ಕೈಗಾರಿಕಾ ಉತ್ಪಾದನಾ ಸೂಚ್ಯಂಕ ಗಣನೀಯ ಇಳಿಕೆ

ಹೊಸದಿಲ್ಲಿ: ಕೈಗಾರಿಕಾ ಉತ್ಪಾದನೆಯ ಬೆಳವಣಿಗೆ ಮಾರ್ಚ್‌ನಲ್ಲಿ ತೀವ್ರ ಕುಸಿದಿದೆ. ಕೈಗಾರಿಕಾ ಉತ್ಪಾದನೆ ಸೂಚ್ಯಂಕ(ಐಐಪಿ) ಮಾರ್ಚ್‌ನಲ್ಲಿ ಶೇ.4.4ರಷ್ಟಿದ್ದು, ಇದು ಕಳೆದ 5 ತಿಂಗಳಲ್ಲಿನ ಕನಿಷ್ಠ ಮಟ್ಟ. ಫೆಬ್ರವರಿಯಲ್ಲಿ ಅದು ಶೇ.7.1ರಷ್ಟಿತ್ತು. ಆ ವೇಗ ಈಗ ತಗ್ಗಿದೆ. ಬಂಡವಾಳ ಸರಕುಗಳು, ಗಣಿಗಾರಿಕೆ ವಲಯದಲ್ಲಿನ ಉತ್ಪಾದನೆ ಕುಸಿತದಿಂದ ಕೈಗಾರಿಕಾ ಉತ್ಪಾದನೆ ಗಣನೀಯವಾಗಿ ಕುಸಿದಿದೆ.

ಕೈಗಾರಿಕಾ ಬೆಳವಣಿಗೆಯನ್ನು ಐಐಪಿ ಮೂಲಕ ಅಳೆಯಲಾಗುತ್ತದೆ. ಕೇಂದ್ರೀಯ ಅಂಕಿಅಂಶಗಳ ಕಾರ್ಯಾಲಯ(ಸಿಎಸ್‌ಒ) ಮಾಹಿತಿ ಬಿಡುಗಡೆ ಮಾಡಿದ್ದು, ಮಾರ್ಚ್‌ಗೆ ಅಂತ್ಯವಾದ 2017-18ರ ಸಾಲಿನಲ್ಲಿ ಒಟ್ಟಾರೆ ಐಐಪಿ ಶೇ.4.3ಕ್ಕೆ ಇಳಿಕೆಯಾಗಿದೆ. ಕಳೆದ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ಶೇ.4.6ರ ಬೆಳವಣಿಗೆ ದಾಖಲಾಗಿತ್ತು.

ಐಐಪಿಯಲ್ಲಿ ಶೇ.77ರಷ್ಟು ಭಾಗವಾಗಿರುವ ಉತ್ಪಾದನಾ ವಲಯದ ಬೆಳವಣಿಗೆ ಮಾರ್ಚ್‌ನಲ್ಲಿ ಶೇ.4.4ರಷ್ಟಿದೆ. ವರ್ಷದ ಹಿಂದೆ ಇದೇ ಅವಧಿಯಲ್ಲಿ ಅದು ಶೇ.3.3ರಷ್ಟಿತ್ತು.

ಗಣಿ ವಲಯದಲ್ಲಿ ಬೆಳವಣಿಗೆ ತೀವ್ರ ಇಳಿಕೆಯಾಗಿದ್ದು ಶೇ.2.8ಕ್ಕೆ ಕುಸಿದಿದೆ. ವರ್ಷದ ಹಿಂದೆ ಇದೇ ಅವಧಿಯಲ್ಲಿ ಅದು ಶೇ.10.1ರಷ್ಟಿತ್ತು. ಅದೇ ರೀತಿ ವಿದ್ಯುತ್‌ ಉತ್ಪಾದನೆಯೂ ಶೇ.5.9ಕ್ಕೆ ಇಳಿದಿದೆ. 2017ರ ಮಾರ್ಚ್‌ನಲ್ಲಿ ಅದು ಶೇ.6.2ರಷ್ಟಿತ್ತು.

ಬಂಡವಾಳ ಸರಕುಗಳು ಉತ್ಪಾದನೆಯು ಶೇ.9.4ರಿಂದ(ಕಳೆದ ವರ್ಷದ ಮಾರ್ಚ್‌ನಲ್ಲಿ) ಈಗ ಶೇ.1.8ಕ್ಕೆ ಕುಸಿದಿದೆ. ಆದಾಗ್ಯೂ, ಗ್ರಾಹಕರ ಬಳಕೆ ಉತ್ಪನ್ನಗಳ ಬೆಳವಣಿಗೆ ದರ ಶೇ.2.9ಕ್ಕೆ ಏರಿದೆ. ವರ್ಷದ ಹಿಂದೆ ಅದು ಕೇವಲ ಶೇ.0.6ರಷ್ಟಿತ್ತು.