ಅಸಾಂಪ್ರದಾಯಿಕ ಇಂಧನಗಳಿಂದ 40% ವಿದ್ಯುತ್‌ ಉತ್ಪಾದನೆ

ಹೊಸದಿಲ್ಲಿ: 2030ರೊಳಗೆ ಅಸಾಂಪ್ರದಾಯಿಕ ಇಂಧನಗಳನ್ನು ಆಧರಿಸಿದ ಸಂಪನ್ಮೂಲಗಳಿಂದ ಶೇ.40ರಷ್ಟು ವಿದ್ಯುತ್‌ ಉತ್ಪಾದಿಸುವ ಗುರಿಯನ್ನು ಭಾರತ ಹೊಂದಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಮಂಗಳವಾರ ಹೇಳಿದ್ದಾರೆ.

121 ದೇಶಗಳ ಅಂತಾರಾಷ್ಟ್ರೀಯ ಸೌರ ಒಕ್ಕೂಟದ(ಐಎಸ್‌ಎ) ಮೊದಲ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಅವರು, ''ಇಂಧನದ ಅಗತ್ಯ ಪೂರೈಕೆಗಾಗಿ ಮಾಲಿನ್ಯಕಾರಕ ಕಲ್ಲಿದ್ದಲಿನ ಮೇಲಿನ ಅವಲಂಬನೆ ತಪ್ಪಿಸಬೇಕು. ಪರ್ಯಾಯವಾಗಿ ಸಮೃದ್ಧವಾದ ಸೌರ ಮತ್ತು ಪವನ ಶಕ್ತಿಯಂಥ ಸಾಂಪ್ರದಾಯಿಕವಲ್ಲದ ಇಂಧನಗಳನ್ನು ಬಳಸಿಕೊಳ್ಳಬೇಕಿದೆ,'' ಎಂದರು.

''ವಿಶ್ವದ ಇಂಧನ ಬೇಡಿಕೆ ಪೂರೈಸಲು ಅಂತಾರಾಷ್ಟ್ರೀಯ ಸೌರ ಒಕ್ಕೂಟವನ್ನು ಭವಿಷ್ಯದ ಒಪೆಕ್‌ನಂತೆ ಕಾಣಲು ನಾನು ಬಯಸುತ್ತಿದ್ದೇನೆ,'' ಎಂದು ಪ್ರಧಾನಿ ಹೇಳಿದರು.

ತೈಲ ದೇಶಗಳ ಒಕ್ಕೂಟವಾದ ಒಪೆಕ್‌ಗೆ ಸೌದಿ ಅರೇಬಿಯಾ ನೇತೃತ್ವವಹಿಸಿದೆ. ವಿಶ್ವದ ಇಂಧನದ ಅಗತ್ಯದಲ್ಲಿ ಅರ್ಧ ಭಾಗವನ್ನು ಒಪೆಕ್‌ ಪೂರೈಸುತ್ತಿದೆ. ''ಜಾಗತಿಕ ಮಟ್ಟದಲ್ಲಿ ಇಂಧನದ ಅಗತ್ಯಗಳನ್ನು ಕಳೆದ ಕೆಲವು ದಶಕದಿಂದ ಒಪೆಕ್‌ ಪೂರೈಸುತ್ತಿದೆ. ಇಂಥದ್ದೇ ಪಾತ್ರವನ್ನು ಭವಿಷ್ಯದ ದಿನಗಳಲ್ಲಿ ಮುಂದಿನ ವರ್ಷಗಳಲ್ಲಿ ಐಎಸ್‌ಎ ನಿಭಾಯಿಸಬೇಕು,'' ಎಂದು ಮೋದಿ ಆಶಿಸಿದರು.

''ಕಳೆದ 150-200 ವರ್ಷಗಳಿಂದ ಮನುಷ್ಯರು ಇಂಧನ ಶಕ್ತಿಯ ಅಗತ್ಯತೆಗಳನ್ನು ಪೂರೈಸಿಕೊಳ್ಳಲು ಭೂಮಿಯ ಮೇಲ್ಮೈ ಕೆಳಗಿನ ಸಂಪನ್ಮೂಲಗಳ ಮೇಲೆ ಅವಲಂಬಿತರಾಗಿದ್ದಾರೆ. ಆದರೆ ಭವಿಷ್ಯದ ದಿನಗಳಲ್ಲಿ ಸೌರ ಮತ್ತು ಪವನ ಶಕ್ತಿಯಂತಹ ನೆಲದ ಮೇಲೆ ಲಭ್ಯವಿರುವ ಸಂಪನ್ಮೂಲಗಳನ್ನು ಬಳಸಿಕೊಳ್ಳಬೇಕು,'' ಎಂದರು.

ಪ್ರಧಾನಿ ಭಾಷಣದ ಪ್ರಮುಖಾಂಶಗಳು:

* ಸೌರ ಶಕ್ತಿ ಉತ್ಪಾದನಾ ವಲಯದಲ್ಲಿ ಹೂಡಿಕೆ ಮಾಡಲು ಇದು ಸರಿಯಾದ ಸಮಯ. ಈ ವಲಯದಲ್ಲಿ 70ರಿಂದ 80 ಸಾವಿರ ಕೋಟಿ ರೂ. ಹೂಡಿಕೆಗೆ ಅವಕಾಶವಿದೆ.

* ಇಂಧನ ಅಗತ್ಯವನ್ನು ಪೂರೈಸಲು ವಿಶ್ವ ಸಂಸ್ಥೆಯ ಎಲ್ಲ ಸದಸ್ಯ ರಾಷ್ಟ್ರಗಳೂ ಐಎಸ್‌ಎ ಮಂಡಳಿಯ ಸದಸ್ಯತ್ವ ಹೊಂದಬೇಕು ಎಂದು ಭಾರತ ಬಯಸುತ್ತದೆ.

* 31 ಕೋಟಿ ಎಲ್‌ಇಡಿ ಬಲ್ಬ್ಗಳಿಂದ ವರ್ಷಕ್ಕೆ 4,000 ಕೋಟಿ ಯೂನಿಟ್‌ ವಿದ್ಯುತ್‌ ಉಳಿಸಬಹುದು. ಇದರಿಂದ ವಾರ್ಷಿಕ 16,000 ಕೋಟಿ ರೂ. ಉಳಿತಾಯ.

* 28 ಲಕ್ಷ ಸೌರ ಪಂಪ್‌ಗಳಿಂದ ಪ್ರತಿ ವರ್ಷ 10 ಜಿಡಬ್ಲ್ಯು ವಿದ್ಯುತ್‌ ಉಳಿತಾಯವಾಗಲಿದೆ.