ಸತತ 9ನೇ ಬಾರಿಗೆ ವಿದೇಶಿ ವಿನಿಮಯ ಸಂಗ್ರಹ ಕುಸಿತ, $593.2 ಬಿಲಿಯನ್‌ಗೆ ಇಳಿದ ಫಾರೆಕ್ಸ್‌ ರಿಸರ್ವ್‌

ಭಾರತದ ವಿದೇಶಿ ವಿನಿಮಯ ಮೀಸಲು ಸಂಗ್ರಹ (ಫಾರೆಕ್ಸ್‌ ರಿಸರ್ವ್‌) ಮತ್ತೆ 2.68 ಬಿಲಿಯನ್‌ ಡಾಲರ್‌ ಕುಸಿದಿದ್ದು ಸುಮಾರು 593.2 ಶತಕೋಟಿ ಡಾಲರ್‌ಗೆ (46.16 ಲಕ್ಷ ಕೋಟಿ ರೂ.) ಇಳಿಕೆಯಾಗಿದೆ. ಚಿನ್ನದ ಮೀಸಲಿನಲ್ಲಾದ ಗಣನೀಯ ಪ್ರಮಾಣದ ಕುಸಿತದಿಂದ ಮೇ 13ಕ್ಕೆ ಕೊನೆಗೊಂಡ ವಾರದಲ್ಲಿ ವಿದೇಶಿ ವಿನಿಮಯ ಮೀಸಲು 595 ಬಿಲಿಯನ್‌ ಡಾಲರ್‌ಗಿಂತಲೂ ಕೆಳಕ್ಕಿಳಿದಿದೆ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್‌ನ ಇತ್ತೀಚಿನ ಅಂಕಿ-ಅಂಶಗಳನ್ನು ತೋರಿಸಿವೆ.ವಿದೇಶಿ ಕರೆನ್ಸಿ ಆಸ್ತಿಗಳು 1.3 ಬಿಲಿಯನ್‌ ಡಾಲರ್‌ ಕುಸಿದಿದ್ದರೆ, ಇದೇ ವಾರದಲ್ಲಿ ಚಿನ್ನದ ಮೀಸಲು 1.17 ಬಿಲಿಯನ್‌ ಡಾಲರ್‌ ಕಡಿಮೆಯಾಗಿದೆ. ಅದಕ್ಕೂ ಹಿಂದಿನ ವಾರದಲ್ಲಿ ವಿದೇಶಿ ವಿನಿಮಯ ಸಂಗ್ರಹದ ಕುಸಿತದ ನಡುವೆಯೂ ಚಿನ್ನದ ಮೀಸಲು 135 ಮಿಲಿಯನ್‌ ಡಾಲರ್‌ ಏರಿಕೆ ಕಂಡಿತ್ತು.

ಕಳೆದ ವಾರ ಬರೋಬ್ಬರಿ 2 ಬಿಲಿಯನ್‌ ಡಾಲರ್‌ ಕುಸಿದಿದ್ದ ವಿದೇಶಿ ಕರೆನ್ಸಿ ಸ್ವತ್ತುಗಳ ಮೌಲ್ಯ ಈ ವಾರ ಸ್ವಲ್ಪ ಮಟ್ಟಿಗೆ ನಿಧಾನಗೊಂಡಿದ್ದು, 1.3 ಬಿಲಿಯನ್‌ ಡಾಲರ್‌ಗಳಷ್ಟು ಕುಸಿತ ಕಂಡಿದೆ. ಆದರೆ ಚಿನ್ನದ ಮೀಸಲಿನಲ್ಲಿ ತೀವ್ರ ಕುಸಿತ ಕಂಡಿದ್ದರಿಂದ ಒಟ್ಟಾರೆ ವಿದೇಶಿ ವಿನಿಮಯ ಮೀಸಲು ಸಂಗ್ರಹ ಭಾರೀ ಕುಸಿತ ಕಂಡಿದೆ.

ಒಂದೇ ವಾರದಲ್ಲಿ ವಿದೇಶಿ ವಿನಿಮಯ ₹85,000 ಕೋಟಿ ಇಳಿಕೆ, 4 ವಾರದಲ್ಲಿ ₹2 ಲಕ್ಷ ಕೋಟಿ ಕುಸಿತ!
ಈ ಕುಸಿತದೊಂದಿಗೆ ಸತತ ಒಂಬತ್ತನೇ ಬಾರಿಗೆ ವಿದೇಶಿ ವಿನಿಮಯ ಮೀಸಲು ಸಂಗ್ರಹ ಕುಸಿತ ಕಂಡಂತಾಗಿದೆ. ಜತೆಗೆ ಸುದೀರ್ಘ ಅವಧಿಯ ಬಳಿಕ ಫಾರೆಕ್ಸ್‌ ರಿಸರ್ವ್‌ 600 ಬಿಲಿಯನ್‌ ಡಾಲರ್‌ಗಿಂತ ಕೆಳಕ್ಕಿಳಿದಿದೆ. ವಿದೇಶಿ ವಿನಿಮಯ ಸಂಗ್ರಹದ ಕುಸಿತವನ್ನು ತಡೆಯಲು ಭಾರತೀಯ ರಿಸರ್ವ್‌ ಬ್ಯಾಂಕ್‌ ಯತ್ನಿಸುತ್ತಿದ್ದು, ಇದರ ಪರಿಣಾಮ ಕಳೆದೆರಡು ವಾರಗಳಲ್ಲಿ ಕುಸಿತ ಸ್ವಲ್ಪ ಮಟ್ಟಿಗೆ ಕಡಿಮೆಯಾಗಿದೆ.

ಇನ್ನು ಶುಕ್ರವಾರ ರೂಪಾಯಿ ಶೇ. 0.23ರಷ್ಟು ಏರಿಕೆಯಾಗಿ 77.55 ಡಾಲರ್‌ಗೆ ತಲುಪಿತು. ಇದು ಮಂಗಳವಾರ ಡಾಲರ್‌ ವಿರುದ್ಧ 77.80 ರೂ.ಗಳ ಹೊಸ ಸಾರ್ವಕಾಲಿಕ ಕನಿಷ್ಠ ಮಟ್ಟವನ್ನು ತಲುಪಿತ್ತು.