ಜಿಡಿಪಿ ಶೀಘ್ರದಲ್ಲೇ ಪಾಸಿಟಿವ್‌ಗೆ ಏರಿಕೆ - ಅಮಿತ್‌ ಶಾ ವಿಶ್ವಾಸ

ಅಹಮದಾಬಾದ್‌: ಸತತ ಎರಡು ತ್ರೈಮಾಸಿಕಗಳಿಂದ ಋುಣಾತ್ಮಕವಾಗಿರುವ ಆರ್ಥಿಕ ಬೆಳವಣಿಗೆ (ಜಿಡಿಪಿ) ಮುಂದಿನ ತ್ರೈಮಾಸಿಕದಲ್ಲಿ ಧನಾತ್ಮಕ (ಪ್ಲಸ್‌) ಮಟ್ಟಕ್ಕೆ ಮರಳುವ ವಿಶ್ವಾಸ ಇದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಹೇಳಿದ್ದಾರೆ.

ಆರ್ಥಿಕತೆಯ ಚೇತರಿಕೆ ಸಲುವಾಗಿ ಪ್ರಧಾನಿ ನರೇಂದ್ರ ಮೋದಿಯವರು ಕಠಿಣ ಪರಿಶ್ರಮ ಪಡುತ್ತಿದ್ದಾರೆ. ಕೋವಿಡ್‌ 19 ಹಿನ್ನೆಲೆಯಲ್ಲಿ ಆತ್ಮ ನಿರ್ಭರ್‌ ಭಾರತ ಪ್ಯಾಕೇಜನ್ನೂ ಘೋಷಿಸಲಾಗಿತ್ತು ಎಂದು ಅವರು ಹೇಳಿದರು.

ಅಹಮದಾಬಾದ್‌ನಲ್ಲಿನ ಮೇಲ್ಸೇತುವೆ ಕಾಮಗಾರಿಯೊಂದನ್ನು ವರ್ಚುವಲ್‌ ವ್ಯವಸ್ಥೆ ಮೂಲಕ ಉದ್ಘಾಟಿಸಿದ ಅವರು, ಪ್ರಧಾನಿ ಮೋದಿಯವರು ಒಂದು ಕ್ಷಣವನ್ನೂ ವ್ಯರ್ಥಪಡಿಸದೆ ಸುಧಾರಣೆಗೋಸ್ಕರ ಕೃಷಿ, ವಿದ್ಯುತ್‌, ಕೈಗಾರಿಕಾ ನೀತಿ ಇತ್ಯಾದಿ ನಾನಾ ವಲಯಗಳಲ್ಲಿ ದುಡಿದಿದ್ದಾರೆ.

ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ ಜಿಡಿಪಿ 7.5% ಕುಸಿತ, ಚೇತರಿಕೆ ಹಾದಿಯಲ್ಲಿ ಆರ್ಥಿಕತೆ

ಇವೆಲ್ಲದರ ಪರಿಣಾಮವಾಗಿ ಜಿಡಿಪಿಯ ಇತ್ತೀಚಿನ ಅಂಕಿ ಅಂಶಗಳಲ್ಲಿ ಪಾಸಿಟಿವ್‌ ಹಂತಕ್ಕೇರಲು ಕೇವಲ 7 ಪರ್ಸೆಂಟ್‌ ಹಿಂದುಳಿದಿದ್ದೇವೆ. ಹೀಗಾಗಿ ಮುಂಬರುವ ತ್ರೈಮಾಸಿಕದಲ್ಲಿ ಪಾಸಿಟಿವ್‌ ಮಟ್ಟ ನಿರೀಕ್ಷಿಸಬಹುದು ಎಂದರು.

ಪ್ರಸಕ್ತ ಸಾಲಿನ ಮೊದಲ ತ್ರೈಮಾಸಿಕದಲ್ಲಿ(ಏಪ್ರಿಲ್‌-ಜೂನ್‌) ಜಿಡಿಪಿ ಮೈನಸ್‌ 23.9ಕ್ಕೆ ತಗ್ಗಿತ್ತು. ಎರಡನೇ ತ್ರೈಮಾಸಿಕದಲ್ಲಿ(ಜುಲೈ-ಸೆಪ್ಟೆಂಬರ್‌) ಮೈನಸ್‌ ಶೇ.7.5ಕ್ಕೆ ಸುಧಾರಿಸಿತ್ತು. ಉತ್ಪಾದನಾ ವಲಯದ ಚೇತರಿಕೆ ಇದಕ್ಕೆ ಸಹಕರಿಸಿತ್ತು.