ತೆರಿಗೆ ಇಳಿಸದೆಯೇ ತೈಲ ಬೆಲೆ ಇಳಿಸುವುದು ಹೇಗೆ?

ಹೊಸದಿಲ್ಲಿ: ದೇಶದಲ್ಲಿ ತೈಲ ಬೆಲೆ ಏರಿಕೆಯಾಗಿದ್ದು, ಗ್ರಾಹಕರಿಗೆ ಸಮಸ್ಯೆಯಾಗುತ್ತಿದೆ. ಜತೆಗೆ ಡೀಸೆಲ್ ಬೆಲೆ ಏರಿಕೆಯ ಪರಿಣಾಮ ಜನಸಾಮಾನ್ಯರ ಮೇಲೂ ಉಂಟಾಗಲಿದ್ದು, ದೈನಂದಿನ ಸರಕುಗಳ ಪೂರೈಕೆ ದುಬಾರಿಯಾಗುತ್ತಿದೆ. ಹೀಗಿರುವಾಗ ತೈಲದ ಮೇಲಿನ ತೆರಿಗೆ ಇಳಿಕೆ ಮಾಡದೆಯೇ ಇತರ ಕ್ರಮ ಅನುಸರಿಸುವ ಮೂಲಕವೂ ಇಂಧನ ಬೆಲೆ ಇಳಿಸಬಹುದು.

ಸೋಮವಾರ ದೇಶಾದ್ಯಂತ ಬಂದ್ ನಡೆಸಲಾಗಿದ್ದರೂ, ತೈಲ ಬೆಲೆ ಮಾತ್ರ ಏರಿಕೆಯಾಗುವುದು ನಿಂತಿಲ್ಲ. ದಿಲ್ಲಿಯಲ್ಲಿ ಪೆಟ್ರೋಲ್‌ ಲೀ. 80.73 ರೂ. ತಲುಪಿದ್ದರೆ, ಡೀಸೆಲ್ 72.83 ರೂ. ದರ ಹೊಂದಿದೆ.

ಕಳೆದ ನಾಲ್ಕು ವರ್ಷಗಳಲ್ಲಿ ಕೇಂದ್ರ ಸಂಗ್ರಹಿಸುವ ತೈಲದ ಮೇಲಿನ ಅಬಕಾರಿ ಸುಂಕ ಕೂಡ ದುಪ್ಪಟ್ಟಾಗಿದೆ. 2014-15ನೇ ಸಾಲಿನಲ್ಲಿ 99,184 ಕೋಟಿ ರೂ. ಅಬಕಾರಿ ಸುಂಕ ಸಂಗ್ರಹವಾಗಿದ್ದರೆ, 2017-18ನೇ ಸಾಲಿನಲ್ಲಿ ಅದು 2,29,019 ಕೋಟಿ ರೂ.ಗೆ ಏರಿಕೆಯಾಗಿದೆ.

ಜತೆಗೆ ರಾಜ್ಯಗಳು ವಿಧಿಸುವ ವ್ಯಾಟ್‌ ಕೂಡ ಏರಿಕೆಯಾಗಿದ್ದು, 1.37 ಲಕ್ಞ ಕೋಟಿ ರೂ.ನಿಂದ 1.84 ಲಕ್ಷ ಕೋಟಿ ರೂ.ಗೆ ಕಳೆದ ನಾಲ್ಕು ವರ್ಷದಲ್ಲಿ ಏರಿಕೆಯಾಗಿದೆ. ಆದರೆ ತೆರಿಗೆ ದರ ಇಳಿಸದೆಯೇ ತೈಲ ದರ ಇಳಿಸಲು ಈ ಕ್ರಮ ಕೈಗೊಳ್ಳಬಹುದಾಗಿದೆ.

ಜಿಎಸ್‌ಟಿ
ತೈಲದ ಮೇಲೆ ಜಿಎಸ್‌ಟಿ ವಿಧಿಸಿದರೆ ಅದರಿಂದ ತೈಲ ಬೆಲೆ ಸುಮಾರು ಅರ್ಧದಷ್ಟು ಕಡಿಮೆಯಾಗುತ್ತದೆ. ಪ್ರಸ್ತುತ ಜಿಎಸ್‌ಟಿ ಅಡಿ ಅತಿ ಹೆಚ್ಚು ಅಂದರೆ ಶೇ. 28 ಮಾತ್ರ ತೆರಿಗೆ ವಿಧಿಸಲಾಗುತ್ತದೆ.

