ಭಾರತೀಯರ ಆದಾಯ ಹೆಚ್ಚಳ; ಖರ್ಚಿನ ಜತೆಗೆ ತೆರಿಗೆ ಪಾವತಿಯೂ ಏರಿಕೆ

ಹೊಸದಿಲ್ಲಿ: 2018-19ನೇ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ (ಏಪ್ರಿಲ್‌ನಿಂದ ಜೂನ್‌ ವರೆಗೆ) ವೈಯಕ್ತಿಕ ತೆರಿಗೆಯ ಮುಂಗಡ ಪಾವತಿ ಕಳೆದ ವರ್ಷಕ್ಕಿಂತ ಶೇ 44ರಷ್ಟು ಹೆಚ್ಚಳವಾಗಿದೆ ಎಂದು ಸರಕಾರಿ ಅಂಕಿಅಂಶಗಳು ತಿಳಿಸಿವೆ.

ಕಾರ್ಪೊರೇಟ್‌ ತೆರಿಗೆ ವಿಭಾಗದಲ್ಲೂ ಕಂಪನಿಗಳು ಪಾವತಿಸಿದ ಮುಂಗಡ ತೆರಿಗೆ ಪಾವತಿ ಕಳೆದ ವರ್ಷಕ್ಕಿಂತ ಶೇ 17ರಷ್ಟು ಹೆಚ್ಚಾಗಿದೆ.

ಸತತ ಎರಡನೇ ವರ್ಷವೂ ವೈಯಕ್ತಿಕ ತೆರಿಗೆ ವಿಭಾಗದಲ್ಲಿ ಶೇ 40ರಷ್ಟು ಹೆಚ್ಚಳವಾಗಿರುವುದು ಸರಕಾರಕ್ಕೆ ಸಂತಸ ತಂದಿದೆ. ಬ್ಯಾಂಕಿಂಗ್‌ ವಲಯದ ನಿರಾಶಾದಾಯಕ ನಿರ್ವಹಣೆಯ ಹೊರತಾಗಿಯೂ 2017ರ ಜೂನ್‌ನಲ್ಲಿ ಶೇ 8ರ ಬೆಳವಣಿಗೆ ತೋರಿದ್ದ ಕಾರ್ಪೊರೇಟ್‌ ವಲಯ ಕೂಡ ಈ ಬಾರಿ ದುಪ್ಪಟ್ಟು ಬೆಳವಣಿಗೆ ಕಂಡಿರುವುದು ಆರ್ಥಿಕ ಅಭಿವೃದ್ಧಿ ನಿಟ್ಟನಲ್ಲಿ ಆಶಾದಾಯಕ ಬೆಳವಣಿಗೆಯಾಗಿದೆ.

ಹೆಚ್ಚಳಕ್ಕೇಕೆ ಇಷ್ಟು ಮಹತ್ವ?:
ವೈಯಕ್ತಿಕ ಆದಾಯ ತೆರಿಗೆ ಸಂಗ್ರಹಣೆಯಲ್ಲಿ ಹೆಚ್ಚಳವಾಗಿರುವುದು ತೆರಿಗೆ ವ್ಯಾಪ್ತಿಗೆ ಒಳಪಟ್ಟವರ ಸಂಖ್ಯೆ ಹೆಚ್ಚಿರುವುದನ್ನು ಸೂಚಿಸುತ್ತದೆ. ವಿತ್ತ ಸಚಿವ ಅರುಣ್ ಜೇಟ್ಲಿ ಅವರು ಶುಕ್ರವಾರ ತಮ್ಮ ಬ್ಲಾಗ್‌ನಲ್ಲಿ ಈ ವಿಚಾರವನ್ನು ಅನುಮೋದಿಸಿದ್ದಾರೆ. 'ವೈಯಕ್ತಿಕ ತೆರಿಗೆ ಸಂಗ್ರಹಣೆ ವಿಭಾಗದಲ್ಲಿ ಹೆಚ್ಚಳವಾಗಿರುವುದು ತೆರಿಗೆ ವ್ಯಾಪ್ತಿ ಹಿಗ್ಗಿರುವುದರ ಸಂಕೇತ' ಎಂದು ಅವರು ಬರೆದಿದ್ದರು.

ಕಾರ್ಪೊರೇಟ್‌ ತೆರಿಗೆ ವಿಭಾಗದಲ್ಲೂ ಏರಿಕೆ ಕಂಡಿರುವುದು ಭಾರತೀಯ ಉದ್ಯಮ ವಲಯ ಮುಂದಿನ ದಿನಗಳಲ್ಲಿ ಹೆಚ್ಚು ಮಾರಾಟ ಹಾಗೂ ಲಾಭದ ಹೆಚ್ಚಳವನ್ನು ನಿರೀಕ್ಷಿಸುತ್ತಿರುವುದರ ಸಂಕೇತವಾಗಿದೆ. ಸರಕು ಮತ್ತು ಸೇವೆಗಳ ವಿಚಾರದಲ್ಲಿ ಭಾರತೀಯರ ವೆಚ್ಚದ ಸಾಮರ್ಥ್ಯ ಹೆಚ್ಚಿರುವುದು ಕೂಡ ಇದರಿಂದ ವ್ಯಕ್ತವಾಗುತ್ತದೆ.

ಹಿಂದಿನ ವರ್ಷಗಳಲ್ಲಿ ಮಿತಿ ಮೀರಿ ತೆರಿಗೆ ಸಲ್ಲಿಸಿದವರಿಗೆ ಸರಕಾರ ಮರುಪಾವತಿ ಮಾಡುತ್ತಿದೆ. ನೇರ ತೆರಿಗೆ ಸಂಗ್ರಹಣೆಯಲ್ಲಿ ಶೇ 14ರ ಹೆಚ್ಚಳವನ್ನು ಸರಕಾರ ಬಜೆಟ್‌ನಲ್ಲಿ ನಿರೀಕ್ಷಿಸಿತ್ತು. ವೈಯಕ್ತಿಕ ತೆರಿಗೆಗಳ ಸಂಗ್ರಹಣೆ ಮೊತ್ತ 11.5 ಲಕ್ಷ ಕೋಟಿ ರೂ.ಗಳಾಗಬಹುದೆಂದು ಅಂದಾಜಿಸಲಾಗಿದ್ದು. ಶೇ 20ರ ಏರಿಕೆ ನಿರೀಕ್ಷಿಸಲಾಗಿದೆ. ಇದು ಕಾರ್ಪೊರೇಟ್ ವಲಯದ ತೆರಿಗೆ ಸಂಗ್ರಹಣೆಗಿಂತ ದುಪ್ಪಟ್ಟಾಗಿದೆ.