ಐಟಿ ವಲಯದಲ್ಲಿ ನೇಮಕಗಳು 16% ಏರಿಕೆ

ಬೆಂಗಳೂರು: ಕೇಂದ್ರದಲ್ಲಿ ಯಾವುದೇ ಪಕ್ಷದ ಸರಕಾರ ಬರಲಿ, ಉದ್ಯೋಗ ಸೃಷ್ಟಿಯು ದೊಡ್ಡ ಸವಾಲಾಗಿ ಕಾಡುವುದಂತೂ ಖಚಿತ. ಆದರೆ, ಐಟಿ ವಲಯದಲ್ಲಿ ನೇಮಕಗಳು ಕಳೆದ ವರ್ಷದ ಏಪ್ರಿಲ್‌ಗೆ ಹೋಲಿಸಿದರೆ, ಈ ವರ್ಷದ ಏಪ್ರಿಲ್‌ನಲ್ಲಿ ಶೇ.16ರಷ್ಟು ಏರಿಕೆಯಾಗಿವೆ.

ಅಲ್ಲದೇ, ಉದ್ಯೋಗ ನೀಡುವ ದೇಶದ ಅಗ್ರ ನಗರಗಳಲ್ಲಿ ಟೆಕ್ನಾಲಜಿ ಹಬ್‌ ಬೆಂಗಳೂರು ತನ್ನ ಸ್ಥಾನವನ್ನು ಕಾಯ್ದುಗೊಂಡಿದೆ. ಬೆಂಗಳೂರಿನಲ್ಲಿ ಇದೇ ಏಪ್ರಿಲ್‌ನಲ್ಲಿ ನೇಮಕ ಪ್ರಮಾಣವು ಶೇ.23ರಷ್ಟು ಏರಿಕೆಯಾಗಿರುವುದು ಕಂಡು ಬಂದಿದೆ. ಬೆಂಗಳೂರು ಹೊರತುಪಡಿಸಿದರೆ ಕೋಲ್ಕೊತಾ ಮತ್ತು ಹೈದರಾಬಾದ್‌ಗಳಲ್ಲಿ ನೇಮಕ ಪ್ರಕ್ರಿಯೆಯಲ್ಲಿ ಕ್ರಮವಾಗಿ ಶೇ.22 ಮತ್ತು ಶೇ.19ರ ಬೆಳವಣಿಗೆ ಕಂಡು ಬಂದಿದೆ.

ಕಳೆದ ಆರು ತಿಂಗಳಲ್ಲಿ ಐಟಿ ಉದ್ಯಮವು ಹೆಚ್ಚಿನ ನೇಮಕಗಳನ್ನು ಮಾಡಿಕೊಳ್ಳುತ್ತಿವೆ. ಹೊಸ ಉದ್ಯೋಗಗಳನ್ನೂ ಸೃಷ್ಟಿಸುತ್ತಿವೆ. ಇತರೆ ವಲಯಗಳಿಗೆ ಹೋಲಿಸಿದರೆ ಐಟಿ ವಲಯವು ನೇಮಕ ಪ್ರಕ್ರಿಯೆಯಲ್ಲಿ ತನ್ನ ಓಟವನ್ನು ಕಾಯ್ದುಗೊಂಡಿದೆ.

ನೇಮಕ ಪ್ರಕ್ರಿಯೆ ಹೇಗಿದೆ?

