ಕಡಿಮೆ ಬಡ್ಡಿ ಎಂದು ಸಾಲ ಪಡೆಯುವ ಮುನ್ನ ನಿಮ್ಮನ್ನು ನೀವೇ ಕೇಳಿಕೊಳ್ಳಬೇಕಾದ ಪ್ರಶ್ನೆಗಳಿವು!

ಹೊಸದಿಲ್ಲಿ: ಕೊರೊನಾ ಪರಿಣಾಮ ಇಡೀ ಆರ್ಥಿಕತೆಯೇ ತಲೆಕೆಳಗಾಗಿ ನಿಂತಿದೆ. ತೀರಾ ಕಡಿಮೆ ಬಡ್ಡಿದರದಲ್ಲಿ ಸಾಲಗಳು ದೊರೆಯುತ್ತಿವೆ. ಗೃಹಸಾಲಗಳಂತೂ ವಾರ್ಷಿಕ ಶೇ.6.7ರ ಬಡ್ಡಿದರದಲ್ಲಿ ಲಭ್ಯವಾಗುತ್ತಿದೆ. ನೀವೇನಾದರೂ ಮನೆ ಖರೀದಿಸುವ ಕನಸು ಕಂಡಿದ್ದರೆ, ಕನಸಿನ ಸಾಕಾರಕ್ಕೆ ಇದು ಸಕಾಲ ಎನ್ನಬಹುದು.

ಅತಿ ಕಡಿಮೆ ಬಡ್ಡಿ ದರದಲ್ಲಿ ಗೃಹ ಸಾಲ ದೊರೆಯುತ್ತಿರುವುದೇನೋ ನಿಜ. ಆದರೆ, ಅವಸರದಲ್ಲಿ ಸಾಲ ತೆಗೆದುಕೊಳ್ಳುವುದು ಅಷ್ಟೇ ಅಪಾಯಕಾರಿ. ಅವಸರದಲ್ಲಿ ಸಾಲ ಪಡೆದು ಅಪಾಯದಲ್ಲಿ ಸಿಲುಕುವ ಬದಲು, ಸಾಲ ಪಡೆಯುವ ಮುನ್ನ ನಿಮ್ಮನ್ನು ನೀವೇ ಕೆಲವು ಪ್ರಶ್ನೆಗಳನ್ನು ಕೇಳಿಕೊಳ್ಳುವುದು ಉಚಿತ. ಸಾಲ ಮರುಪಾವತಿಸಲು ನೀವು ಶಕ್ತರೇ ಎಂಬುದನ್ನು ಖಾತರಿಪಡಿಸಿಕೊಳ್ಳಲು ಈ ಪ್ರಶ್ನೆಗಳು ಸಹಕಾರಿ.

ಮೊದಲು ಮನೆಯೋ? ಮನೆ ಸಾಲವೋ?
ಕಡಿಮೆ ಬಡ್ಡಿ ದರದಲ್ಲಿ ಸಾಲ ದೊರೆಯುತ್ತದೆಂದು ಆತುರದ ನಿರ್ಧಾರ ಕೈಗೊಳ್ಳುವುದು, ಅಪಾಯವನ್ನು ನಾವೇ ಮೇಲೆಳೆದುಕೊಂಡಂತೆ. ಒಂದು ವೇಳೆ ದಳ್ಳಾಳಿ ಕಡೆಯಿಂದ ಲೋಲ್‌ಗೆ ಅರ್ಜಿ ಸಲ್ಲಿಸಿರುತ್ತೀರಿ. ಇತ್ತ ಮನೆ ಖರೀದಿಯ ಮಾತುಕತೆಯನ್ನೂ ಮುಗಿಸಿರುತ್ತೀರಿ. ಈ ಸಂದರ್ಭದಲ್ಲಿ ನೀವು ಅರ್ಜಿ ಸಲ್ಲಿಸಿದ್ದ ಬ್ಯಾಂಕು ಸಾಲ ನೀಡಲು ನಿರಾಕರಿಸಿಬಿಟ್ಟರೆ? ಇತ್ತ ಮನೆ ಮಾಲೀಕ ನಿಗದಿತ ಅವಧಿಯಲ್ಲಿ ಹಣ ನೀಡುವಂತೆ ತಾಖೀತು ಮಾಡಿದರೆ? ಏನೂ ತೋಚದಂತಾಗುತ್ತದೆ ಅಲ್ಲವೇ?

