ನಕಲಿ ನೋಟುಗಳು ಚಲಾವಣೆಯಲ್ಲಿ ಭಾರಿ ಹೆಚ್ಚಳ: ಆರ್‌ಬಿಐ ವರದಿ

ಹೊಸದಿಲ್ಲಿ: ಹೆಚ್ಚಿನ ಸುರಕ್ಷಿತ ಅಂಶಗಳನ್ನು ಒಳಗೊಂಡಿರುವ ಹೊಸ ನೋಟುಗಳು ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ (ಆರ್‌ಬಿಐ) ಬಿಡುಗಡೆ ಮಾಡಿದ್ದರೂ ನಕಲಿ ನೋಟುಗಳ ಹಾವಳಿ ಮಾತ್ರ ನಿಂತಿಲ್ಲ. 2018-19ನೇ ವರ್ಷದಲ್ಲಿ ನಕಲಿ ನೋಟುಗಳ ಚಲಾವಣೆಯಲ್ಲಿ ಭಾರಿ ಏರಿಕೆ ಆಗಿದೆ ಎಂಬುದಾಗಿ ಸ್ವತಃ ಆರ್‌ಬಿಐನ ವರದಿ ಹೇಳಿದೆ.

ಗುರುವಾರ 2018-19ರ ವಾರ್ಷಿಕವರದಿಯನ್ನು ಆರ್‌ಬಿಐ ಬಿಡುಗಡೆ ಮಾಡಿದ್ದು, ಈ ಹಿಂದಿನ ವರ್ಷಕ್ಕೆ ಹೋಲಿಸಿದರೆ ರೂ. 500 ಮುಖಬೆಲೆಯ ನೋಟುಗಳು ಮತ್ತು ರೂ. 2000 ಮುಖಬೆಲೆಯ ನಕಲಿ ನೋಟುಗಳ ಸಂಖ್ಯೆಯಲ್ಲಿ ಕ್ರಮವಾಗಿ ಶೇ. 121 ಮತ್ತು ಶೇ. 21.9ರಷ್ಟು ಏರಿಕೆಯಾಗಿದೆ ಎಂದು ಹೇಳಿದೆ. 2017ರ ಆಗಸ್ಟ್‌ನಲ್ಲಿ ಬಿಡುಗಡೆಯಾದ ರೂ. 200 ಮುಖಬೆಲೆಯ ನೂತನ ನೋಟುಗಳಿಗೂ ನಕಲಿಗಳ ಕಾಟ ಆರಂಭಗೊಂಡಿದ್ದು ಬರೋಬ್ಬರಿ 12,728 ನಕಲಿ ನೋಟುಗಳು ಪತ್ತೆಯಾಗಿವೆ. ಈ ಹಿಂದಿನ ವರ್ಷ ಪತ್ತೆಯಾದ ನಕಲಿ ನೋಟುಗಳು ಕೇವಲ 79 ಎಂಬುದನ್ನು ಇಲ್ಲಿ ಸ್ಮರಿಸಬಹುದು.

2018-19ನೇ ವರ್ಷದಲ್ಲಿ ದೇಶದಲ್ಲಿ ಪತ್ತೆಯಾದ ಒಟ್ಟು ನಕಲಿ ನೋಟುಗಳಲ್ಲಿ ಶೇ. 5.6ನ್ನು ಆರ್‌ಬಿಐ ಪತ್ತೆ ಹಚ್ಚಿದ್ದರೆ, ಶೇ. 94.4 ನೋಟುಗಳನ್ನು ಇತರ ಖಾಸಗಿ ಬ್ಯಾಂಕ್‌ಗಳು ಪತ್ತೆ ಹಚ್ಚಿವೆ. ಕಳೆದ ಆರ್ಥಿಕ ವರ್ಷಕ್ಕೆ ಹೋಲಿಸಿದರೆ ಈ ವರ್ಷದಲ್ಲಿ ರೂ. 10, 20 ಮತ್ತು 50ರ ಮುಖಬೆಲಯ ನಕಲಿ ನೋಟುಗಳಲ್ಲಿಯೂ ಕ್ರಮವಾಗಿ ಶೇ. 20.2, 87.2 ಮತ್ತು 57.3ರಷ್ಟು ಏರಿಕೆಯಾಗಿದೆ.

ಈ ಅವಧಿಯಲ್ಲಿ ದೇಶದಲ್ಲಿ ಆರ್‌ಟಿಜಿಎಸ್‌ ಸೌಲಭ್ಯದ ಮೂಲಕ 13.7 ಕೋಟಿ ಹಣಕಾಸು ವ್ಯವಹಾರ ನಡೆದಿದ್ದು ರೂ. 1357 ಟ್ರಿಲಿಯನ್‌ ಹಣ ವರ್ಗಾವಣೆಯಾಗಿದೆ. ಇನ್ನು 230 ಕೋಟಿ ನೆಫ್ಟ್‌ ವ್ಯವಹಾರಗಳು ನಡೆದಿದ್ದು 228 ಟ್ರಿಲಿಯನ್‌ ರೂಪಾಯಿ ಹಣ ವರ್ಗಾವಣೆಯಾಗಿದೆ. 2019ರ ಮಾರ್ಚ್‌ ಅಂತ್ಯಕ್ಕೆ ದೇಶದ 1,44,927 ಶಾಖೆಗಳಲ್ಲಿ ನೆಫ್ಟ್‌ ಸೌಲಭ್ಯ ಲಭ್ಯವಿದೆ. ಇದರ ಜೊತೆಗೆ ದೊಡ್ಡ ಸಂಖ್ಯೆಯಲ್ಲಿ ಬ್ಯುಸಿನೆಸ್‌ ಕರೆಸ್ಪಾಂಡೆನ್ಸ್‌ ಔಟ್‌ಲೆಟ್‌ಗಳೂ ಕಾರ್ಯಚರಿಸುತ್ತಿವೆ.

ದೇಶದಲ್ಲಿ ಚಲಾವಣೆಯಲ್ಲಿ ಹಣದ ಮೌಲ್ಯದಲ್ಲಿ ಕಳೆದೊಂದು ವರ್ಷದಲ್ಲಿ ಶೇಕಡಾ 17ರಷ್ಟು ಏರಿಕೆಯಾಗಿದ್ದರೆ, ನೋಟುಗಳ ಸಂಖ್ಯೆಯಲ್ಲಿ ಶೇ. 6.2ರಷ್ಟು ಏರಿಕೆಯಾಗಿದೆ. ದೇಶದಲ್ಲಿ 2019ರ ಮಾರ್ಚ್‌ ಅಂತ್ಯಕ್ಕೆ ರೂ. 21,109 ಬಿಲಿಯನ್‌ ಹಣ ಮತ್ತು 108,757 ಮಿಲಿಯನ್‌ ನೋಟುಗಳು ಚಲಾವಣೆಯಲ್ಲಿವೆ. ಇದರಲ್ಲಿ ರೂ. 500 ಮತ್ತು 2000 ಮುಖಬೆಲೆಯ ಹಣದ ಪಾಲು ಹೆಚ್ಚಾಗಿದ್ದು ಶೇ. 82.2ರಷ್ಟಿವೆ.