₹1,000 ಕೋಟಿ ಬೋಗಸ್‌ ಬಿಲ್‌, ಫಾರ್ಮ್‌ಹೌಸ್‌ ಖರೀದಿಗೆ ₹100 ಕೋಟಿ ಕ್ಯಾಷ್‌; 'ಹೀರೋ' ಬೆನ್ನು ಬಿದ್ದ ಐಟಿ!

ಹೊಸದಿಲ್ಲಿ: ಹೀರೋ ಮೋಟೋಕಾರ್ಪ್ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಪವನ್ ಮುಂಜಾಲ್ ದೆಹಲಿಯ ಸಮೀಪದಲ್ಲಿರುವ ಫಾರ್ಮ್‌ಹೌಸ್ ಖರೀದಿಯಲ್ಲಿ ₹100 ಕೋಟಿಗೂ ಹೆಚ್ಚು ನಗದು ವ್ಯವಹಾರ ನಡೆಸಿರುವ ಬಗ್ಗೆ ಆದಾಯ ತೆರಿಗೆ ಇಲಾಖೆ ಅನುಮಾನ ವ್ಯಕ್ತಪಡಿಸಿದೆ ಎಂದು ಮೂಲಗಳು ಹೇಳಿವೆ.

ಹೀರೋ ಮೋಟೋಕಾರ್ಪ್ ಕಂಪನಿಯು ತನ್ನ ತೆರಿಗೆ ಹೊಣೆಗಾರಿಕೆಯನ್ನು ಕಡಿಮೆ ಮಾಡಲು ಬೋಗಸ್ ನಮೂದುಗಳ ಮೂಲಕ ಸುಮಾರು 1,000 ಕೋಟಿ ರೂ.ಗಳಷ್ಟು ವೆಚ್ಚವನ್ನು ಹೆಚ್ಚಿಸಿರಬಹುದು ಎಂದು ತೆರಿಗೆ ಅಧಿಕಾರಿಗಳು ಶಂಕಿಸಿದ್ದಾರೆ.

ಈ ಸುದ್ದಿ ಹೊರಬಿದ್ದ ಬೆನ್ನಲ್ಲೇ ಮಂಗಳವಾರ ಬಿಎಸ್‌ಇನಲ್ಲಿ ಹೀರೋ ಮೋಟೋಕಾರ್ಪ್‌ ಷೇರುಗಳು ಶೇ. 7.08ರಷ್ಟು ಕುಸಿತ ಕಂಡು 2,208.35ಕ್ಕೆ ಇಳಿಕೆಯಾಗಿತ್ತು. ಕಳೆದ ವಾರ ಆಧಾಯ ತೆರಿಗೆ ಇಲಾಖೆ ಅಧಿಕಾರಿಗಳು ಹೀರೋ ಕಚೇರಿ, ಕಂಪನಿ ಮಾಲೀಕ ಪವನ್‌ ಮುಂಜಾಲ್‌ ಕಚೇರಿ ಮತ್ತು ಮನೆಗಳ ಮೇಲೆ ದಾಳಿ ನಡೆಸಿ ಶೋಧ ನಡೆಸಿದ್ದರು. ಈ ವೇಳೆ ಸಂಗ್ರಹಿಸಿದ ದಾಖಲೆಗಳ ಪರಿಶೀಲನೆಯ ನಂತರ ಈ ಬೃಹತ್‌ ಪ್ರಮಾಣದ ಅಕ್ರಮ ಪತ್ತೆಯಾಗಿದೆ ಎಂದು ಮಂಗಳವಾರ ಆರಂಭಿಕ ವರದಿಗಳು ಹೊರಬಿದ್ದಿದ್ದವು.

ಮುಖ್ಯಸ್ಥರ ಮನೆ ಮೇಲೆ ಐಟಿ ದಾಳಿ ಕುರಿತ ಒಂದೇ ವರದಿಗೆ ದಿಢೀರನೆ ಬಿತ್ತು ಹೀರೋ ಶೇರು ಮೌಲ್ಯ!
ಆದರೆ ಹೀರೋ ಮೋಟೋಕಾರ್ಪ್ ಎಲ್ಲಾ ಆರೋಪಗಳನ್ನು ತಳ್ಳಿಹಾಕಿದೆ. "ಪತ್ರಿಕಾ ವರದಿಗಳಲ್ಲಿ ಮಾಡಲಾದ ಆರೋಪಗಳು ದಾಖಲೆಗಳನ್ನು ಆಧರಿಸಿಲ್ಲ. ಆದ್ದರಿಂದ ನಾವು ಊಹಾಪೋಹದ ಪತ್ರಿಕಾ ವರದಿಗಳನ್ನು ಸ್ಪಷ್ಟವಾಗಿ ನಿರಾಕರಿಸುತ್ತೇವೆ," ಎಂದು ಕಂಪನಿಯು ಷೇರು ವಿನಿಮಯ ಕೇಂದ್ರಗಳಿಗೆ ಹೇಳಿಕೆಯಲ್ಲಿ ತಿಳಿಸಿದೆ.

