ಅಮೆರಿಕದಲ್ಲಿ ಅಕ್ರಮ ವಲಸಿಗರ ಗಡಿಪಾರು ಅ.1ರಿಂದ ಆರಂಭ

ವಾಷಿಂಗ್ಟನ್‌ : ಅಮೆರಿಕದಲ್ಲಿ ಅಕ್ರಮವಾಗಿ ನೆಲಸಿರುವವರ ಗಡಿಪಾರು ಪ್ರಕ್ರಿಯೆ ಅಕ್ಟೋಬರ್‌ 1ರಿಂದ (ಸೋಮವಾರ) ಆರಂಭವಾಗಲಿದೆ. ಇದರಿಂದ ಅಮೆರಿಕದಲ್ಲಿ ಸೂಕ್ತ ಸಾಖಲಾತಿಗಳಿಲ್ಲದೆ ನೆಲಸಿರುವ ಭಾರತೀಯರಿಗೂ ತೊಂದರೆಯಾಗುವ ನಿರೀಕ್ಷೆ ಇದೆ.

ವೀಸಾ ನಿರಾಕರಣೆ ಅಥವಾ ನಾನಾ ಕಾರಣಗಳಿಂದ ಅಮೆರಿಕದಲ್ಲಿ ಅವಧಿ ಮುಗಿದ ನಂತರ ಕೂಡ ನೆಲೆಸಿರುವ ವಿದೇಶಿಗರನ್ನು ಗಡಿಪಾರು ಮಾಡುವ ಪ್ರಕ್ರಿಯೆ ನಡೆಯಲಿದೆ. ತನ್ನ ನೂತನ ಗಡಿಪಾರು ನೀತಿಯ ಅಂಗವಾಗಿ ಟ್ರಂಪ್‌ ಸರಕಾರ ಈ ಕ್ರಮ ಜಾರಿಗೊಳಿಸುತ್ತಿದೆ.

ಹೀಗಿದ್ದರೂ, ಎಚ್‌-1ಬಿ ವೀಸಾದಾರರಿಗೆ ಇದರಿಂದ ತಾತ್ಕಾಲಿಕವಾಗಿ ವಿನಾಯಿತಿ ನೀಡಲಾಗಿದೆ. ಅಮೆರಿಕದ ಪೌರತ್ವ ಮತ್ತು ವಲಸೆ ಸೇವೆ ವಿಭಾಗದ ಅಧಿಕಾರಿಗಳು ಅಕ್ರಮ ವಲಸಿಗರನ್ನು ಗಡಿಪಾರು ಮಾಡುವ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ.

ಲಕ್ಷಾಂತರ ಭಾರತೀಯರಿಗೆ ಆಪತ್ತು?

ಅಮೆರಿಕದಲ್ಲಿ 2016ರ ವೇಳೆಗೆ ಸುಮಾರು 5 ಲಕ್ಷ ಭಾರತೀಯರು ಸರಿಯಾದ ದಾಖಲೆಗಳಿಲ್ಲದೆ ವಾಸ್ತವ್ಯದಲ್ಲಿ ಇದ್ದಾರೆ ಎಂದು ಪ್ಯೂ ರಿಸರ್ಚ್‌ ಸೆಂಟರ್‌ ಸಂಸ್ಥೆಯ ವರದಿ ತಿಳಿಸಿದೆ.