ಅಭಿವೃದ್ಧಿ ಹೊಂದಿದ ದೇಶವಾಗಲು ದಶಕ ಸಾಕು: ಎಸ್‌ಬಿಐ

ಮುಂಬಯಿ : ಭಾರತವು ಅಭಿವೃದ್ಧಿ ಹೊಂದಿರುವ ದೇಶವಾಗಿ ಬದಲಾಗಲು ಇನ್ನೊಂದೇ ದಶಕ ಸಾಕು ಎಂದು ಎಸ್‌ಬಿಐ ವರದಿ ಹೇಳಿದೆ.

ಭಾರತವು ಶಿಕ್ಷಣಕ್ಕೆ ಹೆಚ್ಚಿನ ಆದ್ಯತೆ ನೀಡಬೇಕು. ಇಲ್ಲದಿದ್ದರೆ ಜನಸಂಪನ್ಮೂಲಕ್ಕೆ ಅನಾನುಕೂಲತೆ ಒದಗುತ್ತದೆ ಎಂದು ತಿಳಿಸಿದೆ. ಭಾರತ ಒಂದಾಗಿ ಕಾರ್ಯನಿರ್ವಹಿಸದಿದ್ದರೆ ಅಭಿವೃದ್ಧಿ ಹೊಂದಿದ ದೇಶವಾಗಿ ಹೊರಹೊಮ್ಮಲು ಕಷ್ಟ ಎಂದೂ ಸಂಶೋಧನಾ ವರದಿ ಎಚ್ಚರಿಸಿದೆ.

ಭಾರತಕ್ಕೆ ಈಗ ಸೀಮಿತ ಅವಧಿಯ ಒಂದು ಅವಕಾಶ ಇದೆ. ಇದನ್ನು ಸದುಪಯೋಗಪಡಿಸಿಕೊಳ್ಳದಿದ್ದರೆ, ಮತ್ತೆ ಅಭಿವೃದ್ಧಿ ಹೊಂದುತ್ತಿರುವ ದೇಶವಾಗಿಯೇ ದೀರ್ಘಕಾಲ ಉಳಿಯಬೇಕಾಗಿ ಬರಬಹುದು ಎಂದು ಎಸ್‌ಬಿಐ ಹೇಳಿದೆ. ದೇಶದ ಯುವಜನತೆ ಉತ್ತಮ ನಾಗರಿಕರಾಗಿ ಹೊರ ಹೊಮ್ಮಬೇಕಿದ್ದರೆ ಶಿಕ್ಷಣದ ಮೇಲೆ ಹೂಡಿಕೆ ಅಗತ್ಯ.