ಗೃಹ ಸಾಲ ಬಡ್ಡಿ ಇಳಿಕೆಯ ಲಾಭ; ಗ್ರಾಹಕರಿಗೆ ಅನುಕೂಲ

ಹೊಸದಿಲ್ಲಿ: ಬ್ಯಾಂಕ್‌ಗಳು ಗೃಹ ಸಾಲಗಳ ಬಡ್ಡಿ ದರಗಳನ್ನು ಕಡಿತಗೊಳಿಸಿವೆ. ಹೀಗಾಗಿ ಗೃಹ ಸಾಲ ಹೊಂದಿರುವವರು, ಪಡೆಯಲು ಬಯಸುವವರಿಗೆ ಅನುಕೂಲವಾಗುತ್ತಿದೆ. ಆದರೆ ಇದಕ್ಕೆ ಮುನ್ನ 7 ಪ್ರಮುಖ ಅಂಶಗಳನ್ನು ಗಮನಿಸಲು ಮರೆಯದಿರಿ. 2021ರಲ್ಲಿ ಗೃಹ ಸಾಲ ಶೇ.6.75ರ ಮಟ್ಟದಿಂದಲೂ ಲಭ್ಯ. ಗೃಹ ಸಾಲದಲ್ಲಿ ಬ್ಯಾಂಕ್‌ ಗಳ ನಡುವೆ ಸಣ್ಣ ಮಟ್ಟಿನ ವ್ಯತ್ಯಾಸ ಇರುತ್ತದೆ.

ಆದರೆ ಅದರಿಂದಲೂ ಸಾಲಗಾರರಿಗೆ ಲಾಭವಾಗುತ್ತದೆ. ಆದರೆ ಕೆಳಕಂಡ ಅಂಶಗಳನ್ನು ಗಮನಿಸಿ. ನಿಮ್ಮ ಕ್ರೆಡಿಟ್‌ ಸ್ಕೋರ್‌ ಬಗ್ಗೆ ಜಾಗೃತಿ ಇರಲಿ ಗೃಹ ಸಾಲ ಪಡೆಯಲು ಬಯಸುವವರು ಸದಾ ಉತ್ತಮ ಕ್ರೆಡಿಟ್‌ ಸ್ಕೋರ್‌ ಹೊಂದಿರಬೇಕು. 750 ಕ್ಕಿಂತ ಹೆಚ್ಚಿನ ಕ್ರೆಡಿಟ್‌ ಸ್ಕೋರ್‌ ಇರುವವರಿಗೆ ಕಡಿಮೆ ದರದಲ್ಲಿ ಸಾಲ ಸಿಗಬಹುದು. ಆನ್‌ಲೈನ್‌ ಮೂಲಕ ನಿಮ್ಮ ಕ್ರೆಡಿಟ್‌ ಸ್ಕೋರ್‌ ಪರಿಶೀಲಿಸಬಹುದು.

ಇಎಂಐ ಬಗ್ಗೆ ಯೋಚಿಸಿ ಗೃಹ ಸಾಲಗಳು ದೀರ್ಘಾವಧಿಯಾದ್ದರಿಂದ ಪ್ರತಿ ತಿಂಗಳು ಎಷ್ಟು ಹಣವನ್ನು ಕಂತಿನ ರೂಪದಲ್ಲಿ ಕಟ್ಟಬಹುದು ಎಂಬ ಲೆಕ್ಕಾಚಾರ ಅವಶ್ಯಕ. ಆದಾಯದ ಶೇ. 50ಕ್ಕಿಂತ ಹೆಚ್ಚಿನ ಮೊತ್ತ ಇಎಂಐಗೆ ಹೋಗದಿರಲಿ. ಜಂಟಿ ಸಾಲದ ಅನುಕೂಲ ಸಾಲಗಾರರು ತಮ್ಮ ಸಂಗಾತಿಯ ಜತೆ ಜಂಟಿ ಖಾತೆಯಲ್ಲಿ ಸಾಲ ಪಡೆಯುವುದು ಅನುಕೂಲಕರ. ಮಹಿಳಾ ಸಾಲಗಾರರಿಗೆ ಬಡ್ಡಿದರ ಮತ್ತಷ್ಟು ಕಡಿಮೆಯಾಗಿರುತ್ತದೆ.

ದೀರ್ಘಾವಧಿಯ ಸಾಲ ಹೊಸತಾಗಿ ಗೃಹ ಸಾಲ ಪಡೆಯುವವರು ದೀರ್ಘಾವಧಿಗೆ ಗೃಹ ಸಾಲ ಪಡೆಯುವುದು ಮತ್ತು ಆದಾಯ ವೃದ್ಧಿಸಿದಂತೆ ಅವಧಿಗೆ ಮುನ್ನ ಸಾಲದ ಮರು ಪಾವತಿ ಮೂಡುವುದು ಉತ್ತಮ. ಆರ್‌ ಬಿಐ ನಿರ್ದೇಶನದ ಪ್ರಕಾರ ಗೃಹ ಸಾಲವನ್ನು ಅವಧಿಗೆ ಮುನ್ನ ಮರು ಪಾವತಿಸಿದರೆ ಅದಕ್ಕೆ ಯಾವುದೇ ದಂಡ ಅನ್ವಯವಾಗುವುದಿಲ್ಲ.

ಡೌನ್‌ ಪೇಮೆಂಟ್‌ ಹೆಚ್ಚಿಸಿ ಗೃಹ ಸಾಲದ ಡೌನ್‌ ಪೇಮೆಂಟ್‌ ಹೆಚ್ಚಿಸಿದಷ್ಟೂ ಸಾಲದ ಮೊತ್ತ ಹಾಗೂ ಇಎಂಐ ಕಡಿಮೆಯಾಗುತ್ತದೆ. ಬಡ್ಡಿ ದರದ ವೆಚ್ಚವೂ ಇಳಿಕೆಯಾಗುತ್ತದೆ. ಚೌಕಾಸಿ ಮಾಡಿ ಬಡ್ಡಿ ದರಗಳು ಹಲವಾರು ವರ್ಷಗಳ ಕೆಳಗಿನ ಮಟ್ಟದಲ್ಲಿ ಇರುವುದರಿಂದ ಬೇರೆ ಬೇರೆ ಹಣಕಾಸು ಸಂಸ್ಥೆ, ಬ್ಯಾಂಕ್‌ಗಳಲ್ಲಿ ವಿಚಾರಿಸಿ. ಚೌಕಾಸಿ ಮಾಡುವುದರಿಂದ ಪ್ರಯೋಜನ ಸಿಗಬಹುದು. ಸಾಲದ ಹೊರೆ ಬೇಡ ಗೃಹ ಸಾಲ ಜತೆಗೆ ಇತರ ವೈಯಕ್ತಿಕ ಸಾಲ, ಕ್ರೆಡಿಟ್‌ ಕಾರ್ಡ್‌ ಸಾಲಗಳನ್ನು ಅತಿಯಾಗಿ ಪಡೆಯದಿರಿ.