ಹೀರಾ ರೀಟೇಲ್‌ ಪ್ರೈವೇಟ್‌ ಲಿಮಿಟೆಡ್‌, ಹೀರಾ ಟೆಕ್ಸ್‌ಟೈಲ್ಸ್‌, ಹೀರಾ ಫುಡೆಕ್ಸ್‌ನ ಅಧಿಕಾರಿಗಳ ವಿರುದ್ಧ ದೂರು ದಾಖಲಾಗಿತ್ತು. ಶೇಖ್‌ ಮತ್ತು ಇತರರು ಮಾಸಿಕ ಶೇ.2.8ರಿಂದ 3.2ರ ರಿಟರ್ನ್ಸ್‌ ಅನ್ನು ಹೂಡಿಕೆಗಳಿಗೆ ನೀಡುವುದಾಗಿ ಹೂಡಿಕೆದಾರರಿಗೆ ಭರವಸೆ ನೀಡಿದ್ದರು. ಬಹುತೇಕ ಮುಸ್ಲಿಂ ಹೂಡಿಕೆದಾರರನ್ನೇ ಹೆಚ್ಚಿನದಾಗಿ ಆಕರ್ಷಿಸಲಾಗಿತ್ತು. ಹೈದರಾಬಾದ್‌ನಲ್ಲಿ ಹೀರಾ ಗ್ರೂಪ್‌ ಮುಖ್ಯ ಕಚೇರಿಯನ್ನು ಹೊಂದಿದ್ದು, 20 ಕಂಪನಿಗಳನ್ನು ಹೊಂದಿದೆ.