ಈ ಸ್ಪಷ್ಟನೆ ಬಳಿಕ ಬುಧವಾರ ಹೀರೋ ಷೇರುಗಳು ಸ್ವಲ್ಪ ಮೇಲೇರಿದ್ದು ಶೇ. 2.81 ಗಳಿಕೆಯೊಂದಿಗೆ 2,272.80 ರೂ.ಗೆ ತಲುಪಿವೆ.

ಕಳೆದ ವಾರ ಆದಾಯ ತೆರಿಗೆ ಇಲಾಖೆಯು ಹೀರೋ ಮೋಟೋಕಾರ್ಪ್‌ನ ಪ್ರವರ್ತಕರ ಕಚೇರಿಗಳು ಮತ್ತು ಮನೆಗಳ ಆವರಣದಲ್ಲಿ ಶೋಧ ನಡೆಸಿತ್ತು. ದೆಹಲಿ ಮತ್ತು ರಾಷ್ಟ್ರೀಯ ರಾಜಧಾನಿ ಪ್ರದೇಶ (ಎನ್‌ಸಿಆರ್)ಕ್ಕೆ ಒಳಪಟ್ಟ 25 ಸ್ಥಳಗಳಲ್ಲಿ ನಾಲ್ಕು ದಿನಗಳ ಕಾಲ ಭಾರೀ ಹುಡುಕಾಟ ನಡೆದಿತ್ತು.

Hero: ಹೀರೋ ಅಧ್ಯಕ್ಷ ಡಾ. ಪವನ್‌ ಮುಂಜಾಲ್‌ ಮನೆ, ಕಚೇರಿ ಮೇಲೆ ಐಟಿ ದಾಳಿ
ಫಾರ್ಮ್‌ಹೌಸ್ ಖರೀದಿಯ ಕುರಿತು ಹೆಚ್ಚಿನ ವಿವರಗಳನ್ನು ಹಂಚಿಕೊಳ್ಳಲು ಆದಾಯ ತೆರಿಗೆ ಇಲಾಖೆಯ ಮೂಲಗಳು ನಿರಾಕರಿಸಿದ್ದು, ಈ ಸಂಬಂಧ ಹೆಚ್ಚಿನ ವಿಚಾರಣೆಯ ಅಗತ್ಯವಿರಬಹುದು ಎಂದು ಹೇಳಿವೆ. ಕಂಪನಿಯು ಡೀಲರ್‌ಶಿಪ್‌ನಿಂದ ಪಾವತಿ ಸೇರಿದಂತೆ, ಪಾವತಿಗಳಲ್ಲಿ ಸಾಕಷ್ಟು ನಗದು ವ್ಯವಹಾರಗಳನ್ನು ನಡೆಸಿದೆ ಎಂದು ಮೂಲಗಳು ತಿಳಿಸಿವೆ.

"ನಾವು ಹಲವಾರು ನಗದು ವಹಿವಾಟುಗಳನ್ನು ಪತ್ತೆಹಚ್ಚಿದ್ದೇವೆ, ಅವುಗಳ ಬಗ್ಗೆ ಪರಿಶೀಲನೆ ನಡೆಯುತ್ತಿದೆ. ತೆರಿಗೆಗೆ ಒಳಪಡುವ ಆದಾಯವನ್ನು ಕಡಿಮೆ ಮಾಡಲು ಕಂಪನಿಯ ವೆಚ್ಚದ ಬಿಲ್‌ಗಳನ್ನು ಹೆಚ್ಚಿಸಿದೆ. ನಾವು ನಮ್ಮ ಅಂತಿಮ ವರದಿಯನ್ನು ಇಲಾಖೆಗೆ ಸಲ್ಲಿಸಿದಾಗ ವಿವರಗಳನ್ನು ನೀಡಲಾಗುವುದು,” ಎಂದು ದಾಳಿಯಲ್ಲಿ ಪಾಲ್ಗೊಂಡಿದ್ದ ಅಧಿಕಾರಿಯೊಬ್ಬರು ‘ಇಟಿ’ಗೆ ತಿಳಿಸಿದ್ದಾರೆ.

