ಬಜೆಟ್‌ 2018: ಆದಾಯ ತೆರಿಗೆಯಲ್ಲಿಲ್ಲ ಬದಲಾವಣೆ

ಹೊಸದಿಲ್ಲಿ: ಕೇಂದ್ರ ಬಜೆಟ್‌ 2018 ಮಂಡಿಸಿದ ವಿತ್ತ ಸಚಿವ ಅರುಣ್‌ ಜೇಟ್ಲಿ, ಆದಾಯ ತೆರಿಗೆಯಲ್ಲಿ ಯಾವುದೇ ಬದಲಾವಣೆ ಇಲ್ಲ, ಹಿಂದಿನ ತೆರಿಗೆಯೇ ಮುಂದುವರಿಯಲಿದೆ ಎಂದು ಘೋಷಿಸಿದ್ದಾರೆ. ಲೋಕಸಭೆ ಚುನಾವಣಾ ಪೂರ್ವ ಮುಂಗಡ ಪತ್ರ ಮಂಗಡ ಪತ್ರವು ಪ್ರಸ್ತುತ ಎನ್‌ಡಿಎ ಸರಕಾರದ ಕೊನೆಯ ಬಜೆಟ್‌ ಆಗಿದೆ.

2017-18ರ ಆರ್ಥಿಕ ವರ್ಷದಲ್ಲಿ 85.51 ಲಕ್ಷ ಹೊಸ ತೆರಿಗೆ ಪಾವತಿದಾರರು ಸೇರ್ಪಡೆಗೊಂಡಿದ್ದು, ತೆರಿಗೆ ಪಾವತಿ ಜಾಲವು ವಿಸ್ತರಿಸುತ್ತಿದೆ.

ನೇರ ಮತ್ತು ಪರೋಕ್ಷ ತೆರಿಗೆಯ ಆರೋಗ್ಯಕರ ವಿಸ್ತೃತ ಪಟ್ಟಿಯನ್ನು ಜನವರಿ 29ರಂದು ಇಕಾನಮಿಕ್‌ ಸರ್ವೆ ಆಫ್‌ ಇಂಡಿಯಾ ಪ್ರಸ್ತುತ ಪಡಿಸಿತ್ತು. ಸಮೀಕ್ಷೆ ಪ್ರಕಾರ ತೆರಿಗೆ ಪಾವತಿ ಜಾಲವು ವಿಸ್ತರಿಸುತ್ತಿದ್ದು 18 ಲಕ್ಷ ಹೊಸ ವೈಯಕ್ತಿಕ ತೆರಿಗೆದಾರರು ಸೇರ್ಪಡೆಗೊಂಡಿದ್ದಾರೆ. ಸ್ವಯಂ ಪ್ರೇರಿತ ದಾಖಲಾತಿಗಳು ಹೆಚ್ಚುತ್ತಿರುವುದು ಆರೋಗ್ಯಕರ ಬೆಳವಣಿಗೆ.

ತೆರಿಗೆ ಲೆಕ್ಕಾಚಾರದ ಪ್ರಮುಖಾಂಶಗಳು

ವೈಯಕ್ತಿಕ ಆದಾಯ ತೆರಿಗೆಯಲ್ಲಿ ಯಾವುದೇ ಹೊಸ ಬದಲಾವಣೆಗಳು ಇಲ್ಲ

ಪ್ರಸಕ್ತ ಸಾಲಿನ ಆರ್ಥಿಕ ವರ್ಷದಲ್ಲಿ ನೇರ ತೆರಿಗೆದಾರರ ಪ್ರಮಾಣ ಶೇ.12.6ರಷ್ಟು ಹೆಚ್ಚಳವಾಗಿದೆ, ಪರೋಕ್ಷ ತೆರಿಗೆದಾರರ ಪ್ರಮಾಣವು ಶೇ.18.7ರಷ್ಟು ಹೆಚ್ಚಾಗಿದೆ.

5.51 ಲಕ್ಷ ಹೊಸ ತೆರಿಗೆದಾರರು ಆದಾಯ ತೆರಿಗೆ ರಿಟರ್ನ್‌ ಸಲ್ಲಿಕೆ ಮಾಡಿದ್ದಾರೆ. 2017ರ ಅಂತ್ಯಕ್ಕೆ ತೆರಿಗೆದಾರರು ಸಂಖ್ಯೆ 8.27 ಕೋಟಿಗೆ ಏರಿಕೆ ಕಂಡಿದೆ. 2016-17ರಲ್ಲಿ 6.47 ಕೋಟಿಯಿತ್ತು.
2016-17 ಮತ್ತು 2017-18ರ ಆರ್ಥಿಕ ವರ್ಷದಲ್ಲಿ ರೂ. 90,000 ಕೋಟಿ ಹೆಚ್ಚುವರಿ ಆದಾಯ ತೆರಿಗೆ ಕೇಂದ್ರದ ಬೊಕ್ಕಸಕ್ಕೆ ಬಂದಿದೆ.

ರಾಷ್ಟ್ರದ ಉನ್ನತ ಸ್ಥಾನದಲ್ಲಿರುವವರ ಭತ್ಯೆ ಪರಿಷ್ಕರಿಸಿದ್ದು, ರಾಷ್ಟ್ರಪತಿ ಅವರ ಮಾಸಿಕ ಭತ್ಯೆ ರೂ. 5 ಲಕ್ಷ , ಉಪ-ರಾಷ್ಟ್ರಪತಿ ಭತ್ಯೆ ರೂ. 4 ಲಕ್ಷ, ರಾಜ್ಯಪಾಲರ ಭತ್ಯೆ ರೂ.3.5 ಲಕ್ಷ.

ವೇತನ ಹೊಂದಿದ ತೆರಿಗೆದಾರರ ಸ್ಟಾಂಡರ್ಡ್‌ ಡಿಡಕ್ಷನ್‌ ರೂ.40,000.