ಕಟ್ಟಡ/ಕಾಮಗಾರಿ ವಲಯ ಮತ್ತು ಎಂಜಿನಿಯರಿಂಗ್‌ ವಲಯದಲ್ಲಿ ನೇಮಕ ಪ್ರಕ್ರಿಯೆ ಶೇ.16ರಷ್ಟು ಏರಿದೆ. ಬಿಪಿಒ/ಐಟಿಇಎಸ್‌ನಲ್ಲಿ ಶೇ.11, ವಿಮೆ ವಲಯದಲ್ಲಿ ಶೇ.9 ಮತ್ತು ತ್ವರಿತ ವೇಗದ ಸರಕುಗಳ ವಲಯದಲ್ಲಿ(ಎಫ್‌ಎಂಸಿಜಿ) ಶೇ.11, ಹೆಲ್ತ್‌ಕೇರ್‌ನಲ್ಲಿ ಶೆ.14, ರಿಯಲ್‌ ಎಸ್ಟೇಟ್‌ನಲ್ಲಿ ಶೇ.17 ಮತ್ತು ಇಂಧನ ಮತ್ತು ಗ್ಯಾಸ್‌ ವಲಯದಲ್ಲಿ ಶೇ.3ರಷ್ಟು ನೇಮಕ ಪ್ರಕ್ರಿಯೆಗಳು ನಡೆದಿವೆ. ಐಟಿ ಹಾರ್ಡ್‌ವೇರ್‌ ವಲಯದ ನೇಮಕಾತಿಗಳಲ್ಲಿ ಶೇ.43ರಷ್ಟು ದೊಡ್ಡ ಬೆಳವಣಿಗೆ ಕಂಡು ಬಂದಿದೆ.

ಈ ವಲಯಗಳಲ್ಲಿ ಜಾಬ್‌ ಕಷ್ಟ

ಬ್ಯಾಂಕಿಂಗ್‌ ಮತ್ತು ಫೈನಾನ್ಸಿಯಲ್‌ ಸವೀರ್‍ಸಸ್‌, ವಾಹನ ಮತ್ತು ಈ ಸಂಬಂಧಿ ಉದ್ಯಮಗಳಲ್ಲಿ ಕಳೆದ ಕೆಲವು ತಿಂಗಳಿಂದ ನೇಮಕಗಳು ಕುಸಿದಿವೆ. ಬ್ಯಾಂಕಿಂಗ್‌ ಮತ್ತು ಇನ್ಷೂರೆನ್ಸ್‌ ಉದ್ಯಮದಲ್ಲೂ ನೇಮಕ ಪ್ರಕ್ರಿಯೆ ಜನವರಿ 2019ರಲ್ಲಿ ಶೇ.16ರಷ್ಟು ಕುಸಿದಿದೆ. ಮಾರ್ಚ್‌ನಲ್ಲಿ ಶೆ.15ರಷ್ಟು ಇಳಿಕೆಯಾಗಿದೆ.

===

ಮಾರ್ಚ್‌ನಲ್ಲಿ 8.14 ಲಕ್ಷ ಜಾಬ್‌ ಸೃಷ್ಟಿ

ಹೊಸದಿಲ್ಲಿ: ಸಂಘಟಿತ ವಲಯದಲ್ಲಿ ಕಳೆದ ಮಾರ್ಚ್‌ನಲ್ಲಿ 8.14 ಲಕ್ಷ ಉದ್ಯೋಗಗಳು ಸೃಷ್ಟಿಯಾಗಿವೆ. ಇದರ ಹಿಂದಿನ ಫೆಬ್ರವರಿಯಲ್ಲಿ 7.88 ಲಕ್ಷ ಉದ್ಯೋಗಗಳು ಸೃಷ್ಟಿಯಾಗಿದ್ದವು ಎನ್ನುವ ಅಂಶ ಇಪಿಎಫ್‌ಒದ ಅಂಕಿಅಂಶಗಳಿಂದ ಸ್ಪಷ್ಟವಾಗಿದೆ.

2018-19ರ ಹಣಕಾಸು ವರ್ಷದಲ್ಲಿ 67.59 ಲಕ್ಷ ಉದ್ಯೋಗಗಳು ಸೃಷ್ಟಿಯಾಗಿವೆ. ಇಪಿಎಫ್‌ಒಗೆ ಇಷ್ಟು ಮಂದಿ ಸದಸ್ಯತ್ವ ಪಡೆದಿದ್ದಾರೆ. 2017ರ ಸೆಪ್ಟೆಂಬರ್‌ನಿಂದ 2018ರ ಮಾರ್ಚ್‌ ಅವಧಿಯಲ್ಲಿ 15.52 ಲಕ್ಷ ಹೊಸ ಸದಸ್ಯತ್ವದ ನೋಂದಣಿಗಳು ಆಗಿವೆ.