ಪಿಪಿಎಫ್‌ನಿಂದ ಭಾಗಶಃ ಹಣ ಹಿಂಪಡೆಯುವುದು ಹೇಗೆ?

ಆದಾಯ ತೆರಿಗೆ ಉಳಿಸಲು ಮತ್ತು ಸಣ್ಣ ಉಳಿತಾಯಕ್ಕೆ ಪೂರಕವಾಗಿರುವ ಮಹತ್ವದ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಸಾರ್ವಜನಿಕ ಭವಿಷ್ಯ ನಿಧಿಯೂ(ಪಿಪಿಎಫ್‌) ಒಂದು. ಇದರ ಅವಧಿ ಹದಿನೈದು ವರ್ಷಗಳಾಗಿದ್ದು, ಅವಧಿ ಮುಗಿದಾಗಲಷ್ಟೇ ಪೂರ್ಣ ಹಣ ಪಡೆಯಲು ಸಾಧ್ಯ. ಬಡ್ಡಿ, ಚಕ್ರಬಡ್ಡಿಯೊಂದಿಗೆ ಉತ್ತಮ ರಿಟರ್ನ್ಸ್‌ ಲಭ್ಯ. ಆದರೆ, ಅವಧಿಯ ಮಧ್ಯೆಯೇ ಖಾತೆಯಿಂದ ಹಣ ಹಿಂಪಡೆಯಲು ಸಾಧ್ಯವೇ ಎನ್ನುವ ಪ್ರಶ್ನೆ ಅನೇಕರಲ್ಲಿದೆ. ಕೆಲವು ಸಂದರ್ಭಗಳಲ್ಲಿ ಭಾಗಶಃ ಹಣ ಹಿಂಪಡೆಯಲು ಅವಕಾಶವಿದೆ. ಎಷ್ಟು ಹಣ ಪಡೆಯಬಹುದು, ಪಡೆಯುವುದು ಹೇಗೆ ಎನ್ನುವ ಬಗ್ಗೆ ಇಲ್ಲಿದೆ ಮಾಹಿತಿ.

ಹಣ ಹಿಂಪಡೆಯಲು ಗಮನಿಸಿ...
ಪಿಪಿಎಫ್‌ ಖಾತೆ ಆರಂಭಿಸಿದ 5 ವರ್ಷಗಳು ಪೂರ್ಣವಾದ ಬಳಿಕ ನಿಮ್ಮ ಠೇವಣಿಯಲ್ಲಿ ಶೇ.50ರಷ್ಟನ್ನು ಹಿಂಪಡೆಯಲು ಸಾಧ್ಯವಿದೆ. ಉದಾಹರಣೆಗೆ 2013ರ ಫೆ.15ರಂದು ನೀವು ಪಿಪಿಎಫ್‌ ಖಾತೆ ತೆರೆದಿದ್ದೀರಿ ಎಂದು ಭಾವಿಸಿ. ನೀವು 2018-19ರ ಹಣಕಾಸು ವರ್ಷದಲ್ಲಷ್ಟೇ ಭಾಗಶಃ ಹಣ ಹಿಂಪಡೆಯಲು ಸಾಧ್ಯ. ನಂತರದ ಪ್ರತಿ ಹಣಕಾಸು ವರ್ಷದಲ್ಲೂ ಭಾಗಶಃ ಹಣ ಹಿಂಪಡೆಯಲು ಅವಕಾಶವಿದೆ.

ಎಷ್ಟು ಹಣ ಹಿಂಪಡೆಯಬಹುದು?
ಹಣಕಾಸು ವರ್ಷದ ಅಂತ್ಯಕ್ಕೆ ನಿಮ್ಮ ಪಿಪಿಎಫ್‌ ಖಾತೆಯಲ್ಲಿನ ಹಣದಲ್ಲಿ ಶೇ.50ರಷ್ಟನ್ನು ಪಡೆಯಬಹುದು.

'ಫಾರ್ಮ್‌-ಸಿ' ಬಳಸಿ
ನೀವು ಪಿಪಿಎಫ್‌ ಖಾತೆ ತೆರೆದಿರುವ ಅಂಚೆ ಕಚೇರಿ ಅಥವಾ ಬ್ಯಾಂಕ್‌ಗಳಲ್ಲಿ ಫಾರ್ಮ್‌-ಸಿ ದೊರೆಯುತ್ತದೆ. ಅದರಲ್ಲಿ ನಿಮ್ಮ ಖಾತೆ ಸಂಖ್ಯೆ, ಪಡೆಯಬೇಕಾದ ಮೊತ್ತವನ್ನು ನಮೂದಿಸಿ, ನಿಮ್ಮ ಸಹಿಯೊಂದಿಗೆ ಅಧಿಕಾರಿಗಳಿಗೆ ನೀಡಿ. ರೆವಿನ್ಯೂ ಸ್ಟಾಂಪ್‌ ಅನ್ನು ಅರ್ಜಿಗೆ ಅಂಟಿಸಬೇಕು.

ಯಾವ ದಾಖಲೆ ಕೇಳುತ್ತಾರೆ?
ವಿತ್‌ಡ್ರಾ ಅರ್ಜಿಯೊಂದಿಗೆ ಪಿಪಿಎಫ್‌ ಪಾಸ್‌ಬುಕ್‌ ಅಗತ್ಯ.

ಪ್ರಕ್ರಿಯೆ ಹೇಗೆ?
ಅರ್ಜಿ ಪಡೆದ ಸಿಬ್ಬಂದಿ, ನೀವು ಪಿಪಿಎಫ್‌ ಖಾತೆ ತೆರೆದಿರುವ ವರ್ಷ ಮತ್ತು ನೀವು ಹಣ ಹಿಂಪಡೆಯಲು ಅರ್ಹರೇ ಎನ್ನುವ ಅಂಶಗಳನ್ನು ಪರಿಶೀಲಿಸುತ್ತಾರೆ. ಎಲ್ಲವೂ ಸರಿಯಾಗಿದ್ದರೆ, ನಿಮ್ಮ ಬ್ಯಾಂಕ್‌ ಖಾತೆಗೆ ಅಥವಾ ಡಿಡಿ ಮೂಲಕ ಹಣವನ್ನು ನೀಡುತ್ತಾರೆ.

ಈ ಅಂಶ ಗಮನಿಸಿ
ನೀವು ಅವಧಿ ಮುಗಿದ ಬಳಿಕ ಅಥವಾ ಅವಧಿಗೆ ಮುನ್ನ - ಯಾವಾಗ ಪಿಪಿಎಫ್‌ ಹಣ ಹಿಂಪಡೆದರೂ ಆ ಮೊತ್ತವು ತೆರಿಗೆ ಮುಕ್ತವಾಗಿರುತ್ತದೆ.