ರಿಟೇಲರ್‌ಗಳಿಗೆ ಕಡಿಮೆ ದರದಲ್ಲಿ ಕಚ್ಚಾತೈಲ
ದೇಶದ ತೈಲ ಕಂಪನಿಗಳಿಗೆ ಒಟ್ಟು ಬೇಡಿಕೆ ಪೈಕಿ ಒಎನ್‌ಜಿಸಿ ಒಂದೇ ಶೇ. 20 ಕಚ್ಚಾ ತೈಲ ಪೂರೈಸುತ್ತದೆ. ಆದರೆ ಸರಕಾರ ರಿಟೇಲರ್‌ಗಳಿಗೆ ಕಡಿಮೆ ದರದಲ್ಲಿ ಕಚ್ಛಾ ತೈಲ ಪೂರೈಸಲು ಸೂಚಿಸಿದರೆ ತೈಲ ಬೆಲೆ ಕಡಿಮೆಯಾಗಬಹುದು. ಜತೆಗೆ ಅದಕ್ಕೆ ಪ್ರತಿಯಾಗಿ ಕಂಪನಿಯಿಂದ ಕಡಿಮೆ ಡಿವಿಡೆಂಡ್ ಪಡೆಯಬಹುದು.

ಫೂಚರ್ಸ್ ಟ್ರೇಡಿಂಗ್
ಫ್ಯೂಚರ್‌ ಟ್ರೇಡಿಂಗ್‌ ಅಥವಾ ವಾಯಿದಾ ವಹಿವಾಟಿನಲ್ಲಿ ಖರೀದಿದಾರರು ಹಾಗೂ ಮಾರಾಟಗಾರರ ನಡುವೆ ಭವಿಷ್ಯದ ನಿರ್ದಿಷ್ಟ ದಿನಾಂಕದಂದು ನಿರ್ದಿಷ್ಟ ದರಕ್ಕೆ ಉತ್ಪನ್ನ ಖರೀದಿಸುವ ಒಪ್ಪಂದ ನಡೆಯುತ್ತದೆ. ಇಲ್ಲಿ ದರ ಪೂರ್ವನಿರ್ಧಾರಿತವಾಗಿರುತ್ತದೆ. ಆದ್ದರಿಂದ ಗ್ರಾಹಕರಿಗೆ ಫ್ಯೂಚರ್‌ ಟ್ರೇಡಿಂಗ್‌ನಲ್ಲಿ ತೈಲ ಖರೀದಿಗೆ ಅವಕಾಶ ಕಲ್ಪಿಸಬಹುದು. ಇದರಿಂದ ಪೆಟ್ರೋಲ್‌ ಗ್ರಾಹಕರು ಒಂದು ತಿಂಗಳಿನ ನಂತರವೂ ಮಾರುಕಟ್ಟೆಯಲ್ಲಿ ದರ ಒಂದು ವೇಳೆ ಉನ್ನತ ಮಟ್ಟದಲ್ಲಿದ್ದರೂ, ನಿಗದಿಯಾದ ಕಡಿಮೆ ದರಕ್ಕೆ ಪಡೆಯಬಹುದು. ತೈಲ ಸಚಿವಾಲಯ ಈ ಪ್ರಸ್ತಾಪಕ್ಕೆ ಒಪ್ಪಿದ್ದರೂ, ಮಾರುಕಟ್ಟೆ ನಿಯಂತ್ರಕ ಸೆಬಿ ಅನುಮೋದಿಸಬೇಕಷ್ಟೇ.

ಕಚ್ಛಾ ತೈಲಕ್ಕೆ ದರಕಡಿತ
ಒಪೆಕ್ ಏಷ್ಯನ್ ರಾಷ್ಟ್ರಗಳಿಗೆ ಹೆಚ್ಚು ದರಕ್ಕೆ ಕಚ್ಚಾ ತೈಲ ಪೂರೈಸುತ್ತದೆ. ಆದರೆ ಪಾಶ್ಚಿಮಾತ್ಯ ರಾಷ್ಟ್ರಗಳಿಗೆ ಕಡಿಮೆ ದರಕ್ಕೆ ತೈಲ ಲಭಿಸುತ್ತದೆ. ಆದರೆ ಒಪೆಕ್ ಮೇಲೆ ಒತ್ತಡ ಹೇರಿ ಭಾರತಕ್ಕೆ ಕಡಿಮೆ ದರದಲ್ಲೇ ಕಚ್ಛಾ ತೈಲ ಪೂರೈಸಲು ಸರಕಾರ ಯತ್ನಿಸುತ್ತಿದೆ.