ಈ ವರ್ಷ ಭರ್ಜರಿ ನೇರ ತೆರಿಗೆ ಸಂಗ್ರಹ, ಇಲ್ಲಿವರೆಗೆ 7.04 ಲಕ್ಷ ಕೋಟಿ ರೂ. ಆದಾಯ

ಹೊಸದಿಲ್ಲಿ: ಪ್ರಸಕ್ತ ಹಣಕಾಸು ವರ್ಷದಲ್ಲಿ ಈವರೆಗೆ 7.04 ಲಕ್ಷ ಕೋಟಿ ರೂ. ನಿವ್ವಳ ನೇರ ತೆರಿಗೆ ಸಂಗ್ರಹಗೊಂಡಿದ್ದು, ಶೇ. 23ರಷ್ಟು ಹೆಚ್ಚಳ ದಾಖಲಾಗಿದೆ ಎಂದು ಆದಾಯ ತೆರಿಗೆ ಇಲಾಖೆ ಮಂಗಳವಾರ ತಿಳಿಸಿದೆ."2021 - 22ನೇ ಸಾಲಿನಲ್ಲಿ 14.09 ಲಕ್ಷ ಕೋಟಿ ರೂ.ಗಳ ದಾಖಲೆ ಪ್ರಮಾಣದ ಅತಿ ಹೆಚ್ಚು ಆದಾಯ ಮತ್ತು ಕಾರ್ಪೊರೇಟ್‌ ತೆರಿಗೆಗಳ ಸಂಗ್ರಹ ಸಾಧಿಸಲಾಗಿದೆ," ಎಂದು ಕೇಂದ್ರೀಯ ನೇರ ತೆರಿಗೆಗಳ ಮಂಡಳಿ (ಸಿಬಿಡಿಟಿ) ಅಧ್ಯಕ್ಷ ನಿತೀನ್‌ ಗುಪ್ತಾ ಕಾರ್ಯಕ್ರಮವೊಂದರಲ್ಲಿ ಹೇಳಿದರು.

"ಕಳೆದ ವರ್ಷ ಸಂಗ್ರಹವಾಗಿದ್ದ ಭಾರೀ ಪ್ರಮಾಣದ ನೇರ ತೆರಿಗೆ ಸಂಗ್ರಹವು ಈ ವರ್ಷವೂ ಕೂಡ ಮುಂದುವರಿದಿದೆ. ಈ ತನಕ 7.04 ಲಕ್ಷ ಕೋಟಿ ರೂ.ಗಳ ನಿವ್ವಳ ನೇರ ತೆರಿಗೆ ಸಂಗ್ರಹಿಸುವ ಮೂಲಕ ಶೇ. 23ರಷ್ಟು ಹೆಚ್ಚಳ ಸಾಧಿಸಲಾಗಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲೂ ಇಷ್ಟೇ ಪ್ರಮಾಣದ ಹೆಚ್ಚಳ ಸಾಧಿಸಲಾಗಿತ್ತು,'' ಎಂದು ತಿಳಿಸಿದರು.

ನೇರ ತೆರಿಗೆ ಸಂಗ್ರಹ ಭಾರೀ ಏರಿಕೆ, ಜಿಎಸ್‌ಟಿ ಜತೆ ಡೈರೆಕ್ಟ್ ಟ್ಯಾಕ್ಸ್‌ ಸಂಗ್ರಹವೂ ಹೆಚ್ಚಳ

"ಆದಾಯ ತೆರಿಗೆ ಇ - ಫೈಲಿಂಗ್‌ ಪೋರ್ಟಲ್‌ ಸ್ಥಿರವಾಗಿದ್ದು, ಜುಲೈ 31ರ ಅಂತ್ಯಕ್ಕೆ ಸರಿಸುಮಾರು 5.83 ಕೋಟಿ ಆದಾಯ ತೆರಿಗೆ ರಿಟರ್ನ್ಸ್‌ ಫೈಲಿಂಗ್‌ ದಾಖಲಾಗಿವೆ. ಒಂದೇ ದಿನದಲ್ಲಿ 72 ಲಕ್ಷ ರಿಟರ್ನ್ಸ್‌ ಫೈಲಿಂಗ್‌ ಆಗಿರುವುದು ಹೊಸ ದಾಖಲೆ," ಎಂದು ಹೇಳಿದರು.

"ಪ್ರಸಕ್ತ ವರ್ಷ ಈ ತನಕ 1.41 ಲಕ್ಷ ಕೋಟಿ ರೂ.ಗಳನ್ನು ಆದಾಯ ತೆರಿಗೆ ಮರುಪಾವತಿ ಮಾಡಲಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಇದು ಶೇ. 83ರಷ್ಟು ಹೆಚ್ಚಳವಾಗಿದೆ. ಇಲಾಖೆಯು ಆದಾಯ ತೆರಿಗೆ ಸಂಗ್ರಹಕ್ಕೆ ತಂತ್ರಜ್ಞಾನವನ್ನು ಹೆಚ್ಚು ಬಳಕೆ ಮಾಡಿಕೊಳ್ಳುತ್ತಿದೆ,'' ಎಂದು ನಿತೀನ್‌ ಗುಪ್ತಾ ವಿವರಿಸಿದರು.

ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ 'ಎಕನಾಮಿಕ್ ಟೈಮ್ಸ್' ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.