ಹೊಸದಿಲ್ಲಿ: ಹಾಂಕಾಂಗ್ ಪ್ರವಾಸದ ಬಗ್ಗೆ ಯೋಚಿಸುತ್ತಿರುವ ಜನರಿಗೆ ಇದು ಕಹಿ ಸುದ್ದಿ. ಈ ತನಕ ಭಾರತೀಯರಿಗೆ ನೀಡುತ್ತಿದ್ದ ಮುಕ್ತ ವೀಸಾ ಸೌಲಭ್ಯವನ್ನು ಹಾಂಕಾಂಗ್ ಹಿಂಪಡೆದಿದೆ. ಹಾಂಕಾಂಗ್ ಭೇಟಿಗೆ ಇಚ್ಛಿಸುವ ಭಾರತೀಯರು, ಸೋಮವಾರದಿಂದ(ಜ.23) ಆನ್ಲೈನ್ ಮೂಲಕ ಮೊದಲೇ ಕಡ್ಡಾಯವಾಗಿ ನೋಂದಣಿ ಮಾಡಿಕೊಂಡು ಪ್ರಯಾಣ ಮಾಡಬೇಕು.
ಈ ಸಂಬಂಧ ಹಾಂಕಾಂಗ್ನ ವಲಸೆ ಇಲಾಖೆ ವೆಬ್ಸೈಟ್ನಲ್ಲಿ ಪ್ರಕಟಿಸಲಾಗಿದೆ. ಅಲ್ಲದೇ, ಈ ಕುರಿತಾಗಿ ಭಾರತೀಯ ರಾಯಭಾರ ಕಚೇರಿಗೂ ಹಾಂಕಾಂಗ್ ಆಡಳಿತವು ಪತ್ರವನ್ನು ರವಾನಿಸಿದೆ. ಭಾರತೀಯರ ನೆಚ್ಚಿನ ಪ್ರವಾಸಿ ತಾಣಗಳಲ್ಲಿ ಒಂದಾದ ಹಾಂಕಾಂಗ್ ಹೆಚ್ಚಿನ ಆಕರ್ಷಣೆಗೆ ಪಾತ್ರವಾಗಿದೆ. ಚೀನಾದ ವಿಶೇಷ ಆಡಳಿತ ಪ್ರಾಂತ್ಯವಾಗಿರುವ ಹಾಂಕಾಂಗ್ಗೆ ಪ್ರತಿ ವರ್ಷ ಸುಮಾರು ಐದು ಲಕ್ಷ ಭಾರತೀಯರು ಭೇಟಿ ನೀಡುತ್ತಾರೆ. ಹೊಸ ನಿಯಮದಿಂದ ಭಾರತೀಯ ಪ್ರಯಾಣಿಕರಿಗೆ ತುಸು ತೊಡಕಾಗಲಿದೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.