ಇದಕ್ಕಾಗಿಯೇ, ನಂಬಿಕಾರ್ಹ ಸಾಲದಾತರಿಂದ ಸಾಲಕ್ಕಾಗಿ ಅರ್ಜಿ ಸಲ್ಲಿಸಬೇಕು. ಎಷ್ಟು ಮೊತ್ತದ ಸಾಲ ಲಭ್ಯವಿದೆ. ನಿಮಗೆ ನಿಜವಾಗಿಯೂ ಎಷ್ಟು ಮೊತ್ತದ ಹಣ ಬೇಕು? ನೀವು ತೆಗೆದುಕೊಂಡ ಸಾಲವನ್ನು ಹಿಂದಿರುಗಿಸಲು ಎಷ್ಟು ವರ್ಷ ಬೇಕಾಗಬಹುದು. ನಿಮಗಿರುವ ಆದಾಯದ ಮೂಲಗಳು ಯಾವುವು? ಈ ಎಲ್ಲ ಅಂಶಗಳನ್ನೂ ಗಮನದಲ್ಲಿಟ್ಟುಕೊಂಡು ಸಾಲ ಪಡೆಯುವುದು ಉತ್ತಮ

ಗೃಹ ಸಾಲ ಪಡೆಯುವವರಿಗೆ ಎಸ್‌ಬಿಐನಿಂದ 3 ಕೊಡುಗೆ: ಪ್ರೊಸೆಸಿಂಗ್‌ ಫೀ ಮನ್ನಾ!

ನಿಮಗೆ ವೃತ್ತಿ ಭದ್ರತೆ ಇದೆಯೇ?
ಈಗ ಬಡ್ಡಿದರವೇನೋ ಕಡಿಮೆ ಇರಬಹುದು. ಆದರೆ, ಕೊರೊನಾ ಸಂದರ್ಭದಲ್ಲಿ ನಿಮ್ಮ ವೃತ್ತಿ ಭದ್ರತೆ ಬಗ್ಗೆಯೂ ಯೋಚನೆ ಮಾಡಬೇಕಿದೆ. ನಿಮ್ಮ ಉದ್ಯೋಗ ಮತ್ತು ಆದಾಯದಲ್ಲಿ ಸ್ಥಿರತೆ ಇದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು. ಕಾರಣ ಸಂಬಳದಲ್ಲಿ ಏನಾದರೂ ಕಡಿತವಾದರೆ, ನಿಮ್ಮ ಸಾಲದ ಇಎಂಐ ಪಾವತಿಸಲು ಕಷ್ಟವಾಗುತ್ತದೆ. ಇಎಂಐ ಬಾಕಿ ಉಳಿಸಿಕೊಳ್ಳುವುದು ನಿಮ್ಮ ಕ್ರೆಡಿಟ್‌ ಸ್ಕೋರ್‌ ಮೇಲೆ ಋಣಾತ್ಮಕ ಪರಿಣಾಮ ಬೀರುತ್ತದೆ. ನೀವು ದೀರ್ಘಾವಧಿವರೆಗೆ ಇಎಂಐ ಪಾವತಿಸಲು ಶಕ್ತರಿದ್ದೀರಿ ಎಂದಾದರೆ ಸಾಲ ಪಡೆಯುವುದರಲ್ಲಿ ಯಾವುದೇ ತೊಂದರೆ ಇಲ್ಲ.

ಕೊರೊನಾ ಸಮಯದಲ್ಲಿ ಇಎಂಐ ಬಾಕಿ ಉಳಿಸಿಕೊಂಡಿದ್ದೀರೇ?
ಕಳೆದ 6 ತಿಂಗಳಲ್ಲಿ ಕೊರೊನಾ ವೈರಸ್‌ ಕಾರಣದಿಂದಾಗಿ ನಿಮ್ಮ ಸಂಬಳದಲ್ಲಿ ಕಡಿತವಾಗಿದೆಯೇ? ಈ ಮೊದಲ ಸಾಲ ಪಡೆದಿಂದ ಇಎಂಐ ಬಾಕಿ ಉಳಿಸಿಕೊಂಡಿದ್ದೀರಾ? ಇವೆಲ್ಲವೂ ನಿಮ್ಮ ಕ್ರೆಡಿಟ್‌ ಸ್ಕೋರ್‌ ಮೇಲೆ ಪರಿಣಾಮ ಬೀರಿರುತ್ತವೆ. ಮತ್ತೆ ಸಾಲ ಪಡೆಯುವ ಮುನ್ನ ಒಮ್ಮೆ ಯೋಚಿಸಲೇಬೇಕು. ನಿಮಗಿರುವ ಆದಾಯವನ್ನು ಗಮನದಲ್ಲಿರಿಸಿಕೊಂಡು ಸಾಲ ಪಡೆಯುವುದು ಒಳಿತು.

