ಶಸ್ತ್ರಾಸ್ತ್ರ ರಫ್ತಿನಲ್ಲಿ ಭಾರತದ ಗಣನೀಯ ಸಾಧನೆ, 23ನೇ ಸ್ಥಾನಕ್ಕೆ ಏರಿಕೆ

ಭಾರತ ಇದೇ ಮೊದಲ ಬಾರಿಗೆ ಜಗತ್ತಿನ ಟಾಪ್‌ 25 ಶಸ್ತ್ರಾಸ್ತ್ರ ರಫ್ತುದಾರ ರಾಷ್ಟ್ರಗಳ ಪಟ್ಟಿಯಲ್ಲಿ ಕಾಣಿಸಿಕೊಂಡಿದೆ. ಇದುವರೆಗೆ ಆಮದು ಲಿಸ್ಟ್‌ನಲ್ಲಿ ಮಾತ್ರ ಇರುತ್ತಿದ್ದ ಭಾರತ ರಫ್ತಿನಲ್ಲೂ ಪ್ರವರ್ಧಮಾನಕ್ಕೆ ಬರುತ್ತಿದೆ.

ರಫ್ತುದಾರ ನಂ. 23

ಭಾರತವು ಜಾಗತಿಕ ಶಸ್ತ್ರಾಸ್ತ್ರ ರಫ್ತುದಾರ ದೇಶಗಳ ಪಟ್ಟಿಯಲ್ಲಿ 23ನೇ ಸ್ಥಾನ ಗಳಿಸಿದೆ. ಮೇಕ್‌ ಇನ್‌ ಇಂಡಿಯಾ ಅಭಿಯಾನದ ಅಡಿಯಲ್ಲಿ ಶಸ್ತ್ರಾಸ್ತ್ರಗಳ ದೇಶಿ ಉತ್ಪಾದನೆಗೂ ಉತ್ತೇಜನ ನೀಡಲಾಗುತ್ತಿದೆ. ಹೀಗಾಗಿ ಭಾರತದ ಸ್ಥಾನ ಮತ್ತಷ್ಟು ಸುಧಾರಿಸುವ ನಿರೀಕ್ಷೆ ಇದೆ. ಸ್ಟಾಕ್‌ಹೋಮ್‌ ಇಂಟರ್‌ನ್ಯಾಶನಲ್‌ ಪೀಸ್‌ ರಿಸರ್ಚ್‌ ಇನ್‌ಸ್ಟಿಟ್ಯೂಟ್‌ (ಎಸ್‌ಐಪಿಆರ್‌ಐ) ಬಿಡುಗಡೆಗೊಳಿಸಿರುವ ಇತ್ತೀಚಿನ ವರದಿ ಇದನ್ನು ತಿಳಿಸಿದೆ.

42 ರಾಷ್ಟ್ರಗಳಿಗೆ ಶಸ್ತ್ರಾಸ್ತ್ರ ರಫ್ತು

ಭಾರತವು ಮ್ಯಾನ್ಮಾರ್‌ಗೆ ಹೆಚ್ಚು ಶಸ್ತ್ರಾಸ್ತ್ರಗಳನ್ನು ರಫ್ತು ಮಾಡಿದೆ. ಶ್ರೀಲಂಕಾ, ಮಾರಿಷಸ್‌, ಫಿಲಿಪ್ಪೀನ್ಸ್‌ , ಇಂಡೊನೇಷ್ಯಾ ಸೇರಿದಂತೆ ಒಟ್ಟು 42 ರಾಷ್ಟ್ರಗಳಿಗೆ ರಫ್ತು ಮಾಡಲು ಭಾರತದಲ್ಲಿನ ಕಂಪನಿಗಳಿಗೆ ಅನುಮತಿ ನೀಡಲಾಗಿದೆ. ಮುಂದಿನ 5 ವರ್ಷಗಳಲ್ಲಿ 500 ಕೋಟಿ ಡಾಲರ್‌ ಮೌಲ್ಯದ ಶಸ್ತ್ರಾಸ್ತ್ರ ರಫ್ತು ಮಾಡುವ ಗುರಿ ಇದೆ. ಆಯುಧಗಳ ಬಿಡಿಭಾಗಗಳು, ರಾಸಾಯನಿಕಗಳು, ಸ್ಫೋಟಕಗಳು, ಪ್ಯಾರಾಚ್ಯೂಟ್ಸ್‌, ರಾಡಾರ್‌ ಡಿಸ್ಟ್ರಿಬ್ಯೂಷನ್‌ ಕಾರ್ಡ್‌, ಹೆಲ್ಮೆಟ್‌, ಬಾಂಬ್‌ ನಿಷ್ಕ್ರಿಯ ಸಾಧನಗಳು, ರಕ್ಷಣೆ ಕುರಿತ ಲೆದರ್‌ ಮತ್ತು ಬಟ್ಟೆಯ ಉತ್ಪನ್ನಗಳನ್ನು ಕೂಡ ರಫ್ತು ಮಾಡಲಾಗುತ್ತಿದೆ.

ರಫ್ತು ಹೆಚ್ಚಳ ಹೀಗೆ:

ಭಾರತದಿಂದ 2016ರಲ್ಲಿ ರಕ್ಷಣಾ ಸಾಧನಗಳ ರಫ್ತು: 2,000 ಕೋಟಿ ರೂ.

2017ರಲ್ಲಿ: 4,682 ಕೋಟಿ ರೂ.

2018ರಲ್ಲಿ: 10,745 ಕೋಟಿ ರೂ.


ಭಾರತಕ್ಕೆ ಶಸ್ತ್ರಾಸ್ತ್ರ ಪೂರೈಕೆದಾರರು:

ರಷ್ಯಾ, ಇಸ್ರೇಲ್‌, ಫ್ರಾನ್ಸ್‌ ಮತ್ತು ಅಮೆರಿಕ

2016-17ರಿಂದ ವಿದೇಶಿ ಪೂರೈಕೆದಾರರ ಜತೆ 1.5 ಲಕ್ಷ ಕೋಟಿ ರೂ. ಮೌಲ್ಯದ ರಕ್ಷಣಾ ಖರೀದಿ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಶಸ್ತ್ರಾಸ್ತ್ರ ಆಮದಿನಲ್ಲಿ ಸೌದಿ ಅರೇಬಿಯಾ ನಂತರದ ಸ್ಥಾನದಲ್ಲಿ ಭಾರತ ಇದ್ದು, ಆಮದಿಗೆ ಹೋಲಿಸಿದರೆ ರಫ್ತು ಪ್ರಮಾಣ ತುಂಬಾ ಕಡಿಮೆ ಇದೆ.


ಚೀನಾ ಅವಲಂಬಿತ ಪಾಕ್‌:

ಪಾಕಿಸ್ತಾನ ತನ್ನ ಶೇ. 73ರಷ್ಟು ಶಸ್ತ್ರಾಸ್ತ್ರಗಳನ್ನು ಚೀನಾದಿಂದ ತರಿಸಿಕೊಳ್ಳುತ್ತಿದೆ. ಅಮೆರಿಕ ತನ ಪೂರೈಕೆಯನ್ನು ಬಹುತೇಕ ಸ್ಥಗಿತಗೊಳಿಸಿದೆ.