ಚಕ್ರಬಡ್ಡಿ ಎಂದರೇನು? ಅದರ ಲೆಕ್ಕಾಚಾರ ಹೇಗೆ?

ಬಡ್ಡಿಯ ಮೇಲೆ ಹಾಕುವ ಬಡ್ಡಿಯನ್ನು ಚಕ್ರಬಡ್ಡಿ ಎನ್ನುತ್ತಾರೆ. ಉದಾಹರಣೆ ನೋಡೋಣ- ನೀವು ಬ್ಯಾಂಕಿನಲ್ಲಿ ಪಿಪಿಎಫ್‌ ಖಾತೆ ತೆರೆದು ತಿಂಗಳಿಗೆ ಹತ್ತು ಸಾವಿರ ರೂಪಾಯಿ ಹೂಡಿಕೆ ಮಾಡುತ್ತೀರಿ ಎಂದುಕೊಳ್ಳಿ. ಬಡ್ಡಿಯ ದರ ಶೇ.7.9. ಮೊದಲ ತಿಂಗಳು ನಿಮ್ಮ ಹತ್ತು ಸಾವಿರದ ಮೇಲಿನ ಬಡ್ಡಿಯ ಮೊತ್ತ 65 ರೂಪಾಯಿ . ಮುಂದಿನ ತಿಂಗಳು ಮತ್ತೆ ನೀವು ಹತ್ತು ಸಾವಿರ ರೂ.ಗಳನ್ನು ನಿಗದಿತ ದಿನ ಅದೇ ಖಾತೆಯಲ್ಲಿ ಜಮಾ ಮಾಡಿದಾಗ ಬಡ್ಡಿಯನ್ನು ಹತ್ತುಸಾವಿರದ ಅರವತ್ತೈದು ರೂಪಾಯಿ ಮತ್ತು ಹೊಸದಾಗಿ ಜಮಾ ಮಾಡಿದ ಹತ್ತು ಸಾವಿರ ಕೂಡಿಸಿ ಒಟ್ಟು ಇಪ್ಪತ್ತು ಸಾವಿರದ ಅರವತ್ತೈದು ರೂಪಾಯಿಯ ಮೇಲೆ ಲೆಕ್ಕ ಹಾಕಲಾಗುತ್ತದೆ . ಸರಳವಾಗಿ ಹೇಳಬೇಕೆಂದರೆ ಪ್ರತಿ ತಿಂಗಳು ನಿಮ್ಮ ಹೂಡಿಕೆಯ ಮೊತ್ತದ ಮೇಲೆ ಬಂದ ಬಡ್ಡಿ ಮುಂದಿನ ತಿಂಗಳು ಬಡ್ಡಿ ದುಡಿಯುತ್ತದೆ. ಅಂದರೆ ಬಡ್ಡಿಯ ಮೇಲೆ ಬಡ್ಡಿ. ಇದನ್ನ ಹೂಡಿಕೆಯಲ್ಲಿ ಬಳಸಿಕೊಂಡರೆ ಹತ್ತಾರು ವರ್ಷದಲ್ಲಿ ಉತ್ತಮ ಹಣಕಾಸು ಸ್ಥಿತಿ ನಿಮ್ಮದಾಗುತ್ತದೆ .

ನಮ್ಮಲ್ಲಿ ಅನೇಕರಿಗೆ ಬ್ಯಾಂಕಿನಲ್ಲಿ ಸಾಲ ದೊರೆಯುವುದಿಲ್ಲ. ಏಕೆಂದರೆ ಅವರು ಕೇಳುವ ಹಲವಾರು ದಾಖಲೆ ಇರುವುದಿಲ್ಲ. ಜೊತೆಗೆ ಸಾಲ ನೀಡುವ ಪ್ರಕ್ರಿಯೆ ಕೂಡ ಹಲವಾರು ಮಜಲುಗಳನ್ನ ಹೊಂದಿದೆ. ಹೀಗಾಗಿ ಸುಲಭವಾಗಿ ಸಿಗುವ ಲೇವಾದೇವಿಗಾರರ ಬಳಿ ಹಣವನ್ನು ಸಾಲದ ರೂಪದಲ್ಲಿ ಪಡೆಯುತ್ತಾರೆ. ಇಲ್ಲಿ ಬಡ್ಡಿಯ ಮೇಲೆ ಚಕ್ರ ಬಡ್ಡಿಯನ್ನು ವಿಧಿಸುತ್ತಾ ಹೋಗುತ್ತಾರೆ. ಹೀಗಾಗಿ ಇದೊಂದು ಹೊರಬರಲಾಗದ ಸುಳಿಯಾಗಿ ಮಾರ್ಪಾಟಾಗುತ್ತದೆ. ಕೆಲವೊಮ್ಮೆ ಪಡೆದ ಮೂಲಧನಕ್ಕಿಂತ ಹೆಚ್ಚಿನ ಬಡ್ಡಿಯನ್ನು ಕಟ್ಟಿಯೂ ಸಾಲದ ಸುಳಿಯಿಂದ ಹೊರಬರಲಾಗದವರು ಇದ್ದಾರೆ.

ಚಕ್ರಬಡ್ಡಿ ಅಥವಾ ಕಾಪೌಂಡ್‌ ಇಂಟರೆಸ್ಟ್‌ ಎನ್ನುವುದರ ಮಹತ್ವ ತಿಳಿದರೆ ಮತ್ತು ಅದನ್ನು ಸರಿಯಾಗಿ ಬಳಸಿದರೆ ಆರ್ಥಿಕವಾಗಿ ನೀವು ನಿಶ್ಚಿಂತರಾಗಿರಬಹುದು .