ವಶಪಡಿಸಿಕೊಂಡ ದಾಖಲೆಗಳು ಮತ್ತು ಡಿಜಿಟಲ್ ಡೇಟಾದ ಆರಂಭಿಕ ಪರಿಶೀಲನೆಯಲ್ಲಿ ತೆರಿಗೆಗೆ ಒಳಪಡುವ ಆದಾಯವನ್ನು ಕಡಿಮೆ ಮಾಡಲು ಸುಮಾರು 1,000 ಕೋಟಿ ರೂ. ಮೊತ್ತದ ಬೋಗಸ್ ವೆಚ್ಚವನ್ನು ತೋರಿಸಲಾಗಿದೆ ಎಂದು ಅಧಿಕಾರಿ ಹೇಳಿದ್ದಾರೆ.

"ಆದಾಯ ತೆರಿಗೆ ಇಲಾಖೆಯ ಅಧಿಕಾರಿಗಳು ಹಿಂದಿನ ವಾರದಲ್ಲಿ ನಮ್ಮ ಕಚೇರಿಗಳಿಗೆ ಭೇಟಿ ನೀಡಿದ್ದರು ಎಂಬುದನ್ನು ನಾವು ಸ್ಪಷ್ಟಪಡಿಸಲು ಬಯಸುತ್ತೇವೆ. ಕಂಪನಿಯು ಎಲ್ಲಾ ಬೆಂಬಲ ಮತ್ತು ಸಹಕಾರ, ಅಗತ್ಯ ದಾಖಲೆಗಳು ಮತ್ತು ಡೇಟಾವನ್ನು ಅಧಿಕಾರಿಗಳಿಗೆ ಒದಗಿಸಿದೆ ಮತ್ತು ಅಗತ್ಯವಿದ್ದರೆ ಅದನ್ನು ಮುಂದುವರಿಸುತ್ತದೆ,” ಎಂದು ಹೀರೋ ಮೋಟೋಕಾರ್ಪ್‌ ತಿಳಿಸಿದೆ. "ತೆರಿಗೆ ಇಲಾಖೆಯು ತನ್ನ ಪರಿಶೀಲನೆಯನ್ನು ಮುಕ್ತಾಯಗೊಳಿಸಿ ನಮಗೆ ಮಾಹಿತಿ ನೀಡಿದಾಗ, ನಾವು ಷೇರು ಪೇಟೆಗೆ ಮಾಹಿತಿ ನೀಡುತ್ತೇವೆ,” ಎಂದು ಕಂಪನಿ ಸ್ಪಷ್ಟಪಡಿಸಿದೆ.

ಆರಂಭದಲ್ಲಿ ಹೀರೋ ಮೋಟೋಕಾರ್ಪ್ ಐಟಿ ದಾಳಿಯನ್ನು, "ಆರ್ಥಿಕ ವರ್ಷದ ಅಂತ್ಯದ ಮೊದಲು ನಡೆಯುವ ಸಾಮಾನ್ಯ ಭೇಟಿ,” ಎಂದು ಹೇಳಿತ್ತು. ನಂತರ ಸಾಮಾನ್ಯ ಭೇಟಿಯಲ್ಲ ಐಟಿ ದಾಳಿ ಎಂಬುದು ಸ್ಪಷ್ಟವಾಗಿತ್ತು.

ನಿಯಮಗಳ ಪ್ರಕಾರ ಸ್ಥಿರ ಆಸ್ತಿ ವಹಿವಾಟಿನಲ್ಲಿ ನಗದು ವಹಿವಾಟಿನ ಪ್ರಮಾಣವು 20,000 ರೂ.ಗಿಂತ ಹೆಚ್ಚಿರಬಾರದು. ಮತ್ತು ನಿಮಯ ಉಲ್ಲಂಘಿಸಿದಲ್ಲಿ ನಗದು ಮೊತ್ತಕ್ಕೆ ಶೇ. 100ರಷ್ಟು ಸಮಾನವಾದ ದಂಡವನ್ನು ವಿಧಿಸಬಹುದಾಗಿದೆ.

ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ 'ಎಕನಾಮಿಕ್ ಟೈಮ್ಸ್' ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.