ಗ್ರಾಹಕರ ತೃಪ್ತಿ ಸಮೀಕ್ಷೆಯಲ್ಲಿ ಹುಂಡೈಗೆ ಮಣೆ: ಸಮೀಕ್ಷೆ

ಹೊಸದಿಲ್ಲಿ: ಗ್ರಾಹಕರ ತೃಪ್ತಿಗೆ ಸಂಬಂಧಿಸಿದ ಸಮೀಕ್ಷೆಯಲ್ಲಿ ಹುಂಡೈ ಮೋಟಾರ್‌ ಇಂಡಿಯಾ, ಇತರೆ ಪ್ರಮುಖ ಬ್ರಾಂಡ್‌ಗಳನ್ನು ಹಿಂದಿಕ್ಕಿ ಮೊದಲ ಸ್ಥಾನದಲ್ಲಿದೆ ಎಂದು ಜಾಗತಿಕ ಮಾರುಕಟ್ಟೆ ಅಧ್ಯಯನ ಸಂಸ್ಥೆ ಜೆಡಿ ಪವರ್‌ ಹೇಳಿದೆ.

ದೇಶದ ಎರಡನೇ ಬೃಹತ್‌ ಕಾರ್‌ ಮಾರಾಟ ಕಂಪನಿಯಾದ ಹುಂಡೈ, ಈ ಸಮೀಕ್ಷೆಯಲ್ಲಿ 912 ಪಾಯಿಂಟ್‌ ಗಳಿಸಿದೆ ಎಂದು ಜೆಡಿ ಪವರ್‌ 2018ರ ಇಂಡಿಯಾ ಗ್ರಾಹಕರ ಸೇವಾ ಸೂಚ್ಯಂಕ(ಮಾಸ್‌ ಮಾರ್ಕೆಟ್‌) ಅಧ್ಯಯನದಲ್ಲಿ ಹೇಳಲಾಗಿದೆ.

ದಕ್ಷಿಣ ಕೊರಿಯಾ ಮೂಲದ ಈ ಕಂಪನಿಯು ಮಾಸ್‌ ಮಾರ್ಕೆಟ್‌ ವಿಭಾಗದಲ್ಲಿ ಕಳೆದ ವರ್ಷವೂ ಮೊದಲ ರಾರ‍ಯಂಕನ್ನು ಗಳಿಸಿತ್ತು. ಟಾಟಾ ಮೋಟಾರ್ಸ್‌ 874 ಅಂಕ ಪಡೆದಿದ್ದು ಎರಡನೇ ರ‍್ಯಾಂಕ್ ಪಡೆದಿದೆ. ಮಹೀಂದ್ರಾ ಆ್ಯಂಡ್‌ ಮಹೀಂದ್ರಾ ಮೂರನೇ ಸ್ಥಾನದಲ್ಲಿದ್ದು 865 ಅಂಕ ಪಡೆದಿದೆ. ಫೋರ್ಡ್‌ 829 ಅಂಕ, ಟೊಯೊಟಾ 827, ಕಾರ್‌ ಮಾರುಕಟ್ಟೆಯ ನಾಯಕ ಮಾರುತಿ ಸುಜುಕಿ 804 ಅಂಕದೊಂದಿಗೆ 8ನೇ ಸ್ಥಾನದಲ್ಲಿದೆ ಎಂದು ಅಧ್ಯಯನದಲ್ಲಿ ಹೇಳಲಾಗಿದೆ.

22ನೇ ವರ್ಷದ ಅಧ್ಯಯನ ಇದಾಗಿದ್ದು, ಮಾರಾಟದ ಬಳಿಕ ವಾಹನಗಳಿಗೆ ಕಂಪನಿಗಳು ನೀಡುವ ಸೇವೆ, ಡೀಲರ್‌ಗಳ ಕಾರ್ಯಕ್ಷಮತೆ ಮತ್ತಿತರ ಅಂಶಗಳನ್ನು ಗ್ರಾಹಕರ ತೃಪ್ತಿ ಅಳೆಯಲು ಬಳಸಲಾಗುತ್ತದೆ.