ಓದುಗರ ಪ್ರಶ್ನೆ:
ಕೆಲವು ದಿನಗಳ ಹಿಂದೆ ನಾನು ಒಂದು ಕಾರ್ ಖರೀದಿಸಿದ್ದೇನೆ. ಕಾರನ್ನು ವಶಕ್ಕೆ ಪಡೆಯುವ ಮೊದಲೇ ಇನ್ಷೂರೆನ್ಸ್ ಕಾಗದಗಳಿಗೆ ಸಹಿ ಹಾಕಿದ್ದೇನೆ. ದುರದೃಷ್ಟವಶಾತ್ ಕಾರನ್ನು ಮನೆಗೆ ತಂದ ಮಾರನೇ ದಿನವೇ ಎರಡು ಟೈರ್ಗಳು ಮತ್ತು ಸೌಂಡ್ ಸಿಸ್ಟಮ್ ಕಳುವಾಯಿತು. ಈ ಬಗ್ಗೆ ಮನೆ ಸಮೀಪದ ಪೊಲೀಸ್ ಠಾಣೆಗೆ ದೂರನ್ನೂ ಸಲ್ಲಿಸಿದ್ದೇನೆ. ಅದರ ಪ್ರತಿಯೂ ನನ್ನ ಬಳಿ ಇದೆ. ಕಾರ್ ಮನೆಗೆ ಬಂದ ಮಾರನೇ ದಿನವೇ ಅದರ ಬಿಡಿ ಭಾಗಗಳು ಕಳುವಾಗಿದ್ದು, ನನ್ನ ದೂರನ್ನು ವಿಮಾ ಕಂಪನಿ ಪರಿಗಣಿಸುವುದೇ? ಪೊಲೀಸರು ಕಳುವಾದ ವಸ್ತುಗಳನ್ನು ಹುಡುಕುತ್ತಾರೆ ಎನ್ನುವ ವಿಶ್ವಾಸ ನನಗಂತೂ ಇಲ್ಲ. ಈಗ ಏನು ಮಾಡಬೇಕು?
ತಜ್ಞರ ಸಲಹೆ:
ರಿಸ್ಕ್ಗಳು ವಿಮಾ ಕಂಪನಿ ವ್ಯಾಪ್ತಿಗೆ ಬರುವುದಾದರೆ, ವಿಮೆ ಕಂತನ್ನು ಪಾವತಿಸಿದ ದಿನದಿಂದಲೇ ಅದು ಅನ್ವಯವಾಗುತ್ತದೆ. ಮೋಟಾರ್ ಇನ್ಷೂರೆನ್ಸ್ ಪಾಲಿಸಿಗಳಲ್ಲಿ ಮೂಲ ಪ್ರತಿಯನ್ನು ನೀಡುವ ಮೊದಲೇ, ತಾತ್ಕಾಲಿಕ ಪ್ರತಿಯನ್ನು ನೀಡುವ ಪರಿಪಾಠವಿದೆ. ನೀವು ಕಾರ್ ಖರೀದಿಸಿದ ಸಮಯದಲ್ಲಿ ಅಥವಾ ಅದನ್ನು ನಿಮ್ಮ ಕೈಗೆ ಹಸ್ತಾಂತರಿಸುವಾಗಲೇ, ಆ ತಾತ್ಕಾಲಿಕ ಪ್ರತಿಯನ್ನು ನೀಡುತ್ತಾರೆ. ನಿಮ್ಮ ಬಳಿ ಅದು ಇದ್ದ ಪಕ್ಷದಲ್ಲಿ, ಪರಿಹಾರಕ್ಕಾಗಿ ಕ್ಲೇಮ್ ಮಾಡಬಹುದು. ತಡಮಾಡದೇ, ನಿಮಗಾಗಿರುವ ನಷ್ಟದ ಬಗ್ಗೆ ಕೂಡಲೇ ವಿಮೆ ಕಂಪನಿಗೆ ಮಾಹಿತಿ ನೀಡಿ. ಕಂಪನಿಯು ಸ್ಥಳಕ್ಕೆ ಬಂದು ನಷ್ಟವನ್ನು ಅಂದಾಜು ಮಾಡಲು ಪ್ರತಿನಿಧಿಯೊಬ್ಬರನ್ನು ಕಳುಹಿಸುತ್ತದೆ. ಮುಂದೆ ಏನು ಮಾಡಬೇಕೆಂದೂ ಅವರು ನಿಮಗೆ ಸಲಹೆ ನೀಡುತ್ತಾರೆ.