ಸಣ್ಣ ಉದ್ದಿಮೆಗೆ 1.63 ಲಕ್ಷ ಕೋಟಿ ರೂ. ಕೋವಿಡ್‌ ಸಾಲ ವಿತರಣೆ; ಮತ್ತೊಂದು ಪ್ಯಾಕೇಜ್‌ ಘೋಷಣೆ ಸಾಧ್ಯತೆ

ಹಣಕಾಸು ಬಿಕ್ಕಟ್ಟು ಎದುರಿಸಲು ಸಿದ್ಧರಿದ್ದೀರಾ?
ದೊಡ್ಡ ಮೊತ್ತದ ಸಾಲ ಪಡೆಯುವ ಮೊದಲು, ಭವಿಷ್ಯದಲ್ಲಿ ಉಂಟಾಗಬಹುದಾದ ಆರ್ಥಿಕ ಬಿಕ್ಕಟ್ಟುಗಳನ್ನು ನಿಭಾಯಿಸಲು ಶಕ್ತರಿದ್ದೀರೇ? ಎಂಬುದನ್ನು ಖಾತರಿಪಡಿಸಿಕೊಳ್ಳಿ. ಉದ್ಯೋಗ ಕಡಿತ, ವೇತನ ಕಡಿತದಿಂದ ಆದಾಯದಲ್ಲಿ ಇಳಿಕೆಯಾದರೆ, ನೀವು ಸಾಲವನ್ನು ಮರುಪಾವತಿ ಮಾಡಬಲ್ಲಿರೇ ಎಂಬುದನ್ನು ಖಾತರಿಪಡಿಕೊಳ್ಳಿ.

ನಿಮ್ಮ ಸಂಗಾತಿಯೂ ದುಡಿಮೆ ಮಾಡುತ್ತಾರಾ?
ಒಂದು ವೇಳೆ ನಿಮ್ಮ ಹೆಂಡತಿಯೂ ಕೆಲಸಕ್ಕೆ ಹೋಗುತ್ತಿದ್ದು, ದುಡಿಯುತ್ತಿದ್ದರೆ, ಅವರನ್ನೇ ಪ್ರಾಥಮಿಕ ಸಾಲದಾರರನ್ನಾಗಿ ಮಾಡಬಹುದು. ಮಹಿಳೆರಿಗಾದರೆ ಮತ್ತಷ್ಟು ಕಡಿಮೆ ಬಡ್ಡಿ ದರದಲ್ಲಿ ಸಾಲ ದೊರೆಯುತ್ತದೆ. ಜತೆಗೆ ಹೆಚ್ಚುವರಿ ತೆರಿಗೆ ರಿಯಾಯಿತಿ ಕೂಡ ದೊರೆಯುತ್ತದೆ.

ಎಸ್‌ಬಿಐ 'ನಿಶ್ಚಿತ ಠೇವಣಿ' ಬಡ್ಡಿದರ ಕಟ್‌: ಪರಿಷ್ಕೃತ ದರಗಳ ಪೂರ್ಣ ವಿವರ ಇದು!

ಹೂಡಿಕೆ ಉದ್ದೇಶದಿಂದ ಮನೆ ಖರೀದಿ ಮಾಡುತ್ತಿದ್ದೀರಾ?
ಒಂದು ವೇಳೆ ನಿಮ್ಮಲ್ಲಿ ಬಹಳಷ್ಟು ಹಣವಿದ್ದು, ಅದನ್ನು ಹೂಡಿಕೆ ಮಾಡುವ ಉದ್ದೇಶದಿಂದ ಮನೆ ಖರೀದಿ ಮಾಡುವುದಿದ್ದರೆ, ಗೃಹ ಸಾಲ ಪಡೆಯಲು ಇದು ಸಕಾಲವಾಗಿದೆ. ಕೇವಲ ವಾರ್ಷಿಕ ಶೇ.6.7 ಬಡ್ಡಿದರದಲ್ಲಿ ಗೃಹಸಾಲ ಲಭ್ಯವಿದೆ. ಎಸ್‌ಬಿಐ ಸೇರಿದಂತೆ ಕೆಲವು ಬ್ಯಾಂಕುಗಳು ಗೃಹ ಸಾಲದ ಮೇಲೆ ವಿಶೇಷ ಕೊಡುಗೆಗಳನ್ನೂ ಘೋಷಿಸಿವೆ. ವಿಚಾರಣೆ ಮಾಡಿ ಸಾಲ ಪಡೆದುಕೊಳ್ಳಬಹುದು.