ಥರ್ಡ್‌ ಪಾರ್ಟಿ ವಿಮೆ ಜೂನ್‌ 16ರಿಂದ ತುಟ್ಟಿ

ಹೊಸದಿಲ್ಲಿ: ಕಾರು ಮತ್ತು ದ್ವಿ ಚಕ್ರ ವಾಹನಗಳ ಥರ್ಡ್‌ ಪಾರ್ಟಿ ಇನ್ಷೂರೆನ್ಸ್‌ ಪ್ರೀಮಿಯಂ ವೆಚ್ಚವು ಜೂನ್‌ 16ರಿಂದ ತುಟ್ಟಿಯಾಗಲಿದೆ. ವಿಮೆ ವಲಯದ ನಿಯಂತ್ರಕ ಐಆರ್‌ಡಿಎ, ಕೆಲವು ವರ್ಗದ ಥರ್ಡ್‌ ಪಾರ್ಟಿ ವಿಮೆಯ ಪ್ರೀಮಿಯಂ (ಟಿಪಿ) ವೆಚ್ಚವನ್ನು ಶೇ.21ರ ತನಕ ಏರಿಸಿದೆ.

ಸಣ್ಣ ಕಾರುಗಳಿಗೆ (1,000 ಸಿಸಿಗಿಂತ ಕಡಿಮೆ ಸಾಮರ್ಥ್ಯ‌ದ ಎಂಜಿನ್‌) ಹೊಸ ಟಿಪಿ ಇನ್ಷೂರೆನ್ಸ್‌ ವೆಚ್ಚವು 1,850 ರೂ.ಗಳಿಂದ 2,072 ರೂ.ಗೆ ಏರಿಕೆಯಾಗಲಿದೆ. 1,000 ಸಿಸಿಯಿಂದ 1,500 ಸಿಸಿ ತನಕ ಸಾಮರ್ಥ್ಯ‌ದ ಎಂಜಿನ್‌ ಇರುವ ಕಾರುಗಳಿಗೆ ವಿಮೆ ವೆಚ್ಚ ಶೇ.12.5 ಏರಿದ್ದು, 3,221 ರೂ.ಗಳಾಗಲಿದೆ.

ಹೀಗಿದ್ದರೂ, 1,500 ಸಿಸಿಗಿಂತ ಹೆಚ್ಚು ಸಾಮರ್ಥ್ಯ‌ದ ಎಂಜಿನ್‌ ಇರುವ ಕಾರುಗಳ ಟಿಪಿ ವಿಮೆ ಪ್ರೀಮಿಯಂ ವೆಚ್ಚ 7,890 ರೂ.ಗಳಲ್ಲಿಯೇ ಉಳಿದುಕೊಂಡಿದೆ.

ದ್ವಿಚಕ್ರ ವಾಹನಗಳ ಪೈಕಿ 75 ಸಿಸಿಗಿಂತ ಕಡಿಮೆ ಸಾಮರ್ಥ್ಯ‌ದ ಎಂಜಿನ್‌ ಇದ್ದರೆ ಹೊಸ ಥರ್ಡ್‌ ಪಾರ್ಟಿ ವಿಮೆಯ ವೆಚ್ಚ 482 ರೂ, ಹಾಗೂ 75-150 ಸಿಸಿ ಎಂಜಿನ್‌ ಆಗಿದ್ದರೆ ವಿಮೆ ವೆಚ್ಚ 752 ರೂ.ಗೆ ನಿಗದಿಯಾಗಿದೆ. 150-350 ಸಿಸಿ ವಾಹನಕ್ಕೆ ಪ್ರೀಮಿಯಂ ವೆಚ್ಚ 1,193 ರೂ.ಗೆ ಏರಿಕೆಯಾಗಿದೆ.