ತೆರಿಗೆ, ಕಮೀಷನ್‌ ಹೊರತುಪಡಿಸಿದರೆ ಪ್ರತಿ ಲೀಟರ್‌ ಪೆಟ್ರೋಲ್‌ಗೆ ವೆಚ್ಚ 34 ರೂ.

ಹೊಸದಿಲ್ಲಿ : ತೆರಿಗೆಗಳು ಮತ್ತು ಡೀಲರ್‌ಗಳ ಕಮೀಷನ್‌ ಇಲ್ಲದಿದ್ದರೆ ದಿಲ್ಲಿ ಹಾಗೂ ಸ್ಥಳೀಯ ಪ್ರದೇಶಗಳಲ್ಲಿ (ಎನ್‌ಸಿಆರ್‌) ಪ್ರತಿ ಲೀಟರ್‌ ಪೆಟ್ರೋಲ್‌ಗೆ 34 ರೂ. ಹಾಗೂ ಡೀಸೆಲ್‌ಗೆ 38.67 ರೂ. ವೆಚ್ಚ ತಗಲುತ್ತದೆ ಎಂದು ಲೋಕಸಭೆಗೆ ಸರಕಾರ ತಿಳಿಸಿದೆ.

ಪೆಟ್ರೋಲಿಯಂ ಉತ್ಪನ್ನಗಳ ದರಗಳಿಗೆ ಸಂಬಂಧಿಸಿ ವಿವರ ನೀಡಿದ ಹಣಕಾಸು ಖಾತೆ ಸಹಾಯಕ ಸಚಿವ ಶಿವ್‌ ಪ್ರತಾಪ್‌ ಶುಕ್ಲಾ ಈ ವಿಷಯ ತಿಳಿಸಿದರು.

ಎನ್‌ಸಿಆರ್‌ ವ್ಯಾಪ್ತಿಯಲ್ಲಿ ಡಿಸೆಂಬರ್‌ 19ರಂದು ಪೆಟ್ರೋಲ್‌ನ ರಿಟೇಲ್‌ ದರ ಲೀಟರ್‌ಗೆ 70.63 ರೂ. ಇತ್ತು. ಇದರಲ್ಲಿ 17.98 ರೂ. ಕೇಂದ್ರೀಯ ಅಬಕಾರಿ ಸುಂಕ, 15.02 ರೂ. ರಾಜ್ಯದ ವ್ಯಾಟ್‌ ಮತ್ತು 3.59 ರೂ. ಡೀಲರ್‌ ಕಮೀಶನ್‌ ಇತ್ತು. ಡೀಸೆಲ್‌ ರಿಟೇಲ್‌ ದರ 64.54 ರೂ. ಇತ್ತು. ಇದರಲ್ಲಿ 13.83 ರೂ. ಕೇಂದ್ರ ಅಬಕಾರಿ ಸುಂಕ, 9.51 ರೂ. ರಾಜ್ಯದ ವ್ಯಾಟ್‌ ಮತ್ತು 2.53 ರೂ. ಡೀಲರ್‌ ಕಮೀಶನ್‌ ಇತ್ತು.

ಕಳೆದ 2017-18ರ ಸಾಲಿನಲ್ಲಿ ಕೇಂದ್ರ ಸರಕಾರ ಪೆಟ್ರೋಲ್‌ ದರದಲ್ಲಿ 73,516.8 ಕೋಟಿ ರೂ. ಅಬಕಾರಿ ಸುಂಕ ಸಂಗ್ರಹಿಸಿತ್ತು. ಡೀಸೆಲ್‌ನಲ್ಲಿ 1.5 ಲಕ್ಷ ಕೋಟಿ ರೂ. ಸಂಗ್ರಹಿಸಿತ್ತು. ಪ್ರಸಕ್ತ ಸಾಲಿನ ಮೊದಲ 6 ತಿಂಗಳಲ್ಲಿ ಪೆಟ್ರೋಲ್‌ನಲ್ಲಿ 25,318.1 ಕೋಟಿ ರೂ. ಮತ್ತು ಡೀಸೆಲ್‌ನಲ್ಲಿ 46,548.8 ಕೋಟಿ ರೂ. ಅಬಕಾರಿ ಸುಂಕ ಸಂಗ್ರಹಿಸಿದೆ ಎಂದರು.

ಕಳೆದ ಅಕ್ಟೋಬರ್‌ನಲ್ಲಿ ಕೇಂದ್ರ ಸರಕಾರ ಅಬಕಾರಿ ಸುಂಕ ಕಡಿತಗೊಳಿಸಿತ್ತು. ಇದರಿಂದ ಇದುವರೆಗೆ ಅಂದಾಜು 7000 ಕೋಟಿ ರೂ. ನಷ್ಟವಾಗಿದೆ ಎಂದರು.