ಭಾರತವು ದುಬಾರಿ ತೆರಿಗೆಗಳ ದೇಶ: ಟ್ರಂಪ್‌

ವಾಷಿಂಗ್ಟನ್‌: ಭಾರತವು ಹೆಚ್ಚಿನ ತೆರಿಗೆಗಳನ್ನು ವಿಧಿಸುವ ದೇಶ. ಅಮೆರಿಕಾದಿಂದ ಆಮದು ಮಾಡಿಕೊಳ್ಳುವ ವಸ್ತುಗಳ ದುಬಾರಿ ತೆರಿಗೆಗಳನ್ನು ವಿಧಿಸುತ್ತಿದೆ. ಇದಕ್ಕೆ ಪ್ರತಿಯಾಗಿ, ಭಾರತದ ವಸ್ತುಗಳಿಗೆ ನಾವು ಹೆಚ್ಚಿನ ತೆರಿಗೆ ವಿಧಿಸಲು ಬಯಸುತ್ತೇವೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಎಚ್ಚರಿಸಿದ್ದಾರೆ.

ನಾಲ್ಕು ದಿನಗಳ ಸಂರಕ್ಷ ಣಾ ರಾಜಕೀಯ ಕ್ರಿಯಾ ಸಮ್ಮೇಳನದ(ಸಿಪಿಎಸಿ) ಕೊನೆಯ ದಿನ ಮಾತನಾಡಿದ ಟ್ರಂಪ್‌, ''ಭಾರತಕ್ಕೆ ನಾವು ಹಾರ್ಲೆ-ಡೇವಿಡ್‌ಸೈಕಲ್‌ ಎನ್ನುವ ಬೈಕ್‌ ರಫ್ತು ಮಾಡಿದರೆ, ಶೇ.100ರಷ್ಟು ಆಮದು ಸುಂಕ ವಿಧಿಸುತ್ತಾರೆ. ಆದರೆ, ಭಾರತದ ಮೋಟರ್‌ ಸೈಕಲ್‌ಗೆ ನಾವು ಹೆಚ್ಚೂ ಕಡಿಮೆ ಶೂನ್ಯ ಸುಂಕ ವಿಧಿಸುತ್ತಿದ್ದೇವೆ. ಪರಿಸ್ಥಿತಿ ಹೀಗೆಯೇ ಮುಂದುವರಿದರೆ ಪ್ರತಿಯಾಗಿ ದುಬಾರಿ ತೆರಿಗೆ ಹಾಕಬೇಕಾಗುತ್ತದೆ,'' ಎಂದರು.

''ಪ್ರತಿ ತೆರಿಗೆ(ರೆಸಿಪ್ರೋಕಲ್‌ ಟ್ಯಾಕ್ಸ್‌) ಪದ್ಧತಿ ಅನುಸರಿಸಲು ನಾವು ಇಚ್ಛಿಸುತ್ತೇವೆ. ಇದು ಕ್ರಿಯೆಗೆ ತಕ್ಕ ಪ್ರತಿಕ್ರಿಯೆಯಂಥ ತೆರಿಗೆಯಾಗಿದೆ,'' ಎಂದು ಹೇಳಿದರು.